Maako 5 - Izwi lya Leza

Jeso Mbwaakaponya Muntu Waakunjililwe Moza Mubiyabi

¹ Jesu u ba shiciiya bakalanduka lwaatele lwa Galilaya bakashika mucishi ca Bagelasini

² Jesu mbwaakahwila bulyo mu bwato, wakaswaangana umuntu wakahwa kunamaumbwe. Muntu wezu kanjililwe moza mubiyabi.

³ Ulimwi kakala kunamaumbwe. Kakwiina wakaakulozha kumwaanga niiba inceetani.

⁴ Nkaambo kufwumbwa ciindi nibakamwaanga ku maulu ukumatashi kashikosaula inceetani iinshimbi. Kakwiina waakulonzha kumubombya pe.

⁵ Mashiku u muunza kakala kunamaumbwe, u kuya bweendeenda umapili kaya bupozomoka ukulinengaula mabwe.

⁶ Mbwaakamubonena Jeso alaale, wakamulukancila wafwukama kumbele kwakwe.

⁷ Wapozomoka iizwi ikando ati, “Ulazanda kuncita buti uwe u Jeso mwana Leza mukandosha? Ndakukomba mwizhina lya Leza utampenzha!”

⁸ Wakaamba bobo kaambo Jeso kamushimwinine kale ati, “Uwe u moza mubiyabi, muhwe mu muntu wezu!”

⁹ Inzho Jeso wakamubuzha ati, “No ndiweni izhina lyako?” Wakaingula ati, “Ndime Inkamu, kaambo tuli banji banji.”

¹⁰ Moza mubiyabi wakamukumbila Jeso kwaamba ati, atotandi mucishi.

¹¹ Inzho kubusena koko kakuli butanga bwa ngulube shakaakucela afwaafwi kumbali ku lupili.

¹² Myoza mibiyabi yakamukumbila Jeso ati, “Tutume mu ngulube tukashinjile.”

¹³ Jeso wakeehuminya. Ubobo myoza mibiyabi yakahwa mu muntu wezo yaya kunjila mu ngulube. Butanga boonse bwa ngulube shili shuulu shobile bwakalukanka bwaya kuliwaala amukonka bwawila mu lwaatele bwafwa.

¹⁴ Beembezhi bangulube bakalukanka baya u minzhi uumatungu oonse balaya butola makani aza. Bantu bakaya kubona cakacitika.

¹⁵ Nibakashika kwa Jeso, bakayana mulombwana wakaakunjililwe inkamu ya myoza mibiyabi ulishiticile ulimwi ulyeenzene, ceci cakabatizha.

¹⁶ Babo bakalibonena cakacitika ku mulombwana wakaakunjililwe myoza mubiyabi u makani a ngulube, mbubakaya kubashimwina bantu.

¹⁷ Inzho bakakanka kumulomba Jeso kwaamba amuhwe mucishi cabo.

¹⁸ Jeso naakanjiila mu bwato, mulombwana wezo wakakushiwa myoza mibiyabi wakamulomba Jeso kwaamba baye aze.

¹⁹ Pele Jeso wakamukasha, wakamwaambila ati, “Koya ku munzhi kubasazhinoko, ukabaambile shoonse shizoosha nshaakucitila Mwami Leza ulimwi umbwaakufwila luse.”

²⁰ Inzho wakayita mucishi citewa ati Minzhi iili ikumi, ulaya bukanana ncaakamucitila Jeso. U bantu boonse bakazoowa.

Mwanakwe Jailosi u Mukaintu Wakakwata Jeso Kucikobelo

²¹ Jeso wakalanduka ulimwi kumutala wa lwaatele, koko nkwakayana ibunga lyabantu mbubakaswaangana abo a mulando.

²² Inzho umwi wabeendelezhi ba cikombelo caba Juda, utewa ati Jailosi wakeza kwa Jeso, ashike wamufwukamina.

²³ Wakamulombesha cini cini ati, “Mwanangu mushimbi mulwazhi ca lufwu, ndakulomba kweza kuŋanda ukamwaampe itashi kwaamba apone abe kabotu.”

²⁴ Inzho Jeso wakaya u Jailosi. Ikamu lyabantu lyakamucilila, lilaya bulimbana.

²⁵ Kakuli mukaintu mulwazhi wakaakusata bulwazhi bwakuhwa bulowa, bwakamupenzha kumyaka iili ikumi u myaka yobile.

²⁶ Bashilishi banji banji bakasoleka kumushilika pele bakakacilwa, u lubono lwakwe loonse lwakamana pele bulwazhi bwakaakuya bulyo kumbele.

²⁷ Wakeeteelela impuwo ya Jeso, ubobo wakamucilila munkamu.

²⁸ Wakatelaika mu monzo wakwe ati, “Kufwumba ndacikwata cisani cakwe ndapona.”

²⁹ Wakacikwata cisani ca Jeso, ngoonaawo bulowa bwakacileka kuhwa, ulimwi wakaliteelela kabotu umubili wakwe kwaamba wapona.

³⁰ Aze Jeso wakashiteelela insana kwaamba shamuhwa mu mubili wakwe. Ubobo wakabacebuka bantu bakaakumuzhingulucile wababuzha ati, “No nguni wankwata kucikobelo cangu?”

³¹ Ba shiciiya bakwe bakamwiingula ati, “Ulibabwene bantu mbubakuzhingulucile, no ulaamba buti ati nguni wankwata?”

³² Pele Jeso wakaakucicebauka kwaamba amubone wamukwata.

³³ Inzho mukaintu wakazhiba cakamuciticila, wakatiya wazhangama, wakafwukama wamwaambila Jeso makani oonse calushinizho.

³⁴ Jeso wakamwaambila ati, “Mwanangu lushomo lwako lwakufwula, koya muluumuno ukapone kubulwazhi bwako.”

³⁵ Jeso nakaakucaambila mukaintu wezo, Kwakashika batume bakahwa kuŋanda yaka Jailosi baamba ati, “Mwanako wafwa kale. No ucimupenzhenzhaanzhi Mwiiyi?”

³⁶ Pele Jeso wiina nakashibicila matwi shesho nshibakaamba, wakashimwina mukando wa cikombelo caba Juda ati, “Utatiyi pe, kushoma mwa Leza.”

³⁷ Kwiina muntu uunji Jeso ngwaakahumizha kwaamba amushindicile, cita bulyo Pita, Jemusi u Johani munina.

³⁸ Naakashika kuŋanda ya mweendelezhi wa cikombelo caba Juda, Jeso wakayana iyowe, kulila u koomoka.

³⁹ Naakanjila, wakabaambila bantu ati, “Nkamboonzhi ncimucita ito u kulila bolya? Mwana wezu tafwile uloona.”

⁴⁰ Nibakateelela bobo, bakamuseka. Ngoonaawo wakabatandila ansengwe boonse. Wakatola bulyo ushi u baina u ba shiciiya botatwe muŋanda mwaakuli mutunta wa mwana.

⁴¹ Wakakwata itashi lya mushimbi wamwaambila ati, “Talita kumi,” nkukwaamba ati, “Mushimbi! Ndakwaambila ati, buka!”

⁴² Ndilyona mushimbi wakabuka, wazhimuka wakanka kweendeenda. Kakwete myaka iili ikumi u myaka yobile. Bantu bakazoowa cini cini.

⁴³ Wakabashimwinisha ati bataambila muntu naaba womwi kuli ceci cakacitika, amane wabashimwina ati bamupe cakulya mwana alye.