Esaya 1 - Ishiwi Lyakwa Lesa 2015

¹ Muli ici citabo emwaba ifyo Esaya mwana Amosi amwene palwa bena Yuda na bena Yerusalemu, pa milandu iyo Lesa asokolwele kuli Esaya pa nshita Usia, na Yotamu, na Ahasi, na Hesekia bateekele icalo ca Yuda.

Yawe aebaula abantu bakwe

² “Mwe myulu umfweni, nobe we sonde kutika, pantu ne Yawe nalanda ukuti, abana abo ine nalela no kukusha, nabansangukila.

³ Iŋombe shileshiba uwashiteeka, na bapunda baleshiba umulimba uo uwabateeka abalishishamo. Lelo abantu bandi abena Israeli awe bena tabaishiba kabili tabacumfwa nangu panono.”

⁴ Iye! Mwe bantu ba mutundu uubifya, mwe bantu abaonaika ku bubifi, mwe babifi ba bantu mwe, ifyabufi fyenu fyalimukowesha. Imwe mwalifumya amano kuli Yawe, Uwamushilo wakwa Israeli, mwalimukaana, no kumufutatila.

⁵ Mulandu nshi mwabikilapofye ukulamusangukila? Bushe imwe mulefwaya ukuti acishepo ukumukanda, mwa? Ngefyo mu mitwe yenu mulifye ifilonda fyeka fyeka, ne mitima yenu yalilwalisha.

⁶ Ukutampila ku mutwe ukushinta na ku nkasa, mu mibili yenu tapaba apashala apatuntulu, imibili yenu yabafye iya fikubululwa ne filonda, ne filaso fyeka fyeka. Nafyo tafisambilwa, tafikakilwa, nangu ukubikwapo umuti iyoo.

⁷ Icalo cenu nacisanguka amatololo, ne misumba yenu nayo yalitutaika ku mulilo. Abenafyalo balatapa icalo cenu, no kulaonaula fyonse ifyabamo, ilyo imwe ninshi muleloleshakofye.

⁸ Umwana mwanakashi Sioni ashelefye eka, kabili nabamushinguluka kwati musumba untu bawililile. Alifye kwati kamutanda kakwa malonda akabafye keka mwibala lya myangashi, nangu kwati ni nsakwe iyaba mwibala lya fibimbi.

⁹ Yawe umwine wa fita fyonse abula kutushilapo abakupusunsukako bamo bamo awe nomba nga tulifye nga Sodoma, nga tulingenefye na Gomora.

¹⁰ Umfweni ishiwi lyakwa Yawe mwe ntungulushi sha bena Sodoma, kutikeni kufyo Lesa wesu alemufunda mwe bena Gomora!

¹¹ Yawe alesosa ati, “Bushe imwe muletontonkanya ukuti ine ndafwaya aya malambo yenu yonse, ayo mwabikapofye ukulantuula, batini? Basukusuku abo mungocela amalambo, ala ine nintendwa, na mafuta ya nama shenu ishisuma nayo yene nayantendusha. Umulopa wa balume ba ŋombe, no wa bana ba mpaanga, no wa basawe, nao wine nauntendusha.

¹² Nani uwamweba ukulandetela ifyo fyonse ilyo mwisa kukulampepa? Bushe nani uwamweba ukulanyantauka mu mansa sha ŋanda yandi iyakumpepelamo?

¹³ Lekeni ukundetela imituulo yenu iyabuwelewele, akacena ka bubani mutuula kalenselausha. Inshikunkulu shenu isha mitebeto ya pa kumoneka kwa mweshi upya, ne nshiku she Sabata, na shimbi shine ishakumpepamo, awe nomba nasho shine nashikowela kuli ine pa mulandu wa bufibi bwenu.

¹⁴ Ine nomba nimpata inshikunkulu shenu isha mitebeto ya pa kumoneka kwa mweshi upya, nimpatila kumo kwine ne nshikunkulu shimbi shine isho mumpepamo. Isho nshikunkulu shili kwati cipe icamfinina, ico nomba nintendwa ukucisenda.

¹⁵ Nangu mwimye amaboko yenu pakumpepa, ine nomba nshaleloleshako amenso yandi. Nangu mupepe shani, ine nomba nshale mumfwa iyoo, pantu iminwe yenu intu yakowela ku mulopa.

¹⁶ Sambeni, isangululeni. Lekeni ukulacita ifyabubifi ifyo ine mona mulecita. Ala lekeni ukubifya,

¹⁷ bikeni amano kukuwamya. Bikeni imitima ku kucita ifyalungama. Akwafweniko abalefyengwa, akupingwileni bwino bakashiwa, mulepokololako na bamukamfwilwa.

¹⁸ “Ine ne Yawe ndeti, aleni tumfwane nomba. Nangu ifyabubifi fyenu fyakashika cee nkafisamba kabili fikabuuta tuutu ngo bunga bwa mfula. Nangu ifyabubifi fyenu fyamulenga ukukashika cee, awe mukabuutafye tuutu ngo butonge.

¹⁹ Nga mwalanakilafye ine, ninshi mukalaipakisha ifisuma ifyo umushili umesha.

²⁰ Nomba nga mwakaana, mwantalamina, awe ninshi mwashama, mukalobelela mu nkondo. Nine ne Yawe nalanda.”

Esaya alilila umusumba wa Yerusalemu

²¹ Yangu ifyo usangwike nga cilende, iwe we musumba we wali uwacishinka. Kale muli iwe mwali umulinganya wa bupingushi. Ni muli iwe emwaikele kale abalewamya kuli Lesa, pali nomba mushelefye ifipondo efileikalamo.

²² Iwe Yerusalemu kale wali nga silifa, pali nomba ulifye nga bamunyela; kale wali ngo mwangashi uusuma, pali nomba awe naufumuka.

²³ Intungulushi shobe nashitalama, shampene na bapupu, nomba lyonse balefwaisha ukulanonka ifyuma no kulapokelela amafisakanwa. Mu cilye tabalepokololako bakashiwa, nangu ukukutika ku milandu iyo bamukamfwilwa baleleta uko bali.

²⁴ Kanshi nomba umfweni ifyo Yawe umwine wa fita, Yawe Lesa impalume ya bena Israeli alesosa, aleti, “Ine nkailandula pali imwe mwe balwani bandi, tamwakalencusha nakabili iyoo.

²⁵ Ine nkamucitapo cimo imwe. Pakumuwamya nkamulopolola nga filya fine balopolola umukuba mwilungu, nkamufumyamo na fimunyela fyonse ifyaba muli imwe.

²⁶ Nkalamupeela intungulushi na bacilolo nga balya bene mwalekwata kale. Lyena mukalaitwa umusumba uwalungama, kabili ukalaitwa umusumba wacishinka.”

²⁷ Sioni akalubulwa ku mulinganya, no bololoke ebukapususha abalapila.

²⁸ Nomba umuntu onse uulebifya no kusangukila Yawe, awe ena akamonaula, akepaya onse uushiposa mano uko ali.

²⁹ Mukalalanguluka pa mulandu wakupepa ifimuti fya oki, kabili mukasebana pa mulandu wa mabala ayo mwasala.

³⁰ Mukalokota nga mabula ya cimuti ca oki icileuma, mukalauma nge filimwa ifya mwibala ilyo baleka ukutapilila.

³¹ Umuntu uwamaka akaba nge cani icaumisha ne micitile yakwe iyibi ikalasabuka nge nsase. Elyo nomba fikatimuka fyonse no kupya icakuti takwakamoneke no wakuushimya.