Maako 2 - Izwi lya Leza

Jeso Waponya Mulema

¹ Nikwakaita mazuba mashoonto, Jeso wakabweela ku munzhi wa Kapenaumi, impuwo yakuti mwaali mu munzhi yakazuwa.

² Bantu banji banji bakeza kubungana koko, iŋanda yakezula bantu bakaata. Jeso wakabakambaucila makani mabotu.

³ Naakaakucikambauka, kwakashika bantu bone bakamuletela mulema ngubakaakuzemwine amacila.

⁴ Inzho ukaambo kakuhula kwa bantu, bakakacilwa kumushisha afwaafwi u Jeso. Ubobo bakahumbula lululi lwa ŋanda kwanzanana awo ngaakaakubele Jeso. Bakaselusha macila ngaakaakulele mulema cakwaalengezha kuntambo.

⁵ Jeso naakabona lushomo lwabo, wakaambila mulema ati, “Mwanangu, shibi shako shalecelelwa.”

⁶ Bamwi balembi bakaakuliwo awo bakakanka kulibuzha mu myonzo ati,

⁷ “Nkaamboonzhi wezu muntu ncaasampulila Leza bolya? Kwiina muntu uukonzha kulecelela shibi shabantu cita Leza mwini ice.”

⁸ Pele Jeso wakazhiba ncibakaakutelaika, amane wakababuzha ati,

⁹ “Nciciliye cizumu, kwaamba shibi shako shalecelelwa naa ati buka bweza macila ako uyende?

¹⁰ Pele ndazanda muzhibe kwaamba ati, Mwanaa Muntu ulikwete insana ano anshi shakulecelela shibi.” Jeso wakamwaambila mulema ati,

¹¹ “Zhimuka, bweza macila uukuya kwako!”

¹² Wakabweza macila akwe ca kufwambaana waya, wakeenda bantu boonse balimulangilile. Inzho boonse bakazoowa cini cini bakatembaula Leza baamba ati, “Tatunacibwene cili bolya.”

Jesu Wamwita Levi

¹³ Jeso wakaya ulimwi ku mulando wa lwaatele lwa Galilaya. Bantu banji banji bakamucilila beza kubungana, ngoonaawo wakakanka kubayiisha.

¹⁴ Inzho naakaakuya bweenda wakabona Levi shimutelo mwanakwe Alufayasi, ulishite amulimo wakwe. Jeso wakamwaambila ati, “Ncilila.” Levi wakazhimuka, wamucilila.

¹⁵ Jeso u ba shiciiya bakwe bakaya muŋanda mwa Levi, antoomwi uba shimitelo u bashishibi, nkaambo bunji bwabo bakamucilila.

¹⁶ Inzho bamwi balembi, bakaakuli bankamu yaba Falisi, nibakabona ati Jeso ulalya uba shimitelo, bakababuzha ba shiciiya bakwe ati, “No nkaamboonzhi ulalya antoomwi u bantu bali bolya?”

¹⁷ Jeso naakateelela bobo, wakabaingula ati, “Ubatali balwazhi tabazanda mushilishi, cita balwazhi. Ume ndiina kwiza kwita baluleme pe, ndakezhila ba shishibi.”

Mubuzho Wakuliimya Kulya

¹⁸ Ciindi cimwi ba shiciiya baa Johani Mupapatizhi u ba Falisi bakaakuliimya kulya. Bantu bamwi bakeza kwa Jeso bamubuzha ati, “No nkaamboonzhi ba shiciiya baa Johani Mupapatizhi u ba shiciiya baba Falisi balaliimya kulya pele ba shiciiya bako tabaliimya?”

¹⁹ Mukwiingula Jeso wakababuzha mubuzho ati, “Sa batambe kubwinga balakonzha kuliimya kulya ciindi shibwinga naacilyaabo? Pe pe, tabakonzha! Shibwinga naacilyaabo tabakonzha kucita bobo.

²⁰ Pele nikuba bobo cilakashika ciindi ushibwinga naakaakushiwa nkubabele, ndilelyo beenzhiina nibakaaliimya kulya mukuusa.

²¹ “Kwiina muntu uusasa cikamba cacisani citana kuyosa, acisani cakale kale. Nkaambo kuti wacita bobo, cikamba ceco cakanka kuyosa, cilamonsola cisani cakale kale nkukuti cipulo cilakomena kubaala.

²² Ulimwi kwiina muntu uubika waini mupiya munkomo sha masalu makulukulu pe. Nkaambo inkomo shesho shilaanduka. Inkomo shilazonauka, waini ulapoomokela anshi. Inta kayi waini mupiya ulabikwa munkomo impiya.”

Mubuzho wa Buzuba bwa Sabata

²³ Bumwi buzuba bwa Sabata Jeso wakaita akati kamyuunda ya maila, kaya bweenda u ba shiciiya bakwe. Inzho ba shiciiya bakakanka kupululula makunka a maila balaya bulya.

²⁴ Ba Falisi bakaambila Jeso ati, “Langa, Mulawo toohuminya kwaamba ba shiciiya bako baakucita bolya mu buzuba bwa Sabata.”

²⁵ Jeso wakabaambila ati, “Sa mwiina nimwakabala Devidi mbwaakacita ciindi walo umbucakaakuli abo nibakafwa inzala?

²⁶ Bakanjila muŋanda ya Leza bakalya cinkwa cakupa Leza. Ceci cakacitika ciindi Abiyata naakaakuli ngu mukando wa bapaizhi. Inzho kwiita mu mulawo wesu bapaizhi ice mbubakaakuhuminyiwa kulya cinkwa ceci, pele Devidi wakacilya, ukucaabana u babo mbucakaakuli abo.”

²⁷ Jeso wakabashimwina ati, “Buzuba bwa Sabata bwakapangwa kwaamba buyohwe muntu, muntu wiina kulengwa ukaambo kabuzuba bwa Sabata.

²⁸ Ubobo Mwanaa Muntu ngu Mwami wa buzuba bwa Sabata.”