Maako 3 - Izwi lya Leza

Jeso Mbwaakaponya Muntu Uupuutile Itashi

¹ Ulimwi Jesu wakanjila mucikombelo caba Juda, momo kamuli muntu wakaakupuutile itashi.

² Kamuli u bantu bamwi bakaakuzanda kupa mulandu Jeso, ubobo bakamulanjisha kwaamba babone na ulamuponya muntu wezo mu buzuba bwa Sabata.

³ Jeso wakamwaambila muntu wezo wakaakupuutile itashi ati, “Kweza kono kumbele.”

⁴ Amane Jeso wakababuzha bantu ati, “No mulawo wesu ulatuhumizha kucitaanzhi mu buzuba bwa Sabata? Kuyohwa bantu naa kubazonauna? Kufwutula bumi bwa muntu na kumuyaya?” Pele balo bakaliinza bulyo.

⁵ Inzho wakabalanjilila ca bukali, wakausa kaambo kabupapyu bwabo. Wakaambila muntu wezo ati, “Hungulula itashi lyako.” Naakalihungulula lyakaba kabotu.

⁶ Inzho ba Falisi bakamuhwa mucikombelo caba Juda baya kuswaangana ubamwi bakabunga kaba Helodiyani kwaamba bayane inzhila yakumuyaya Jeso.

Bantu Banji Banji ku Lwaatele

⁷ Jeso u ba shiciiya bakwe bakaya ku lwaatele lwa Galilaya, inkamu ya bantu yakamucilila. Bamwi bakahwa mucishi ca Galilaya, umucishi ca Judiya,

⁸ umu Jelusalemu, umucishi ca Idumeya kumutala wa lweenje lwa Joodani umuminzhi ya Taya u Sidoni. Baba bantu bakeza kwa Jeso nibakateelela shintu shinji shinji shizoosha nshaakaakuya bucita.

⁹ Ukaambo kakuhula kwa bantu, Jeso wakaambila ba shiciiya ati bamubambile bwato kwaamba bantu batamushaanicizha.

¹⁰ Nkaambo wakaponya bantu banji banji, ubobo balwazhi kabatonkana kwaamba bamukumye.

¹¹ Ubakaakunjililwe moza mubiyabi kufwumbwa bamubona kabawila anshi kumbele kwakwe bakwiila ati, “Ndiwe Mwana Leza.”

¹² Pele Jeso wakabashinka moza mubiyabi kwaamba batamuzubululi.

Jesu Wasala Batumwa bali Ikumi u Batumwa Bobile

¹³ Inzho Jeso wakaliza alupili, waketa mbaakazanda mwini. Bakeza kwakwe,

¹⁴ inzho wakasala bali ikumi ubatwesha bobile kwaamba abe abo, wakabaulika ati mbatumwa. Wakabaambila ati, “Ndamusala kwaamba mube ame, nkamutume kuya kukambauka.

¹⁵ Mulakakwata insana shakukusha myoza mibiyabi mubantu.”

¹⁶ Mbubaba mbaakasala bali ikumi ubatwesha bobile, Saimoni walo Jeso ngwaakaulika ati Pita,

¹⁷ Jemusi u munina Johani, banakwe Zebedi, babo Jeso mbaakaulika ati Bowanejesi, ucipandulula ati bana bamakali,

¹⁸ Andulu, u Filipo, u Basolomeyo, u Matayo, u Tomasi, u Jemusi mwanakwe Alufeyasi, u Tadayasi, u Saimoni, wakaakuli mulondo,

¹⁹ u Judasi Shikalioti shikumwaaba.

Jesu Bamwita ati ngu Belizebule

²⁰ Inzho Jeso wakenjila muŋanda, ulimwi bantu banji banji bakamubunganina cakuti Jeso u ba shiciiya bakwe bakabula ciindi cakulya.

²¹ Basazhiina Jeso nibakateelela bobo bakaya kwaamba bakamukwate, kaambo bamwi bantu bakaakwaamba ati, “Wasondoka!”

²² Inzho bamwi balembi bakahwa ku Jelusalemu bakaamba ati, “Wenjilwa Belizebule mwami wa myoza mibiyabi nguumupa insana shakubakusha.”

²³ Ngoonaawo Jeso wakabeta bantu wabaambila mushikozhano ati, “Mbubuti Shaatani mbwaakonzha kukusha Shaatani?

²⁴ Kuti cishi caandaana mu shipanzha, camana cakanka kulilwisha cini, ceco cishi cilawa.

²⁵ Kuti mukowa waandaana mutubunga u kukanka kulilwisha ungamukamwini, wezo mukowa ulazundika.

²⁶ Kuti bulelo bwa Shaatani bwalyaandaanya mutubunga, tabukala pe, bulazundwa ukumana.

²⁷ “Kwiina uukonzha kunjila muŋanda ya muntu shinsana ukumunanga lubono, cita wataanguna kumwaanga wezo shinsana, na ati walozha kumunanga shoonse shili muŋanda yakwe.

²⁸ “Cini cini ndamushimwina ati bantu balakonzha kulecelelwa shibi shoonse nshibakacita nishiba shakusampaula Leza.

²⁹ Pele muntu wezo usampaula Moza Usalala takalecelelwa, kaambo wacita mulandu uutabi kulecelela.”

³⁰ Jeso wakaamba bobo kaambo kakuti, bamwi bakaamba ati, “Ulinjililwe myoza mibiyabi.”

Baina Jesu u Banina

³¹ Inzho baina Jeso u banina, bakeza kuzhima ansengwe. Bakatuma muntu kwaamba amwite.

³² Inzho bantu banji banji mbucaakushite u Jeso bakamushimina ati, “Nguwelya banoko ubanyoko ansengwe, balakwita.”

³³ Jeso wakabaingula ati, “Anu nguni bama u bakwesu?”

³⁴ Amane wakabacebauka bakaakumuzhingulukile waamba ati, “Amubone, mbubaba babama u bakwesu!

³⁵ Kufwumbwa uucita luzando lwa Taata ngumukwesu, ulimwi ngu bama.”