Matayo 5 - Izwi lya Leza

Jeso Wakambauka Alupili

¹ Inzho Jeso naakaabona makamu makamu abantu wakaliza alupili amane wakala. Ba shiciiya bakeza nkwaakaakubele,

² ulimwi wakakanka kubayiisha.

Bantu Balonjezhe

³ “Mulilonjelwe umwe numwizhi ati muli bapushi ku moza, nkaambo bwami bwa kwizeulu mbwenu.

⁴ Mulilonjelwe umwe numulila, nkaambo Leza ulakamusoozha.

⁵ Mulilonjelwe nubabonhu myonzo nkaambo mulakeekona inshi.

⁶ Mulilonjelwe umwe numufwa inzala iinyota ya bululami nkaambo mulakekuta u kulamatwa.

⁷ Mulilonjelwe numufwila bantu luse, nkaambo mulakatambula luse.

⁸ Mulilonjelwe numusalala mu myonzo, nkaambo mulakamubona Leza.

⁹ Mulilonjelwe umwe numuleta luumuno ku bantu, nkaambo mulakatewa ati mbana ba Leza.

¹⁰ Mulilonjelwe umwe numupezhewa ukaambo kabululami, nkaambo bwami bwa kwizeulu mbwenu.

¹¹ “Mulilonjelwe umwe ciindi bantu nibamutuka u kumupenzha ulimwi ukumutamicizha shibiyabi shoonse, ukaambo kezhina lyangu.

¹² Amutangale u kusekelela nkaambo bulumbu bwenu kwizeulu mbukando. Imbubo mbubona bantu mbubakabapenzha bashinshimi bakale kale.

Mwino u Mumuni

¹³ “Umwe muli ukoya mwino wanshi, pele kuti mwino wasampuka no ulalunzhiwa buti? Ati wabula mulimo ulasweewa bulyo u kulyataukwa ku bantu.

¹⁴ Muli ukoya mumuni wanshi. Munzhi muzake a lupili tookonzha kusesekwa.

¹⁵ Kwiina uusonsa ilambe amana walihunikila intesho, pele lilabikwa awo ngulikonzha kumunicila bantu bali muŋanda boonse.

¹⁶ Umbona bulyo amwe mumuni wenu noomunicile bantu, kwaamba beebone milimo mibotu njimucita, kwaamba ushenu uli kwizeulu atembaulwe.

Jeso Wakeza Kuzuzucizha Mulawo

¹⁷ “Mutatelaici ati ndakeza kuyaya mulawo na bashinshimi. Ndiina kwiza kuuyaya pele ndezhila kuuzuzucizha.

¹⁸ Cini cini ndamwaambila ati, izeulu iinshi shilakaloba, pele kwiina nikaba kabala komwi kashoonto ka mulawo kakaayayiwa cita shoonse shikazuzucizhiwe.

¹⁹ Ubobo ndamwaambila ati kufwumbwa wezo usotoka kabala nikaba komwi ka milawo yezhi u kuyiisha bantu kwaamba bacite bobo, wezo ulakaba mushaalizhi mu bwami bwa kwizeulu. Pele wezo uyicilila u kuyiisha bamwi ulakaba mukando mu bwami bwa kwizeulu.

²⁰ Amwi ngakuti, kuti bululami bwenu kabutabaali ali bwa balembi uba Falisi, tamukanjili mu bwami bwa kwizeulu.

Makani Akulemana

²¹ “Mwakateelela mbubakaambilwa ba shaakale ati, ‘Utayaya nkaambo muyazhi ulyeelele kubetekwa.’

²² Imbubo, pele ume ndamwaambila ati kufwumbwa ulemanina mweenzhiina ulyeelele kubetekwa. Uwezo usampula munina ulyeelele kubetekwa munkuta inkando. Pele wezo waambila munina ati, ‘Uwe umulimbushi!’ Ulyeelele mulilo utazhimi.

²³ Ubobo kuti watola cipo cako kucipaililo wamana wazhibaluka ati ulikwete makani u munyoko,

²⁴ cishiye cipo cako ku cipaililo uye kwakwe. Utaangune muteelezhanye u munyoko wamana uzhize upe cipo cako.

²⁵ “Mulyeelele kuteelezhanya u shinkondonoko munzhila nimuciya kunkuta. Nkaambo kuti wakutola kumubeteshi, aze mubeteshi wakutola kumulindilizhi, ulakasowelwa muntolongo.

²⁶ Cini cini wiina nukaamuhwa muntolongo cita ukoomane mulandu kuuliya.

Makani a Bumambe

²⁷ “Inta mwakateelela kwakaambwa ati, ‘Utaciti bumambe.’

²⁸ Pele ume ndamwaambila ati, kufwumbwa ulanga mukaintu cakumulyeelezha, wezo ati wacita kale bumambe mu monzo wakwe.

²⁹ Inzho kuti linso lyako lya kucilyo ndilikupa kucita shibi, lilobole ulisowe, nkaambo ncibotu kusweekelwa comwi cashipanzha ca mubili wako kubaala ati woonse mubili wako wasowelwa u mulilo utazhimi.

³⁰ Kuti itashi lyako lya cilyo ndilikupa kucita shibi, likosole nkaambo ncibotu kusweekelwa cizo comwi ca mubili wako kubaala ati woonse mubili wako wawaalwa mu mulilo utazhimi.

Kuyiisha sha Kulekana

³¹ “Ulimwi kwakaambwa ati, ‘kufwumbwa waleka mwinakwe ulyeelele kumupa luŋwalu lwa kumuleka!’

³² Pele ume ndamwaambila ati, mulombwana teelele kuleka mwinakwe cita kuti wabukilwa, kufwumbwa wezo uuleka mwinakwe kukaambo kamwi koonse ulapa kwaamba mukaintu abukilwe, u wezo utwala mukaintu wakalekwa ati aze wabukilwa.

Makani a Kulumbila

³³ “Ulimwi mwakateelela kuli ba shaakale benu aakuti, ‘Utalumbila cakubeya. Ucite ku mwami Leza mbubona mbuwashomezha kwakwe.’

³⁴ Pele ume ndamwaambila ati, ‘utalumbila naashoonto pe, nikuba kwizeulu nkaambo ncicuuna ca Leza,

³⁵ naaba anshi nkaambo ncicilyatilo ca Leza, nikuba ku Jelusalemu nkaambo ngu munzhi wa Mwami mukando.’

³⁶ Ulimwi mutalumbila ati, ngu mutwi wangu mwini, nkaambo tamukonzha kusandula isusu kwaamba litube naa lishiye.

³⁷ Kwaamba kwenu akube bulyo kwakuti, ‘Ee,’ naa, ‘Pe pe,’ kwiitilizha kwaamba bobo kulahwa ku mubiyabi.

Makani a Nzholi

³⁸ “Ulimwi mwakateelela kwakaambwa ati, ‘linso ku linso, u lino ku lino’

³⁹ Pele ume ndamwaambila ati, ‘Utazhola cibi ku cibi.’ Pele kuti muntu wakuuma kwitama lya kucilyo aakuume ukwitama lya kucimonsho.

⁴⁰ Ulimwi kuti umwi muntu wakutola kunkuta kwaamba akunanzhe cikobelo iichanshi lyako, naalitole iikoti lyako.

⁴¹ Ulimwi kuti shikalumamba wakushinicizha kweenda mushinzo uulampa maile womwi, amweende aze umaile wabili.

⁴² Mupe wezo ukumbila, ulimwi aze wezo uzanda ukweleta utamukasha pe.

Makani Akufwuna ba Shinkondonoko

⁴³ “Inta mwakateelela kwakaambwa ati, ‘Ufwune mweenzhinoko, usule shinkondonoko?’

⁴⁴ Pele ume ndamwaambila ati, amubafwune ba shinkondonokwenu ulimwi mubakombele babo bamupenzha,

⁴⁵ kwaamba mukabe banakwe ushenu uli kwizeulu. Kayi walo ulapozha izuba ku babiyabi uku babotu. Ulimwi ulaunsha inhula ku ba shishibi u baluleme,

⁴⁶ nkaambo kuti kamufwini bulyo babo bamufwini no mulakayana bulumbuunzhi? Sa bashimutelo tabaciciti ceco?

⁴⁷ Ulimwi kuti kamwaanzha bulyo banyokwenu, no ncintuunzhi cibotu ncimwacita kubaala bamwi? Sa abo bakunze tabaciti bobo?

⁴⁸ Umwe mulyeelele kuba bantu baluleme ukoya ushenu uli kwizeulu.”