Matayo 4 - Izwi lya Leza

Kutepaulwa kwa Jeso

¹ Kuhwaawo Jeso wakasololelwa u Moza Usalala kuya mulukula ukutepaulwa kwa Shaatani.

² Naakamana kuliimya kulya kwa mazuba ali makumi one, wakafwa inzala.

³ Mutepauzhi wakeza kwakwe wamwaambila ati, “Naa uli mwanakwe Leza cini cini aambile mabwe aza cibe cinkwa.”

⁴ Jeso wakaingula ati, “Kulilembelwe ati muntu taponeni kulya cinkwa caloolona pele ulapona kwizwi lyoonse lihwa ku mulomo wa Leza.”

⁵ Ubobo Shaatani wakamutola Jeso ku munzhi usalala ku Jelusalemu wamulizika alululi lwa ŋanda ya Leza.

⁶ Wamwita ati, “Naa uli mwanakwe Leza lifwuse anshi, nkaambo kulilembelwe ati, “‘Leza ulakalailila baanjelo bakwe kwaamba bakakukobelele ati utakabi nuulifwumpula kucituta cako.’”

⁷ Jeso wakaingula ati, “Ulimwi kulilembelwe ati, ‘Utasunki Mwami Leza wako.’”

⁸ Ulimwi Shaatani wakamutola ku lupili lulamfwu kumutondezha mami anshi u bulemu bwawo.

⁹ Amane wamwita ati, “shoonse sheshi ndakupa kufwumbwa kuti wamfwukamina u kunkomba.”

¹⁰ Jeso wakamwita ati, “Ahwe awa Shaatani! Inta kulilembelwe ati, ‘Komba Mwami Leza wako ulimwi umusebezele ice nana.’ ”

¹¹ Kuhwaawo Shaatani wakamushiya ngoonaawo baanjelo bakeza kumufwutaucila.

Jeso Wakanka Kukambauka Mu Galilaya

¹² Jeso naakateelela ati Johani waangwa, wakapiluka ku Galilaya.

¹³ Wakakuhwa ku Nanzaleta waya kukala mu munzhi wa Kapenaumi, wakaakuli kumbali ku lwaatele lwa Galilaya mumashi a Zebuluni u Nafutali,

¹⁴ kwaamba makani akaamba mushinshimi Aizaya azuzucizhiwe aakuti,

¹⁵ “U cishi ca Zebuluni u cishi ca Nafutali, kolya kunzhila iiya ku lwaatele kuluya lumwi lwa Joodani, Galilaya wa bantu bakunze,

¹⁶ bantu bakaakuli u mushinze boobona mumuni mukando. Kuli babo bali mucinhule ca lufwu mumuni ulakabamunicila.”

¹⁷ Ku ciindi ceco Jeso wakakanka kukambauka ati, “Amusanduke, nkaambo bwami bwa kwizeulu buli afwaafwi.”

Jeso Weta ba Bashiciiya Bataanzhi

¹⁸ Jeso naakaakuya bweenda kumbali ku lwaatele lwa Galilaya, wakabona Saimoni uutewa ati Pita u Andulu munina balawaala kanyandi mu meenzhi nkaambo kabali bazezhi.

¹⁹ Jeso wakabaambila ati, “Amuncilile kwaamba nkamucite bazezhi babantu.”

²⁰ Ngoonaawo bakatushiya tunyandi twabo bamucilila.

²¹ Eende bulyo kuhwaawo wakabona ubamwi ba bunina banakwe Zebedi ba Jemusi u Johani bali mu bwato balasasa tunyandi twabo uushabo. Abo babo wakabeta,

²² ngoonaawo bakabushiya bwato uushabo bamucilila.

Jeso Wakambauka u Kuponya Balwazhi

²³ Jeso wakeenda mu Galilaya moonse ulaya buyiisha mu shikombelo shaba Juda, u kukambauka Makani Mabotu aabwami, u kuponya malwazhi aandeene andeene akati ka bantu.

²⁴ Impuwo yakwe yakazuwa moonse mu Siliya, ubobo bantu bakamuletela boonse bakaakusata malwazhi u shicisa shamishobo yoonse. Bakabaleta boonse bakaakunjililwe myoza mibiyabi, bashikasuntu, u babo bali mibili yakaakuzuminine, boonse baba wakabashilika bakapona.

²⁵ Makamu makamu a bantu akahwa ku Galilaya ku Dekapolisi, ku Jelusalemu, ku Judiya uba ku cishi cili kumutala wa Joodani akamucilila.