Matayo 2 - Izwi lya Leza

Balombwana Basongo Bakahwa Kwiwe

¹ Jeso Kilisto wakazhalilwa mu munzhi wa Betelehemu mucishi ca Judiya, lyakaakulela mwami Helodi. Inzho ku Jelusalemu kwakashika balombwana basongo bakahwa kwiwe.

² Nibakashika bakabuzha ati, “Ulikwi wezo wakazhalwa Mwami waba Juda? Nkaambo tweebona intongwezhi yakwe kwiwe, ubobo tweza kumukomba.”

³ Ateelele bobo mwami Helodi, wakapenga mu monzo cini cini ubamu Jelusalemu boonse.

⁴ Ngoonaawo wakababunganya bapaizhi bakando u balembi ba bantu, wakababuzha buzha koko nkwaakaakweelele kuzhalilwa Munanike wa Leza.

⁵ Bakamwaambila ati, “Mu Betelehemu mucishi ca Judiya nkaambo imbubo mbwaakalemba mushinshimi ati,

⁶ “‘Uwe u Betelehemu mucishi ca Juda, nikuba ati uli mushoonto akati kabeendelezhi bamu Juda, nkaambo mulyuuwe mulakazhalwa mweendelezhi uukaayembela bantu bangu ba Izilaili.’ ”

⁷ Ngoonaawo mwami Helodi wakabeta babo balombwana basongo kumabali ukubabuzha buzha intongwezhi nibakeebona.

⁸ Amane wakabatuma ku Betelehemu u malailile akuti, “Kamuya mukamukapule kabotu mwana, mwakamuyana mwize muŋambile kwaamba ame nkamukombe.”

⁹ Inzho nibakateelela bobo bakaya, ngoonaawo intongwezhi njibakaakubwene kwiwe yakeendela kumbele mpaka mwini niyakaya kuzhima awo akaakuli mwana.

¹⁰ Intongwezhi niyakazhima awo bakabotelwa cini cini.

¹¹ Nibakanjila muŋanda bakamuyana Mwana u Maliya baina, ngoonaawo bakafwukama ukumukomba. Bamane bakashiyalula shizobwelo shabo bapa shipo sha goludi u fulankinsensi u mila.

¹² Leza wakabacenjezha muciloto kwaamba batabweela kwa Helodi ubobo nibakapiluka kubanamuzhaabo bakaita inzhila iinji.

Kuloboka Kuya ku Ijipiti

¹³ Inzho balombwana basongo nibakapiluka, anjelo wa Leza wakalibonya kwa Jozefu muciloto ulamulailila ati, “Zhimuka umuloboshe mwana u baina kuya ku Ijipiti, kushikila nkakwaambile, nkaambo Helodi ulazanda kumuyaya mwana.”

¹⁴ Ngoonaawo wakazhimuka wamutola mwana u baina ciindi ca mashiku, waya ku Ijipiti.

¹⁵ Wakakala koko kushikila naakafwa Helodi. Ceci cakacitwa kuzuzucizha bwakaamba Leza kwiita mu mushinshimi ati, “Ndakamoompolola mwanangu kuhwa mu Ijipiti.”

Kuyayiwa kwa Bana

¹⁶ Helodi naakabona ati babo balombwana basongo bamucenga, wakalemana cini cini. Ngoonaawo wakalailila ati kuyaiwe bana beembezhi bakwete myaka yobile kuzhoka anshi bamu Betelehemu u masena aazhingulucile. Yezhi myaka yakeendelana u ciindi ceco nakateelela makani akamwaambila bolombwana basongo kukwatilizha intongwezhi yakabonwa.

¹⁷ Munzhila yezhi, akaba meni meni akaamba mushinshimi Jelemiya aakuti,

¹⁸ “Izwi lyakateelelwa mu Lama, kulila u koomoka cini cini. Ngu Lacelo ulalila banakwe, wakaka kusoozhewa nkaambo banakwe tabaciko.”

Kupiluka Kuhwa ku Ijipiti

¹⁹ Inzho Helodi naakafwa anjelo wa Leza, wakalibonya muciloto kwa Jozefu mu Ijipiti,

²⁰ ulaamba ati, “Buka umutole mwana u baina ku cishi ca Izilaili, nkaambo babo bakaakuzanda kumuyaya mwana bakafwa.”

²¹ Ubobo Jozefu wakamutola mwana u baina, bakapiluka ku Izilaili.

²² Pele Jozefu naakateelela ati Akelausi nguwakalya izhina lya Helodi ushi, mwami wamu Judiya, wakafwa bukandu kuya koko. Leza wakamupa malailile aanji muciloto, ubobo wakaya mucishi ca Galilaya.

²³ Ashike wakakala mu munzhi wa Nanzaleta. Ubobo makani aakaamba mushinshimi akazuzucizhiwa, aakuti, “Ulakaakutewa ati muna Nanzaleta.”