Matayo 8 - Izwi lya Leza

Jeso Waponya Shicinsenda

¹ Mbwaakaselukila bulyo alupili, makamu makamu abantu akamucilila.

² Ngoonaawo muntu umwi wakaakuli mulwazhi cinsenda wakoona anshi wamwaambila ati, “Mwami! Waakuzanda ulakonzha kumponya.”

³ Ngoonaawo Jeso wakaswena wamwaampa itashi waamba ati, “Ndazanda, pona!” Ndilyona cinsenda cakamana wakapona.

⁴ Amane Jeso wakamulailila ati utashimwini muntu naaba womwi, pele koya ku mupaizhi kwaamba ukamutondezhe ati wapona, ulimwi ukape cipaizho ncakalailila Mozesi kwaamba bukabe bumboni.

Lushomo lwa Shikalumamba waku Kapenaumi

⁵ Inzho Jeso naakanjila mu Kapenaumi, mukando wa bashikalumamba wakeza kukumbila kwa Jeso ulaamba ati,

⁶ “Mwami mutwanga wangu wasata ulilele abulo kwangu, talozha u kubuka mulwazhi ca lufwu.”

⁷ “Jeso wakaingula ati ndeza nkamuponye.”

⁸ Shikalumamba wakaingula ati, “Pe pe Mwami, ume nsheelele kukunjizha muŋanda yangu, amba bulyo izwi mutwanga wangu ulapona.

⁹ Nkaambo ame ndishimulawo ukwete bakando bali kumbele kwangu, ulimwi ndikwete bashikalumamba bancilila. Ndamwaambila umwi ati, ‘Koya!’ Ulaya. Ulimwi ndaambila umwi ati, ‘Kweza!’ Uleza. Ndamwaambila muzhice wangu ati, ‘Cita ceci!’ Ulacita.”

¹⁰ Jeso ateelele bobo wakazhingwa u kubaambila babo boonse bakaakuya bumucilila ati, “Cini cini ndamwaambila ati nshinabwene muntu uuli lushomo luli bolya moonse mu Izilaili.

¹¹ Ndamushimwina ati bantu banji banji balakahwa kwiwe u kumbo kwaamba beze balye u Abulahamu u Aizeki ulimwi u Jakobo kwipobwe lya bwami bwa kwizeulu.

¹² Pele bana ba mu bwami balakasowelwa ansengwe mu mushinze, koko nkubakaalila ukuluma inkwino.”

¹³ Amane wakamulailila shikalumamba ati, “Bweela kwako, ceco nciwashoma ulacitilwa.” Aciindi ceco ncicona wakapona mutwanga wakwe.

Jeso Waponya Banji Banji

¹⁴ Jeso naakashika kuŋanda yaka Pita, wakayana bainazhala Pita ulilele mulwazhi mubili koopiya lungulu.

¹⁵ Wakamukwata etashi ngoonaawo mubili wakaakumukwete wakamuleka wakabuka wakakanka kubafwutaucila.

¹⁶ Nikwakaba kumangolezha bakamuletela bantu banji banji bakaakunjililwe myoza mibiyabi. Jeso wakeetanda myoza mibiyabi u kubaponya boonse bakaakuli balwazhi kwizwi lyaloolona.

¹⁷ Ceci wakacicita kwaamba azuzucizhiwe akaamba mushinshimi Aizaya aakuti, “Walo lwakwe mwini wakakusha malwazhi esu ukubweza shicisa shesu.”

Bantu Beelele Kumucilila

¹⁸ Jeso naakabona ati bantu bahulisha bamuzhingulucile, wakabalailila kwaamba balandukile kumutala umwi wezhiba.

¹⁹ Umwi mwiiyi wa mulawo wakashika kwakwe waamba ati, “Mwiiyi ume ndilibambile kuya aze kufwumbwa nkuuya.”

²⁰ Jeso wakamwiingula ati, “Ba mwaaba balikwete mena, u bazuni balikwete shitaanto, pele Mwanaa Muntu wiina busena bwakoona ubwa kulyookezhezha.”

²¹ Uumwi mulombwana waakuli shiciiya wakeza kwakwe waamba ati, “Mwami ntaangune mbweele nkamuzhike taata.”

²² Jeso wakamwita ati, “Ncilila bulyo, baleke bafwu bazhikane beni.”

Jeso Waaumuzha Mankutisha

²³ Jeso nakanjila mu bwato ba shiciiya bakwe bakamucilila.

²⁴ Ngoonaawo muuwo mukando wakaunga mwizhiba cakuti bwato buti bukalobe. Ku ciindi ceco Jeso wakaakoona.

²⁵ Ba shiciiya bakaya ngaakaakulele bamubusha baamba ati, “Tuhune Mwami tukalafwa!”

²⁶ Abuke Jeso wakabeta ati, “Nciinzhi ncimutiya umwe nubantu nubashilushomo lushoonto?” Amane wakazhimuka wakoolemanina muuwo u mankutisha kwaamba shileke, ngoonaawo shakaumuna zii!

²⁷ Boonse ba shiciiya bakazhingwa u kwaamba ati, “Anu muntu uli buti wezu uteelelwa u mankutisha u muuwo?”

Jeso Waponya Bantu Bobile Bakaakunjililwe Myoza Mibiyabi

²⁸ Inzho Jeso naakalanuka wakashika ku cishi caba Gadala, koko wakaswaanganya balombwana bobile bakahwa munamaumbwe bakaakunjililwe myoza mibiyabi. Babo balombwana kabali bakali kwiina muntu wakaakukonzha kwiita inzhila yezho.

²⁹ Ndilyona bakapozomoka baamba ati, “Nciinzhi ncuuzanda kulyuuswe uwe u Mwanaa Leza? Sa weza kutupenzha kacitana kushika ciindi?”

³⁰ Afwaafwi awo kakuli butanga bwa ngulube bwa kaakucela.

³¹ Ubobo myoza mibiyabi yezho yakamulomba Jeso ati, “Watutanda twalomba ututandile mu ngulube shelya.”

³² Jeso wakeetanda ati, “Kamuya!” Myoza mibiyabi yakamuhwa mu bantu babo u kuya kunjila mu ngulube. Boonse butanga bwakakunkulikila mumukonka wezhiba bwakaloba.

³³ Balombwana bakaakwembela butanga bwa ngulube bakalukanka u kuya kunjila mu munzhi momo mubakaya kukanana ncibakabona, ucakacitika kubalombwana bobile bakaakunjililwe myoza mibiyabi.

³⁴ Ubobo bantu boonse bamumunzhi wezo bakeza kwa Jeso, nibakamubona bakamulomba kwaamba amuhwe mucishi cabo.