Matayo 28 - Izwi lya Leza

Jeso Wabuka ku Bafwu

¹ Inzho Sabata niyakamana, buce bulyo mu buzuba butaanzhi bwa Nsunda, Maliya waku Magadala u Maliya umwi bakaya kubona cuumbwe.

² Ubobo kwakaba kuzungaana kwanshi, nkaambo anjelo wa Mwami wakaseluka kuhwa kwizeulu, wakashika walikunkulusha ibwe amane walikala.

³ Ciwa cakwe kacili ukoya lulabo, shakusama shakwe kashituba buu.

⁴ Ukaambo kakutiya anjelo, balindizhi bakazhangama bakaba ukoya bantu bafwu.

⁵ Inzho anjelo wakabaambila bakaintu nibakashika ati, “Mutatiyi nkaambo ndizhi ati mulalanga Jeso wakakankaminwa aciciinkano.

⁶ Teko kono, wabuka umbona mbwaakaamba. Kamwiza mwaabone ngaakaakulele.

⁷ Inzho amufwaambaane muukuya mukabashimwine ba shiciiya ati wabuka ku bafwu, ulimwi ulabataangunina kuya ku Galilaya koko nkubakaamubonena. Mutaaluba aza ngundamushimwina.”

⁸ Babo bakaintu bakakuhwa ku cuumbwe balitiile kumwi kababotelelwe cini cini! Bakalukanka kuya kubashimwina ba shiciiya bakwe.

⁹ Jeso wakabaswaanganya amane wabaanzha ati, “Luumuno lube amwe.” Balo bakaswena ukukwata ku maulu bamukomba.

¹⁰ Amane Jeso wakabaambila ati, “Mutatiyi, kamuya mukabaambile bakwesu ati baye ku Galilaya koko nkubakaanjana kwaamba tukabonane.”

Ngubakatola Balindizhi

¹¹ Inzho bakaintu nibakaakuciya, balindizhi bamwi bakanjila mu munzhi ukushimwina bantu u bapaizhi bakando shoonse shakacitika.

¹² Ngoonaawo bapaizhi bakando nibakabungana antoomwi ubakando baba Juda bakayana muzeezo wakubapa mali manji manji bashikalumamba,

¹³ babaambila ati, “Bantu amubashimwine ati, ‘Ba shiciiya kabezhile mashiku kwiba mutunta nitwaakoona.’

¹⁴ Ceci aciteelela mweendelezhi tulamukombelezha kwaamba mutapewa mulandu.”

¹⁵ Ubobo babo balindizhi bakaatambula mali u kucita umbona mbukalaililwa. Mbubobo makani aza mbwaakamwaya akati kaba Juda kushika ubwasunu.

Jeso Walibonya ku Bashiciiya Bakwe

¹⁶ Inzho ba shiciiya bali ikumi uutwesha womwi bakaya ku lupili lwa Galilaya koko Jeso nkwaakabalailila.

¹⁷ Nibakamubona bakamukomba, pele bamwi kabacizuluzha.

¹⁸ Jeso wakaswena afwaafwi wabaambila ati, “Ndapewa insana shoonse kwizeulu anshi.

¹⁹ Ubobo kamuya mukabayiishe bantu bamishobo yoonse, mukabapapatize mwizhina lyaka Taata ulya Mwana ulya Moza Usalala.

²⁰ Mukabayiishe ati baabambe makani oonse ngundakamulailila. Ulimwi amulange, Ume ndaakulyaamwe lyoonse mpaka kushikila ku mamanino.”