Maako 9 - Izwi lya Leza

¹ Ulimwi Jeso wakabaambila ati, “Cini cini ndamushimwina ati, ngubali ano bamwi batakaafwi kabatana kububona bwami bwa Leza kabwiza iinsana.”

Mubili waka Jeso Wasanduka

² Nikwakaita mazuba ali cisambomwi, Jeso wakabweza Pita, u Jemusi u Johani, baliza alupili lulamfwu. Ba shiciiya babo kabamulanjilile Jeso ciindi ciwa cakwe nicakaakuya busanduka.

³ Shakusama shakwe shakakanka kumweka shakatuba buu. Kwiina muntu ano anshi ukonzha kushitubya bobo pe.

⁴ Ulimwi ba shiciiya baba bakabona Elija u Mozesi balabandika u Jeso

⁵ Pita wakamwaaambila Jeso ati, “Mwiiyi, cabota kwaamba ati tuli ano. Atuzace shifwutu shotatwe, cimwi cibe cako, cimwi caka Mosesi, cimwi caka Elija.”

⁶ Pele katacizhi ncakaakwaamba, nkaambo walo u beenzhiina kabafwile bukandu.

⁷ Inzho kwakalibonya ikumbi lyakeza kubahumba. Momo mwikumbi mwakahwa izwi lyakaamba ati, “Wezu ngu mwanangu nakufwunwa, noomuteelele!”

⁸ Ngoonaawo ba shiciiya bakacebauka pele kwiina muntu unji ngubakabona, cita bulyo Jeso ice.

⁹ Inzho nibakaakuya buseluka a lupili, Jeso wakabalailila ba shiciiya baba ati, “Sheshi nshimwabona mutashimwini muntu naaba womwi pe, mpaka cikashice ciindi ceco Mwanaa Muntu naakaabuka ku bafwu.”

¹⁰ Bakakuteelela kulaililwa koku, pele nikuba bobo kabacibuzhanya akati kabo ati, “No koku kubuka ku bafwu caambaanzhi?”

¹¹ Inzho ba shiciiya bakamubuzha Jeso ati, “No balembi balaambilaanzhi ati Elija ulyeelele kutaanguna kushika?”

¹² Jeso wakabaingula ati, “Cini cini Elija nguuyelele kutaanguna kwiza kwaamba abambe shintu shoonse. Nikuba bobo no nkaamboonzhi Malembe alaamba ati Mwanaa Muntu ulyeele kupenga cini cini ukukakwa?

¹³ Cini cini ndamushimwina ati Elija wakeza kale, ulimwi bantu bakamucita mbubaakuzanda, umbona mbucilembelwe.”

Jeso Waponya Mweembezhi Unjililwe Moza Mubiyabi

¹⁴ Nibakashika kwaakuli ba shiciiya nokwabo, bakabona inkamu inkando ya bantu, kakuli u balembi ubakaakuzumanicizhanya u ba shiciiya.

¹⁵ Inzho nibakamubona Jeso bakazoowa cini cini, bakamulukancila kuya kumwaanzha.

¹⁶ Jeso wakababuzha ati, “Nciinzhi ncimwaakuzumanicizhanya abo?”

¹⁷ Umwi mulombwana waakuli munkamu wakamwiingula ati, “Mwiiyi, ume ndaleta mwanangu, uunjililwe moza mubiyabi uumukasha kwaamba.

¹⁸ Kufwumbwa ciindi nuumunjila, ulamucina anshi. Ulahwa iyohu ku mulomo ukuluma inkwino, umubili ulazuma ntaa. Inzho ndaakulombele ba shiciiya bako kwaamba batande moza mubiyabi, pele bakakacilwa.”

¹⁹ Jeso wakabuzha ati, “Akaka umwe nubantu bayina lushomo, anu nciindi cilamfwu buti nciinkakala amwe? Anu cilampe buti ciindi ncinkakala amwe? Amumulete kono kwangu!”

²⁰ Ngoonaawo bakamuleta kwa Jeso. Moza mubiyabi mbuwakamubonena bulyo Jeso wakakanka kumuzhangamya mwana, amane wakawa anshi ukwaalabana, wakakanka kukusha iyohu ku mulomo.

²¹ Jeso wakamubuzha ushi mwana ati, “No ceci cakamukanka liliye?” Ushi wakaamba ati, “Kuhwa ciindi nakaakuli mwana mushoonto.

²² Shiindi shinji shinji wezu moza mubiyabi koozanda kumuyaya koomucinina u mulilo nimuba mu meenzhi. Pele na kuti kuli ncuukonzha kucita twalomba tufwile luse utuyohwe.”

²³ Jeso wakaamba ati, “Anu ‘Na ulakonzha,’ caambaanzhi? Shintu shoonse shilakonzha kuba ku muntu uushoma.”

²⁴ Ngoonaawo ushi mweembezhi wakapozomoka ati, “Ndashoma, pele ndakulomba ati unjohwe nzunde kutashoma kwangu!”

²⁵ Jeso naakabona ati bantu banji banji baswena afwaafwi aawo ngakaakubele, wakoolemanina moza mubiyabi waakuli mu mweembezhi ati, “Uwe u moza utateeleli uushicintaamba muhwe mu mwana, ulimwi utakenjili mo linji!”

²⁶ Inzho moza mubiyabi wakakwiila, wamucina anshi wahwa wamushiya uliwizucile, cakuti bantu bakaamba ati, “Wafwa.”

²⁷ Pele Jeso wakamukwata kwitashi wamubusha wazhima.

²⁸ Jeso naakanjila muŋanda, ba shiciiya bakwe bakamubuzha kumabali ati, “No nkaamboonzhi uswe twakacilwa kuukusha moza mubiyabi?”

²⁹ Jeso wakabaingula ati, “Kukomba bulyo nkukukonzha kukusha moza mubiyabi uli bolya.”

Jeso Waamba Ulimwi Makani a Lufwu Lwakwe

³⁰ Jeso u ba shiciiya bakwe nibakakuhwa koko, bakaita mucishi ca Galilaya. Jeso katazanda kwaamba ati kube muntu naaba womwi uuzhiba nkwaabele,

³¹ kaambo wakaakuyiisha ba shiciiya bakwe ati, “Mwanaa Muntu ulakaabwa ku bantu, balakamuyaya, pele nikuba bobo mu buzuba bwatatu ulakabuka ku bafwu.”

³² Pele balo bayina nibakakuteelelesha kuyiisha koku, ulimwi bakatiya kumubuzha.

Nguni Mukando

³³ Inzho Jeso u ba shiciiya bakwe bakashika ku munzhi wa Kapenaumi, nibakenjila muŋanda, Jeso wakababuzha ba shiciiya bakwe ati, “No ncinzhi ncimwaakuzumanicizhanya munzhila?”

³⁴ Balo bakaliinza bulyo, kaambo kakuti munzhila kabeza buzumanicizhanya makani akuti, nguuliye mukando akati kabo.

³⁵ Jeso wakakala anshi, wabeta ba shiciiya bakwe bali ikumi ubatwesha bobile, amane wabaambila ati, “Kufwumbwa uuzanda kuba mutaanzhi akati kenu ulyeelele kuba mushaalizhi, abe mutwanga wa bantu boonse.”

³⁶ Inzho Jeso wakabweza kana wakabika akati kabo, wakabukata wabaambila ati,

³⁷ “Kufwumbwa uutambula kana kali ukoya kaka mwizhina lyangu ati ndime atambula. Ulimwi kufwumbwa uuntambula tatambuli bulyo ume pe, pele ulamutambula u wezo wakantuma.”

Kufwumbwa Utatukazha ati Munamuzeesu

³⁸ Johani wakamwaambila Jeso ati, “Mwiiyi, twakabona umwi muntu ulakusha myoza mibiyabi mwizhina lyako, inzho twakamukasha, nkaambo tali munayisha.”

³⁹ Jeso wakaingula ati, “Mutamukasha pe, kaambo kwiina muntu uucita maleele mwizhina lyangu uukonzha kunsandumucila ukufwambaana kumbishizha.

⁴⁰ Nkaambo kufwumbwa uutali shinkondonokwesu ati ngwesu.

⁴¹ Amuzhibe ati kufwumbwa muntu uumupa inkapu ya meenzhi aakunwa ukaambo kangu, wezo muntu ulakatambula boonzo.

Kutepaulwa ku Cibi

⁴² “Pele kufwumbwa ukaafwumpuzha umwi wa bashoonto baba ba shoma kwaamba abishe, wezo cilabota kwaamba waangwa ikangabwe munshingo ukuwaalwa mukankuni ka lwaatele.

⁴³ Ubobo kuti na itashi lyako lyakupa kubisha, likosole! Nkaambo ncibotu kwaamba ukanjile mu bumi butamana ulibulizhizhe kubaazha kuwaalwa mwibibi lya mulilo uutamana kukwete matashi obile.

⁴⁴ Mwalo momo maseni aabo mwaatafwi, ulimwi mulilo muutazhimi.

⁴⁵ Ulimwi na cituta cetende lyako cakufwumpuzha ucikosole, ncibotu kunjila mu bumi butamana ulibulizhizhe kubaala kuwaalwa mwibibi lya mulilo uutamana kukwete shituta shobile.

⁴⁶ Mwalo momo maseni aabo mwaatafwi, ulimwi mulilo muutazhimi.

⁴⁷ Ulimwi kuti na linso lyako lyakupa kubisha lilobole. Nkaambo ncibotu kwaamba ukanjile mu bumi bwa Leza ucimbolyo, kubaala kwaamba ukasowelwe mwibibi lya mulilo uutamana u menso obile.

⁴⁸ Mwalo momo maseni aabo mwaatafwi, ulimwi mulilo muutazhimi.”

⁴⁹ “Nkaambo ukoya cakulya mbucilungwa mwino, mbubona bobo amwe mbumukaalulamikwa u mulilo wamapenzhi.

⁵⁰ Mwino mubotu, pele kuti naa mwino wasampuka, no ulalungwa buti? Amube umwino mukati kenu, ulimwi amukale muluumuno ubeenzhinokwenu.”