Matayo 6 - Izwi lya Leza

Kuyohwa Bapenzhi

¹ “Amucenjele kwaamba mutalibonya bululami ku bantu camambonwa, nkaambo kuti mwacita bobo ati mwabula bulumbu kuli uswenu uli kwizeulu.

² “Ubobo ciindi nimupa shipo shaluse kubapenzhi mutafwibi impeta ukoya bashikuupaupa amenso mbubacita mu shikombelo shaba Juda u mikwakwa kwaamba batembaulwe ku bantu. Cini cini ndamwaambila ati babo bakabuyana kale bulumbu bwabo,

³ pele umwe nimupa shipo shaluse itashi lyenu lya cimonsho litazhibi ncilicita lya cilyo,

⁴ kwaamba shipo shenu shaluse shitabonwa ku bantu. Ubobo uswenu uubona shicitwa umasesece, ulakamupa bulumbu.

Mbumweelele Kukomba

⁵ “Ulimwi nimukomba tamweelele kuba ukoya bashikuupaupa amenso pe, nkaambo balazandisha kukomba buzhimine mu shikombelo shaba Juda u mushooko shamikwakwa kwaamba babonwe ku bantu. Cini cini ndamushimwina ati babo batambula kale bulumbu.

⁶ Pele umwe mwakanka kukomba amunjile muŋanda muliyalile mukombe kwa uswenu uulimo, ubobo uswenu ubona shicitwa umasesece, ulakamupa bulumbu.

⁷ “Ulimwi nimukomba mutaakuhuzha shakwaamba ukoya mbubacita bakunze mubazunga ati balateelelwa ukaambo kamazwi manji manji.

⁸ Umwe mutabi ukoya mbubabele nkaambo Uswenu ulishizhi kale nshimuzanda kamutana u kumukumbila.

⁹ Inzho mbubolya mbumweelele kukomba, “‘Ushesu uuli kwizeulu, Nalilemekwe izhina lyako,

¹⁰ Nabuzhize bwami bwako, nalucitwe luzando lwako, Anshi ano umbona mbuli kwizeulu.

¹¹ Utupe bwasunu shakulya shesu.

¹² Utulekele milandu yesu, umbona aswe mbutubalekelela bali milandu kulyuuswe.

¹³ Utatweenzha mukutepaulwa, Pele utuhune ku mubiyabi.’

¹⁴ “Nkaambo kuti kamubalekelela bamubishizha, uswenu uuli kwizeulu ulakamulecelela shibi nshimwakacita amwe.

¹⁵ Pele kuti naa tamubalekelela bantu, aze uswenu takamulekelela shibi nshimwakacita.

Makani Aakuliimya kulya

¹⁶ “Ulimwi mwaakuliimya kulya, mutaakuungumana ukoya bashimantumbwambwa mbubacita. Nkaambo balahunga mashu abo kwaamba woonse muntu ababone ati balaliimya kulya. Cini cini ndamwaambila ati babo bakabutambula kale bulumbu bwabo.

¹⁷ Mwaliimya kulya amusambe kumenso, munane mafwuta umutwi,

¹⁸ kwaamba bantu batazhibi ati mwaliimya kulya cita bulyo uswenu uzhi shoonse nguukazhiba. Ulimwi wezo uswenu ubona shicitwa mu masesece ulakamulumbula bweelele.

Lubono Kwizeulu

¹⁹ “Mutaakulizobolela lubono anshi ano ngululiwa impezu u sence. U batewu ngubanjila u kwiba.

²⁰ Pele umwe amulizobolele lubono lwenu kwizeulu koko nkulutaliwa impezu u sence u batewu nkubatenjili u kwiba.

²¹ Nkaambo koko kuli lubono lwako, ati u monzo wako nkuubele.

Mumuni wa Mubili

²² “Menso ali ukoya mumuni wa mubili. Naa menso alabona kabotu, ati mubili wako woonse ulizwile mumuni,

²³ pele kuti asata, ati mubili wako woonse ulaba mu mushinze. Inzho kuti mumuni wako kooli mushinze, ati wezo mushinze ulazoosha!

Leza u Lubono

²⁴ “Kwiina muntu ukonzha kusebezela bami bobile, nkaambo umwi ulamusula u kufwuna uumwi, naa ulashomeka kuli umwi ukusampaula uumwi. Tamukonzha kusebezela Leza u buhubi.

²⁵ “Ubobo mutalibilici ku makani a bumi bwenu kwaamba ati, no tulakalyaanzhi naa kunwa nikuba kusama. Sa bumi tabubaali ali shakusama? Naa mubili sa toobaali ashisani?

²⁶ Amubalange bazuni tabashangi nikuba kutebula kwaamba bazobole umatala, pele uswenu uuli kwizeulu ula beembela! Sa umwe tamubaali abazuni?

²⁷ Nguni akati kenu ukonzha kuzungila bumi bwakwe kwiita mukulibilika?

²⁸ “Nciinzhi ncimulibilika ku makani ashisani? Amwaalange malubaluba a mwisokwe mbwaakomena. Taasebezi nikuba kulipangila shakusama.

²⁹ Pele ndamwaambila kwiina naaba mwami Solomoni umbulemu bwakwe naakakwata cikobelo cibotu ukoya aza malubaluba.

³⁰ Pele kuti naa Leza kakonzha kusamika bwizu bufwumbi bwasunu ngubuli uzona bwatentwa, sa takaamusamika cibaala? Anu nkaambonzhi umwe ncimwiina lushomo?

³¹ “Ubobo mutalibilici ati no tulakalyaanzhi na ati tulakanwaanzhi nikuba kusamaanzhi.

³² Nkaambo sheshi abo bakunze nshibakapula, amana Ushenu ulizhi ati sheshi shintu mulashizanda.

³³ Pele amutaangune kukapula bwami bwakwe ubululami bwakwe, kwamana shoonse shintu mulakapewa.

³⁴ Ubobo mutalibilici linji shazona nkaambo bwazona bulakalipakashizha bwini. Kufwumbwa buzuba bulikwete mapakasho ambubo bwini.”