Abapingushi 10 - Ishiwi Lyakwa Lesa 2015

Abapingushi Tola na Yairi

¹ Panuma yakwa Abimeleki kwaimine Tola mwana Pua, uwali nao mwana Dodo umwina Isaka, mukupususha abena Israeli. Aikele mu Shamiri, mu calo ca mpili icakwa Efulemu.

² Atungulwile abena Israeli pa myaka amakumi yabili na itatu, no kufwa afwa. Kabili ashiikilwe ku Shamiri kwine.

³ Elyo pakonkele Yairi umwina Gileadi, nao atungulwile abena Israeli pa myaka amakumi yabili.

⁴ Yairi ali na bana amakumi yatatu (30) abaleendela pali bapunda amakumi yatatu (30). Aba bana baleyangalila imisumba amakumi yatatu (30) mu Gileadi, iyo mu nshiku sha lelo bayeta ati Hafoti Yairi.

⁵ Ilyo Yairi afwile ashiikilwe mu Kamoni.

Abena Amoni balacusha abena Israeli

⁶ Kabinge abena Israeli babwekeshepo ukubifya ku cinso cakwa Yawe. Batendeke ukulabombela imilungu ba Baali na ba Ashitoreti, elyo ne milungu ya bena Aramu, imilungu ya bena Sidoni, imilungu ya bena Moabu, imilungu ya bena Amoni elyo ne milungu ya Bafilisiti. Kanshi efyo balabile kuli Yawe, baleka no kumupepa,

⁷ Ici calengele Yawe ukufulilwa abena Israeli icakuti abaposa na mu maboko ya Bafilisiti pamo na bena Amoni.

⁸ Muli ulya mwaka balipeye no kucusha nganshi abana bakwa Israeli. Pa myaka ikumi limo na cine konse konse balicushishe abena Israeli abaleikalila ku kabanga ka mumana wa Yordani, mu calo ca bena Amoli icaba mu Gileadi.

⁹ Abena Amoni nabo bayabwike umumana wa Yordani kukulwisha abena Yuda, na bena Benjamini, pamo na ba mu ŋanda yakwa Efulemu. Awe ubulanda bwalikulile nganshi ku bena Israeli.

¹⁰ Elyo abena Israeli balilile kuli Yawe abati, “Ifwe natubifya nganshi pakusuula Lesa wesu no kulabombela imilungu ba Baali.”

¹¹ Nao Yawe aebele abena Israeli ati, “Bushe teine namulubwile ukufuma mu maboko ya bena Egupto, abena Amoli, abena Amoni na Bafilisiti?

¹² Elyo abena Sidoni, abena Amaleki elyo na bena Maoni nabo balimutitikishe. Nalyo line mwalilile kuli ine pakuti mwafweko no kumulubula ukufuma mu maboko yabo.

¹³ Nomba imwe namunsuula no kulabombela imilungu imbi eico kanshi na ine nshakatale mupususha nakabili.

¹⁴ Kabiyenifye mukulilila ku milungu iyo mwe bene mwasala. Iyo ine eyo nomba muleke ilemupususha mu mafya yonse mwakulakwata.”

¹⁵ Elyo abena Israeli batile, “Ifwe natulufyanya. Tucitilenifye conse ico mwamona ukuti eciweme, nomba twapapata tupusushenikofye pali nomba.”

¹⁶ Elyo bafumishe amano ku milungu ya benafyalo pakati kabo no kwamba ukulapepa Yawe, icakuti nao abomfwila ubulanda ifyo balecula.

¹⁷ Kabili abena Amoni balikutene ku bulwi no kucita inkambi mu Gileadi, elyo abena Israeli nabo balilongene pamo no kucita inkambi pa Misipa.

¹⁸ Intungulushi sha bantu abena Gileadi batile kuli cila umo “Uyo onse uuleya tampilapo ukulwisha abena Amoni euli nokuba umutwe wa bonse abekashi ba mu Gileadi.”