Maako 16 - Izwi lya Leza

Jeso Wabuka ku Bafwu

¹ Inzho nibwakaita buzuba bwa Sabata, Maliya waku Magadala, u Maliya baina Jemusi u Salome bakaula mafwuta aanunka kalonze kwaamba bakananike mutunta wa Jeso.

² Cifwumo fwumo mu buzuba butaanzhi bwa nsunda, mbulyakapasulila bulyo izuba, bakaya ku cuumbwe.

³ Nibaakuya munzhila, kabaya bubuzhanya ati, “No nguni ukakatukunkulushizha ibwe ku mulyango wa cuumbwe?” Nkaambo kalili ikando cini cini.

⁴ Inzho nibakasansula menso bakabona ati ibwe ndikunkulushe kale.

⁵ Bakenjila mu cuumbwe bayana mukubushi ulishite kucilyo, ulisamine cikobelo cituba buu, ubobo bakakankamana cini cini.

⁶ Mukubushi wezo wakabaambila ati, “Mutatiyi. Ndizhi ati mulakapula Jeso waku Nanzaleta, wezo ngubaakankamina a ciciinkano. Temo mono wabuka. Amulange ngaawa ngubaa kumoonecele.

⁷ Inzho kamuya mukabashimwine ba shiciiya bakwe antoomwi u Pita ati, ‘Wasolola kuya ku Galilaya nkumukakoombonena, mbubona mbwaakamwaambila!’ ”

⁸ Ngoonaawo bakahwa mu cuumbwe, balukanka kaambo bakatiya ukuzoowa cini cini.

Jeso walibonya kwa Maliya waku Magadala

⁹ Mu buzuba butaanzhi bwa nsunda cifwumo fwumo, Jeso naakabuka ku bafwu, wakataanguna kulibonya kwa Maliya waku Magadala, wezu ngumukaintu ngwaakakusha myoza mibiyabi iili ciloba.

¹⁰ Ngoonaawo Maliya wakaya kushimwina babo mbucaakukala aze Jeso, koko nkubakaakuungumene balalila.

¹¹ Pele balo nibakateelela ati Jeso wabuka ku bafwu, ulimwi u kwaamba ati Maliya wamubona, bayina nibakaashoma makani aza.

Jeso Walibonya ku Bashiciiya Bobile

¹² Kuhwaawo Jeso wakalibonya mucimo ca mushobo unji ku bashiciiya bobile bakaakuya bweenda munzhila iiya kumatungu.

¹³ Abo baba bakakananina banamaleya, pele bayina nibakabashoma pe.

Jeso Walibonya ku Bashiciiya bali Ikumi Uutwesha Womwi

¹⁴ Munshi wakeza kulibonya ku bashiciiya bali ikumi uutwesha womwi ciindi nibakaakulya. Jeso wakabatapatila ukaambo kakuzuluzha kwabo, ukutashoma babo bakamubona kaambo kakuzuma myonzo.

¹⁵ Inzho wakabaambila ati, “Kamuya mu luundu loonse, mukakambauke Makani Mabotu ku bantu bamishobo yoonse.

¹⁶ Wezo ukaashoma u kupapatizwa, ulaafwutuka, pele wezo uutakaashomi ulakazulwa.

¹⁷ Shitondezho sheshi shilakalibonya ku bashomi, balakatanda myoza mibiyabi mwizhina lyangu, balakacilozha kwaamba mishobo yaandeene andeene.

¹⁸ Balakabweza bazoka u matashi, nibakaanwa cikola cili buti, tacikabakoli. Bakabika matashi abo abalwazhi, balakapona.”

Jeso Watolwa Mwizeulu

¹⁹ Inzho Mwami Jeso amane kubaambila bobo, wakatolwa kwizeulu, waya kukala kwitashi lya Leza lya cilyo.

²⁰ Inzho batumwa bakaya balaya bukambauka koonse koonse, u Mwami Jeso kali abo kaya bubazumya zumya mu milimo yabo, ukuzuzukizha makani kwiita mu shitondezho.