Maako 6 - Izwi lya Leza

Jeso Bamukaka ku Nazanleta

¹ Nakahwa koko, Jeso wakaya kubanamuzhaabo ku Nanzaleta, ba shiciiya bakwe bakamucilila.

² Mu buzuba bwa Sabata wakakanka kuyiisha mucikombelo caba Juda. Kamuli bantu banji banji, inzho nibakateelela kuyiisha kwakwe, boonse bakankamana bulyo. Bakanka kubuzhanya ati, “No wezu muntu wakeeyanakwi injiisho iili bolya? Mbusongonzhi bobu mbwaakwete? Uleecita buti yezhi milimo itondezha insana?

³ Sa ingwe mwanakwe Maliya, munina Jemusi, u Joze u Judasi u Saimoni? Inta abo bakaintu banina tuli abo.” Ubobo bakamukaka.

⁴ Jeso wakabaambila ati, “Mushinshimi wa Leza ulalemekwa kumasena oonse, cita bulyo mucishi ca kwabo, aakati kabasazhiina ubamukowa wakwe mwini.”

⁵ Katalozha kucita milimo yamaleele iitondezha insana, cita bulyo kwaampa matashi abantu bashoonto bulyo bakaakuli balwazhi mbaakaponya.

⁶ Jeso wakazoowa ukaambo kakuzuluzha kwabo. Inzho Jeso wakaya akati kaminzhi kuya buyiisha bantu.

Jeso Mbwaakatuma ba Shiciiya bali Ikumi Ubatwesha Bobile

⁷ Waketa ba shiciiya bakwe bali ikumi ubatwesha bobile, wakabatuma bobile bobile. Wakabapa insana shakutanda myoza mibiyabi,

⁸ wakabalailila ati, “Mutabwezi niciba cintu comwi cakutolelezha mulweendo lwenu, niciba cinkwa, niiba inkomo yakusempwila, naaba mali mushikwama shenu, cita bulyo musako wakweenzha.

⁹ Musame bulyo impato, mutabwezi cikobelo cimwi kuleka cili a mubili.”

¹⁰ Ulimwi wakabaambila ati, “Mukabaalile kufwumbwa muŋanda mubakaamutambula kabotu mwamana mukakale mo kushicila mukamuhwe mu munzhi momo.

¹¹ Kufwumbwa nkubakaakaka kumutambula, nikuba kumuteelela, mukalikunkumune lufwuko luli kumatende enu mukabashiye. Lufwuko lolu cilakaba cicenjezho nkubabele.”

¹² Ngoonaawo ba shiciiya bakaya balaya bukambaucila bantu kwaamba basanduke ku shibi shabo.

¹³ Bakatanda myoza mibiyabi minji minji, ukunanika balwazhi banji banji mafwuta a oliva ukubaponya.

Lufwu lwa Johani Mupapatizhi

¹⁴ Inzho mwami Helodi wakateelela makani akaakwaambwa ukaambo kakuzandaala kwampuwo imbotu ya Jeso. Bamwi bantu kabaamba ati, “Johani Mupapatizhi wabuka ku bafwu! Ncakwete insana shakucita maleele.”

¹⁵ Pele bamwi bakaamba ati, “Ngu Elija.” Abo bamwi ati, “Mushinshimi, uuli ukoya uumwi wabashishimi bakale kale.”

¹⁶ Helodi naakateelela bobo wakaamba ati, “Ngu Johani Mupapatizhi ngundakakosozha mutwi, wabuka ku bafwu!”

¹⁷ Mwami Helodi mwini lwakwe nguwakatuma kwaamba Johani aangwe ukubikwa muntolongo. Wakamwaangila kaambo ka Helodiyasi wakaakuli muka Filipo munina, wezo ngwakatwala Helodi.

¹⁸ Nkaambo kakuti Johani Mupapatizhi wakamwaambila Helodi ati, “Taciluleme ku mulawo kwaamba uwe umutwale muka munyoko.”

¹⁹ Ceco ncicakapa ati Helodiyasi akwate inkoto yakuzanda kuyaya Johani, pele katalozha ukaambo ka Helodi.

²⁰ Helodi kamutiya Johani nkaambo kamwizhi ati kali muntu uululeme, ulimwi uusalala. Ubobo wakamukobelela. Kacita ati amuteelela wapenga ku monzo. Pele nikuba bobo kazandisha kumuteelela.

²¹ Bumwi buzuba Helodiyasi wakamulya coolwe Johani. Kabuli buzuba Helodi nakacita ipobwe lyakusecelela kuzhalwa kwakwe, wakatamba boonse bakando bakando mubulelo bwakwe, ubakando balumamba, u basololi baku Galilaya.

²² Ciindi mushimbi mwanakwe Helodiyasi naakanjila mubaakubele kwiza kuzhanina Helodi ubeenzu bakwe, kuzhana kwakwe kwakababotela boonse bakaakulya ipobwe. Ngoonaawo mwami Helodi wakamwaambila mushimbi ati, “Nciizhi ncuuzanda? Ndakupa kufwumbwa ncuuzanda.”

²³ Helodi wakapinga ati, “Kufwumbwa ncuukalomba ndakupa, nikuba kukosola cishi cangu akati.”

²⁴ Mushimbi wakaya kubuzha kwa baina ati, “No nkalombeenzhi?” Baina wakamwaambila ati, “Ukalombe mutwi wa Johani Mupapatizhi.”

²⁵ Ndilyona mushimbi wakapiluka ku mwami ca kufwambaana walomba ati, “Ndazanda umpe mutwi wa Johani Mupapatizhi mu mutiba inzho bolya.”

²⁶ Inzho mwami wakatompocelwa, pele katacikonzha kukaka kaambo wakapinga ku bushu bwabeenzu boonse bakeza kwipobwe.

²⁷ Ndilyona ndilyona mwami wakatuma umwi mulindilinzhi wantolongo kuya kumukosola mutwi Johani Mupapatizhi. Mulindilizhi wezo wakaya kuntolongo wamukosola mutwi Mupapatizhi.

²⁸ Wakooleta mutwi wa Johani amutiba wamupa mushimbi, mushimbi wakoopa baina.

²⁹ Ba shiciiya baka Johani nibakateelela bakeza kubweza mubili, baya kuuzhika.

Jeso Mbwaakasanina Bantu bali Shuulu Shosanwe

³⁰ Inzho batumwa nibakapiluka nkwaakaakubatumine Jeso bakabungana antoomwi u Jeso bakamushimwina shoonse nshibakacita u kuyiisha.

³¹ Kakuli bantu banji banji, bamwi kabeza bamwi balaya, ubobo Jeso u ba shiciiya bakwe bakabula ciindi cakulyoocezha ukulya. Inzho Jeso wakabaambila ati, “Katuya tuyane busena bwakulyoocezhizha nkutukonzha kuba tubeni ciindi cishoonto bulyo.”

³² Bakacila mu bwato kwaamba baye kubusena buliibile.

³³ Inzho bantu banji banji bakababona nibakaakuya ulimwi bakabazhiba. Bantu bakaya lubilo babacingauzha kuhwa mu minzhi yoonse, bakataanguna kushika kubusena koko Jeso u ba shiciiya bakwe kabatana kushika.

³⁴ Jeso nakamuhwa mu bwato, wakabona bantu banji banji, wakabafwila inkumbu nkaambo kabali ukoya imbelele shiina mweembezhi. Wakakanka kubayiisha shintu shinji shinji.

³⁵ Izuba nilyakaakuzanda kubila, ba shiciiya bakeza kwakwe bamwaambila ati, “Ciindi camana, ulimwi kono nkutubele nkukwisokwe.

³⁶ Baambile bantu baye mu minzhi u masena ali afwaafwi kwaamba bakalyuulile shakulya.”

³⁷ Jeso wakabaingula ati, “Ndimwena umwe noombape cakulya.” Ba shiciiya bakamubuzha ati, “Sa ulazanda kwaamba tuukuya tukaule shinkwa sha mali ali myaanda yobile kwaamba tusanine bantu baba?”

³⁸ Jeso wakababuzha ati, “No mulikwete shinkwa shongaye? Kamuya mubone.” Nibakezhiba, wakabaambila ati, “Shili shosanwe iinswi shobile.”

³⁹ Ngoonaawo Jeso wakabaambila ba shiciiya bakwe ati babakalice bantu anshi mu mweenhu mutukamu tukamu.

⁴⁰ Bakabakalika umbona bobo. Bakakala mutubunga twamyaanda ulimwi umutubunga twamakumi osanwe.

⁴¹ Jeso wakabweza shinkwa shosanwe iinswi shobile, walyaalala mwizeulu, walumba Leza amane washikomauna wabapa ba shiciiya kwaamba babaabanye bantu, asho inswi bakashaabanya mbubona bobo.

⁴² Inzho boonse bakalya bakekuta.

⁴³ Ba shiciiya bakabwezelela bufwefwelenga bwashinkwa ubwanswi bwakashaala, bwakezuzha ikumi lya ntundu iintundu shobile.

⁴⁴ Bantu bakalya kabali shuulu shili shosanwe shabalombwana.

Jeso Weenda Ameenzhi

⁴⁵ Ngoonaawo Jeso wakalailila ba shiciiya bakwe ati banjile mu bwato basolole kuya ku Betisaida, walo wakashaala kwaamba aambile bantu ati bapiluke.

⁴⁶ Amane kulazha wakaya ku lupili kuya kukomba.

⁴⁷ Kube kumangolezha nikwakashiya anshi, bwato kabusacene akati ka lwaatele lwa Galilaya, pele walo kacili ku mulando ice.

⁴⁸ Jeso wakabona ati ba shiciiya bakwe bali u mapenzhi aakushika bwato kaambo muuwo wakaunjisha. Akati kamashiku Jeso wakeza nkubaakubele uleza bweenda ameenzhi.

⁴⁹ Nibakamubona uleza bweenda ameenzhi, bakakwiila kabazunga ati ambweni moza mubiyabi.

⁵⁰ Boonse bakatiya nibakamubona. Ngoonaawo Jeso wakabaambila ati, “Amwiikwate myonzo! Mutatiyi Ndime!”

⁵¹ Amane wakanjila mu bwato mubaakubele. Ndilyona muuwo wakaliinza. Ba shiciiya bakazoowa cini cini.

⁵² Maleele akusanina shinkwa bantu bali shuulu shosane bayina ukaateelelesha ukaambo kakutashoma.

Jeso Waponya Balwazhi ku Jenesaleti

⁵³ Jesu u ba shiciiya bakwe nibakalanduka lwaatele bakashoka ukwaanga bwato a mulando waku cishi ca Jenesaleti.

⁵⁴ Mbubakahwila bulyo mu bwato, ndilyona bantu bakamuzhiba Jeso.

⁵⁵ Bantu bakaindingana cishi coonse bakakanka kubweza balwazhi ukubatola kufwumbwa nkubakateelela ati nkwaabele Jesu, ukubooneka a minseme.

⁵⁶ Kufwumbwa bulyo koko Jeso nkwakaita, u minzhi uumatungu, bantu kababweza balwazhi babo ukubatola kumushika, bakamulomba kwaamba abaampe nikuba kukwata bulyo kushikobelo shakwe. Ubobo boonse bakamukumya, bakapona.