Filemoni 1 - Ishiwi Lyakwa Lesa 2015

¹ Ine Paulo, ndi mu cifungo pa mulandu wakwa Kristu Yesu. Tuli na munyinefwe Timote. Twakulembela iwe Filemoni, we mutemwikwa wesu kabili umubomfi munensu.

² Twalembela uyu kalata na ku lukuta ululongana mumobe, na kuli nkashi yesu Afia, na Akipo uulwa ubulwi bwa Mfumu pamo na ifwe.

³ Icikuuku no mutende wakwa Lesa Shifwe na Yesu Kristu Imfumu yesu fingalaba na imwe.

Icitemwiko ne cisumino cakwa Filemoni

⁴ We munyinane Filemoni, ine ndatasha Lesa wandi lyonsefye ilyo ndekupepelako.

⁵ Pantu ndeumfwa palwa citemwiko cobe ne cisumino wakwata mu Mfumu Yesu na ku bamushilo bonse.

⁶ Ine mpepa ukuti ukwampana kwesu mu cisumino, kukalenga ukuti tumfwikishe ifisuma fyonse ifyo twashukila mu bumi bwesu ico twaampana na Kristu.

⁷ We munyinefwe, icitemwiko cobe calindetela insansa no kunkoseleshako, pantu nausansamusha abamushilo.

Paulo apapatilako Onesimo

⁸ Kanshi eico apo uli munyinane muli Kristu, kuti napama ukukweba ifyo ufwile ukucita.

⁹ Lelo pa mulandu wakuti nalikutemwa, awe nalakupapatafye. Ine ne Paulo ne mukote, kabili ndi mu cifungo pa mulandu wakwa Kristu.

¹⁰ Kanshi ndekupapata pa mwana wandi Onesimo, uo nafyele muno mwine mu cifungo pakumuleta mu cisumino.

¹¹ Kale talekubombela nelyo cimo, lelo nomba aletubombela, iwe wine na ine.

¹² Ndemubwesesha kuli iwe, uo natemwa no mutima wandi onse.

¹³ Kwena nalefwaya ukuti tuleikala nankwe kuno, pakuti alengafwilishako mu cifulo cobe ilyo ncili mu cifungo pa mulandu wa Mbila Nsuma.

¹⁴ Lelo kwena nshalefwaya ukucita nelyo cimo ukwabula iwe ukuti usuminishe. Lelo nalefwaya ukuti wangafwilishako kukutemwafye kobe, ukwabula ukupatikishiwa.

¹⁵ Nalimo ico Onesimo afumine kuli iwe pa nshita inono, ni pakuti ilyo abwela, ukaleikala nankwe inshita yonse.

¹⁶ Nomba tali mushafye epela, lelo nacilapo nganshi pa musha. Ine, ni munyinane uo natemwa. Ine nalimutemwa nganshi, palibufi iwe taukamutemwa no kucilapo, apo muntu munobe kabili uo mwampana nankwe mu Mfumu!

¹⁷ Eico, iwe nga utila ine ndi mubomfi munobe, kanshi umusekelele nga filya fine wingansekelela.

¹⁸ Nga alikulufyanyapo cimo, nangu alikongolapo cimo kuli iwe, ukandipilishe.

¹⁹ Ine wine Paulo nalalemba no kuboko kwandi ukuti, NKAKULIPILA. Lelo nshili nakukucinkulako ukuti inkongole shobe kuli ine, mweo obe we mwine uwa bwina Kristu.

²⁰ Kanshi we munyinane, apo twaampana ne Mfumu, nakupapata ncitila ico ndelomba. Ala nsansamushako, ndi munonko muli Kristu.

²¹ Ine ilyo ndelemba ifi, nincetekela ukuti ukacita ico ndekulomba. Kabili ninjishiba nokuti ukacita ne ficililepo.

²² Elyo na cimbi nici, umpekanisheko umuputule. Pantu ndesubila ukuti Lesa akomfwa amapepo yenu bonse, kabinge akambwesesha na kuli imwe.

Ukusondwelela kalata

²³ Epafula, uo tuli nao mu cifungo pa mulandu wakwa Kristu Yesu, alekuposha.

²⁴ Mako, Alistako, Dema na Luka, ababomfi banandi, nabo bakuposha.

²⁵ Icikuuku ca Mfumu Yesu Kristu cileba na imwe bonse.