Amalumbo 1 - Ishiwi Lyakwa Lesa 2015

Icitabo cantanshi Amalumbo 1—41

¹ Alishuka umuntu uushendela mu mano ayapanda ababifi, kabili takonkelela imisango ya babipa, kabili tekala pamo na bamiponto.

² Lelo ena asansamukila mu mafunde yakwa Yawe, kabili yena eyo atontonkanyapo akasuba no bushiku.

³ Aba ngo muti uwalimbwa mu lulamba lwa mumana, uutwala ifitwalo fyauko pa nshita iyalinga, na mabula yauko tayabonsa nakalya, kabili ena alishuka muli fyonse ifyo acita.

⁴ Lelo abantu ababifi tefyo baba, bena baba nge misungu iyululwa ku mwela.

⁵ Eico, abantu ababifi bakapeelwa umulandu kuli Yawe, kabili tabakekale pamo na bololoke.

⁶ Pantu Yawe alatungulula imyendele ya bantu abololoke, lelo imyendele ya bantu ababifi ikabalofya.