Maako 7 - Izwi lya Leza

Tunshiyanshiya Twabashaakale

¹ Ba Falisi u balembi bamwi bakahwa ku Jelusalemu bakeza kubungana kwa Jeso.

² Inzho nibakabona kwaamba ba shiciiya bakwe bamwi balalya shakulya u matashi aatasalali, nkukuti bayina nibakasamba kumatashi kwiingaina uciyanza caba Falisi ncibaakucita kwaamba bantu basalale.

³ Nkaambo ba Falisi antoomwi u ba Juda kabacilila lwiiyo lwa ba shaakale. Kabatankozha kulya cita basamba kumatashi kwiingaina uciyanza cabo.

⁴ Ulimwi tabakonzha kulya cintu cuulwa amushika, cita bacisalazhe bweelele. Nkwiili iimwi milawo yaba shaakale njibakaakucilila, iili ukoya yakusanzha inkapu, shibiya, mitiba yamukuba ukusalazha malo.

⁵ Ubobo ba Falisi u balembi bakamubuzha Jeso ati, “Nkaamboonzhi ba shiciiya bako tabacilila tunshiyanshiya ntutwakatambula kuhwa kuba shaakale besu, tabatondi balalya butasambile kumatashi?”

⁶ Jeso wakabaingula ati, “Anu Aizaya wakalulika nakashinshima kaambo kenu! Nkaambo muli bashikuupaupa amenso, ngaaza ngakalemba ati, “baba bantu balandemeka umilomo yabo, pele myonzo yabo ili kulaale ame,

⁷ Kupaila kwabo nkwabulyo, balayiisha tunshiyanshiya twa bantu ukoya shiiyo shaka Leza!”

⁸ Ulimwi Jeso wakabaambila ati, “Milawo ya Leza mweesowa, mwakwatisha tunshiyanshiya twa bantu.”

⁹ Inzho wakabashimwina ati, “Mulasusha milawo ya leza kwaamba mucite milawo yatunshiyanshiya twenu.”

¹⁰ Mozesi wakamulailila ati, “Lemeka uso u banoko, Ulimwi Kufwumbwa wezo uusampaula ushi naa baina ulyeelele kufwa.”

¹¹ Pele umwe mulaamba ati, Naa muntu kakwete cakupa ushi naa baina amana waamba ati, “Wezu ngu Kolobani,” caamba ati ceci nca Leza,

¹² mulahuminya muntu wezo kutayohwa ushi u baina.

¹³ Ubobo mwaliubausha izwi lya Leza kwiitila mutunshiyanshiya twenu. Ulimwi nkushili ushimwi shintu shinji shinji shili bolya nshimucita.

Shintu Shisofwaazha Muntu

¹⁴ Inzho waketa bantu banji banji kwaamba bazhize kwakwe, amane wakabaambila ati, “Amuteelele ncinzanda kumushimwina.

¹⁵ Ucinjila mu muntu tacimusofwaazha pe, pele ceco cihwa mukati ncicimusofwaazha muntu.

¹⁶ Wezo uukwete matwi naateelele.”

¹⁷ Inzho Jeso naakabashiya bantu wakanjila muŋanda, ba shiciiya bakwe bakamubuzha kwaamba apandulule makani aakashimpi.

¹⁸ Jeso wakaingula ati, “Anu amwe mwiina ncimwizhi. Sa tamwizhi ati kwiina cintu cinjila mu muntu kuhwa ansengwe cikonzha kumusofwaazha?

¹⁹ Nkaambo tacinjili mu monzo wakwe pele cilaya mwifwu, camana cahwa mu mubili.” Mu kwaamba bobo Jeso wakasalazha shilyo shoonse.

²⁰ Ulimwi wakabashimwina ati, “Ucihwa mu muntu ncicisofwaazha muntu.

²¹ Nkaambo mukati kamuntu, mu monzo wakwe, mumuhwa mizeezo mibiyabi iipa kwaamba muntu ebe, ayaye,

²² acite mamambe umakanze mabiyabi oonse, bubeshi, mambonwa, lutuzhi, matushi, kulikumbuzha ubulimbushi.

²³ Shoonse shibiyabi sheshi ushihwa mukati nshishisofwaazha muntu.”

Lushomo lwa Mukaintu Umwi

²⁴ Inzho Jeso naakakuhwa koko wakaya kumashi a Taya u Sidoni. Wakenjila muŋanda katazanda kwaamba bantu bazhibe ati nkwaali. Nikuba bobo katakonzha kuzuba, bantu bakazhiba ati mwaali muŋanda.

²⁵ Ngoonaawo mukaintu umwi wakaakukwete mwana mushimbi uunjililwe moza mubiyabi naakateelela ati Jeso mwaali muŋanda, wakeza wamufwukamina.

²⁶ Mukaintu wezu kali muhwamashi wamushobo waci Giliki kahwa ku Fonisiya mucishi ca Siliya. Wakamulomba Jeso kwaamba atande moza mubiyabi kuhwa mu mwanakwe.

²⁷ Inzho Jeso wakamwaambila ati, “Atutaangune kusanina bana, kaambo tacili cibotu kunanga bana cakulya ukuciwaala kubabwa.”

²⁸ Mukaintu wakaingula ati, “Ncini cini Mwami, ubabwa balabwezelela ukulya bufwefwelenga buwila anshi kuhweetebulu!”

²⁹ Ngoonaawo Jeso wakamwiingula ati, “Waamba kabotu, ukaambo kamazwi ako aza bweela kwako, moza mubiyabi wamuhwa mu mwanako.”

³⁰ Ngoonaawo mukaintu wezo wakapiluka kunganda yakwe weza kuyana mwanakwe ulilele abulo, u moza mubiyabi wamuhwa kale.

Jeso Wamuponya Cimpama Shikalenda

³¹ Jeso naakapiluka kuhwa ku cishi ca Taya, wakaita mu munzhi wa Sidoni ku lwaatele lwa Galilaya, wakaita akati kaminzhi Dekapoli.

³² Inzho bamwi bantu bakamuletela cimpama shikalenda, bakamulomba Jeso kwaamba amuponye, amwaampe itashi lyakwe.

³³ Jeso wakamukusha abuleya wamutola kumabali, watunga minwe yakwe mu matwi a muntu wezo. Wakafwila mate amane wamulamba amulaka.

³⁴ Ngoonaawo wakalyaalala kwizeulu walishinshimucila ukupozomoka ati, “Efata,” nkukwaamba ati, “Shinkuka.”

³⁵ Ngoonaawo matwi a muntu wezo akashinkuka ndilyona ukalenda kakakosoka, wakakanka kwaamba kabotu.

³⁶ Inzho Jeso wakabalailila ati batashimwini muntu naaba womwi, pele nikuba ati wakabakasha, balo bakatola impuwo kumbele.

³⁷ Bakazoowa cini cini kuyana ati shintu shoonse kashilulamika. Bakaamba ati, “Bacimpama balamuteelela, ubashicintaamba balaamba!”