Maako 14 - Izwi lya Leza

Makanze Aakuyaya Jeso

¹ Inzho kakusheele mazuba obile kwaamba libe ipobwe lya kwiitilila lya Cinkwa ciina bumena. Bapaizhi bakando u balembi kabakapula inzhila yakukwata Jeso u kumuyaya kashobele.

² Bakaamba ati, “Tutamukwati ciindi ce pobwe kaambo bantu balaba nibatubucila, balatulwisha.”

Jeso Wananikwa Mafwuta ku Betani

³ Jeso nakaakuli ku munzhi wa Betani muŋanda ya Saimoni shicinsenda, naakaakucilya kwakeza mukaintu wakaakukwete kapawo kamafwuta aanunka kalonze a muulo mukando, akapangwa kumalubaluba aanunka kabotu. Wakashinkula kapawo amane watila mafwuta a mutwi wa Jeso.

⁴ Inzho bamwi bakaakuliwo bakatongauka ca bukali ati, “No nkaamboonzhi ncaazonauninwa bolya aza mafwuta?

⁵ Kaayelele kuuzhiwa mali a baala amyaanda yotatwe ukwaapa bapushi.” Ubobo bakalemanina mukaintu wezo.

⁶ Pele Jeso wakabaambila ati, “Noomulece mutamupenzha, kaambo wancitila cintu cibotu.

⁷ Bapushi mulyaabo lyoonse, ulimwi mulakonzha kubayohwa kufwumbwa ciindi, pele tamuukuli ame lyoonse pe,

⁸ Mukaintu wezu wacita mbwaakonzha, woonanicila limwi mafwuta mubili wangu kwaamba ukazhikwe kabotu.

⁹ Cini cini ndamwaambila ati, kufwumbwa koko kukaakambaukwa Makani Mabotu mu luundu loonse, ceci ncaacita mukaintu wezu, cilakaba cizhibalusho cakwe.”

Judasi Wahumina Kumwaaba Jeso

¹⁰ Inzho Judasi Shikalyote, wakaakuli umwi wa babo bali ikumi ubatwesha bobile, wakaya ku bapaizhi kwaamba amwaabe Jeso nkubabele.

¹¹ Bakabotelwa cini cini nibakateelela makani aka Judasi, ulimwi bakamushomezha ati balaamupa mali. Judasi wakakanka kukapula ciindi cibotu cakwaaba Jeso.

Jeso Walya Ipobwe lya Kwiitilila u ba Shiciiya Bakwe

¹² Mu buzuba butaanzhi bwa cinkwa ciina bumena, buzuba bwakaakuyayiwa tumbelele twepobwe lya Kwiitilila, ba shiciiya bakamubuzha Jeso ati, “No nkukwi nkuuzanda kuya kulila ipobwe lya Kwiitilila, kwaamba tukakubambile?”

¹³ Jeso wakatuma ba shiciiya bakwe bobile, wabaambila ati, “Kamuya mu munzhi, mulakaswaangana u mulombwana uuzemwine intesho ya meenzhi.

¹⁴ Mukamucilile, kufwumbwa muŋanda mwaati akenjile, mukaambile mukamwini iŋanda ati, ‘Mwiiyi ulabuzha ati, no njiiliye iŋanda njinkaalila ipobwe lwa Kwiitilila u ba shiciiya bangu?’

¹⁵ Ulakamutondezha iŋanda inkando yeezeulu, indulice kale, momo mumweelele kutubambila shakulya.”

¹⁶ Ba shiciiya bakaya mu munzhi wezo, bakayana shoonse shili mbubona mbwakabaambila Jeso. Ngoonaawo bakabamba mulalilo we pobwe lya Kwiitilila.

¹⁷ Ciindi ca mangolezha, Jeso wakeza u ba shiciiya bakwe bali ikumi ubatwesha bobile.

¹⁸ Inzho nibakasengela shakulya, wakabashimwina ati, “Cini cini ndamushimwina ati, umwi akati kenu ulangaba, nguwena ngutulya aze.”

¹⁹ Ba shiciiya bakausa, ubobo bakakanka kulibuzha umwi uumwi ati, “Sa ndime, Mwami?”

²⁰ Jeso wakabaingula ati, “Nguwena ngutubwenga aze umutiba womwi akati kenu numuli ikumi ubatwesha bobile,

²¹ Nkaambo Mwanaa Muntu ulafwa mbubona mbwaalembelwe makani aakwe, pele kuli mapenzhi ku muntu wezo ukamwaaba Mwanaa Muntu, nicakabota kuti naatakazhalwa!”

Mulalilo wa Mwami

²² Ciindi nibakaakulya, Jeso wakabweza cinkwa, amane kulumba kwa Leza wakacikomona, wabapa ba shiciiya bakwe. Waamba ati, “Amutambule mulye, wezu ngu mubili wangu.”

²³ Wakabweza inkapu ya waini, amane kulumba kwa Leza, wakabatambika bakanwa.

²⁴ Jeso wakabaambila ati, “Bobu mbubulowa bwangu bwa mulongo mupiya, bwatililwa banji banji.

²⁵ “Cini cini ndamwaambila ati nshikanwi linji mushinza wa mucelo wa ma oliva mpaka kubuzuba mbunkaanwa mushinza mupiya mu bwami bwa Leza.”

²⁶ Nibakamana kwiimba lwiimbo bakaya ku lupili lwa masamu a oliva.

Jeso Wamwaambila Pita Ulaantama

²⁷ Jeso wakabashimwina ati, “Umwe noonse mulaalukanka mulakanshiya, kaambo mazwi a Leza alaamba ati, ‘Ndakauma mweembezhi imbelele shilakamwaala.’

²⁸ Pele ndakabushiwa ku bafwu ndakamusololela kuya ku Galilaya.”

²⁹ Inzho Pita wakaingula ati, “Ume nshikakushiyi, nikuba kuti boonse bakakushiye.”

³⁰ Jeso wakamushimwina Pita ati, “Cini cini ndakushimwina ati ubwasunu mashiku aza ngoona, ulantama kotatwe mukombwe katana kulila kobile.”

³¹ Pita wakashomezha cini cini ati, “Ume nikuba ku lufwu nshikakutama pe.” Abo ba shiciiya bamwi boonse bakaamba mbubona bobo.

Jeso Wakakomba mu Muunda wa Getisemani

³² Nibakashika kubusena butewa ati Getisemani, Jeso wakashimwina ba shiciiya bakwe ati, “Amukale ano, ume ninciya kukomba kolya.”

³³ Wakabweza Pita, u Jemusi u Johani, waakanka kulyeetezha ukupenga cini cini mu monzo.

³⁴ Ubobo wakabashimwina ati, “Monzo wangu ulyuusile cini cini buusu bwa lufwu. Pele amushaale ano mulindile.”

³⁵ Inzho wakaya lwaambele ashoonto, wafwukama anshi walomba ati caakukonzheka mapenzhi aza amwiitilile.

³⁶ Wakakomba ati, Abba, Taata! Shoonse shintu shilakonzheka kwako, Ndakumbila ati cinwisho ceci cinjitilile, pele kutabi kuzanda kwangu, akube kuzanda kwako umwini.

³⁷ Naakapiluka, wakayana ba shiciiya baloona, inzho wakabuzha Pita ati, “Saimoni sa uloona? Wakacilwakulindila kwa ciindi cishoonto bulyo?”

³⁸ Wakabashimwina ati, “Amulindile kwaamba mutabi nimutepaulwa. Cini cini moza ulazanda, pele mubili wabula insana.”

³⁹ Ulimwi wakabweela wakomba, waamba mazwi azo ngoona ngakaakwaambile lutaanzhi.

⁴⁰ Ulimwi wakabweela ku bashiciiya wabayana baloona kaambo kabafwile tulo. Inzho bakabula ca kwaamba.

⁴¹ Jeso naakazhoka lweendo lwatatu, wakabaambila ati, “Muloona mwaliiba? Imbubo! Inzho amubone ciindi cashika, Mwanaa Muntu waabwa u matashi a ba shishibi.

⁴² Amuzhimuke tuukuya, amubone uzanda kungaba nguwezu washika ulyaafwaafwi.”

Kwaabwa Ukukwatwa kwa Jeso

⁴³ Jeso naakaakucaamba, wakashika Judasi wakaakuli uumwi wa bashiciiya bali ikumi ubatwesha bobile, kali iikamu lyabantu bakaakukwete maceba umisako. Yezhi ninkamu ya bapaizhi bakando, u balembi ulimwi ubakando ba cishi.

⁴⁴ Inzho Judasi kabapele citondezho cakuti, “Nguwena wezo ngunkaashonta, ati inguwe mukamukwate mukamutole.”

⁴⁵ Judasi mbwaakashicila bulyo, wakasuumana nkwaakubele Jeso waamba ati, “Mwiiyi.” Amane wamushonta.

⁴⁶ Ngoonaawo bakamukwata Jeso bamwaanga.

⁴⁷ Umwi wa babo bakaakuzhimine afwaafwi wakasomona iceba lyakwe, wakosola kutwi muzhice wa mupaizhi mukando.

⁴⁸ Ngoonaawo Jeso wakaambila inkamu yezho ati, “Mweza kundwisha u maceba, umisako ukoya ndimuteu?

⁴⁹ Mazuba manji manji ndakaakuli amwe muŋanda ya Leza, ndakaakumuyiisha pele mwiina nimwakankwata. Ceci cacitika kuzuzucizha maŋwalu.”

⁵⁰ Ngoonaawo ba shiciiya boonse bakamwaala.

⁵¹ Umwi mukubushi wakaakulihumbile bulyo isani lituba, kaya bucilila Jeso.

⁵² Inzho nibakaakuzanda kumukwata wakabapuzhumuka, walukanka cintanda, wakashiya isani ndyaakaakusamine.

⁵³ Bakamutola Jeso kuŋanda ya mupaizhi mukando, kwakaakubungene bakando babapaizhi ubakando ba cishi, ulimwi u balembi.

⁵⁴ Pita kaya bubalya intende intende munshi lyabo, limwi wenjila mulubanza lwa ŋanda ya mupaizhi mukando. Wakakala antoomwi ubalindizhi kazota mulilo.

⁵⁵ Bakando babapaizhi antoomwi u beendelezhi ba cikombelo, bakasoleka kwaamba bayane twaambo twakupa mulandu Jeso, pele bayina nibakatuyana.

⁵⁶ Inzho kwakeza batumboni banji banji kumulenjelezha twaambo. Pele bakaishanya mu kwaamba kwabo.

⁵⁷ Ngoonaawo bamwi bakazhimuka ukumulenjelela Jeso ati,

⁵⁸ “Uswe twakamuteelela ulaamba ati, ‘Ndakeeumbulula iŋanda ya Leza yezhi yakazakwa u matashi, ulimwi mu mazuba otatwe ndakazaka iinji iitazakwa u matashi.’ ”

⁵⁹ Abo babo bumboni bwabo bwakaishanya mbubona bulyo.

⁶⁰ Ngoonaawo Mupaizhi mukando wakazhima kumbele lyabo boonse wamubuzha Jeso ati, “Sa wiina ca kwaamba mu twaambo totu ntubakulenjelezha?”

⁶¹ Pele Jeso wiina nakaingula pe. Mupaizhi mukando wakabuzha ulimwi ati, “Sa ndiwe Munanike, Mwanaa Leza Ulemekwa?”

⁶² Jeso wakaingula ati, “Ndime, ulimwi mulakabona Mwanaa Muntu ulishite kwitashi lya cilyo lya Leza Shinsana shoonse, kezhiza mu makumbi mwizeulu.”

⁶³ Ngoonaawo Mupaizhi mukando wakazapaula cisani cakwe, waamba ati, “Mbumboniinzhi bunji mbutucilanjila?

⁶⁴ Mwaliteelelela nubeni malweza aakwe aakusampaula Leza. No muzeezoonzhi ngumukwete?” Boonse bakateelezhanya ati apewe mulandu wakufwa.

⁶⁵ Bamwi bakakanka kumufwila mate, bamwanga cisani amenso ukumuuma balaamba ati, “Tushimwine, no nguni wakuuma?” Abo balindizhi bakamubweza ukumuuma inkumbazhi.

Pita Mbwaakamutama Jeso

⁶⁶ Inzho naakaita umwi mushimbi musebezhi wa mupaizhi mukando, Pita kali mulubanza ulishite kumanuma a bantu.

⁶⁷ Naakamubona Pita ulazota, wakamulanjilila waamba ati, “Uwe wakaakuli u Jeso wa Nazanleta.”

⁶⁸ Pele Pita wakatama ati, “Nshimwizhi, ulimwi nshicizhi ncuwamba.” Amane wazhimuka waya ansengwe aayela lubanza. Ngoonaawo mukombwe wakalila.

⁶⁹ Inzho mukaintu wezo wakabona Pita, wakakanka kushimwina bakaakuzhimine afwaafwi ati, “Aze wezu kabali u Jeso.”

⁷⁰ Pele Pita wakatama ulimwi. Nikwakaita ciindi cishoonto bakaakuzhimine afwaafwi bakashimwina Pita ati, “Cini cini uli wabo kaambo uli waku Galileya.”

⁷¹ Inzho wakakanka koombwezha ukupinga miya ati, “Nshimwizhi muntu wezu ngumwaamba.”

⁷² Ngoonaawo mukombwe wakakokoloka lwabili. Pita wakazhibaluka mbwakamwaambila Jeso ati, “Ulakantama kotatwe mukombwe katana kulila kobile.” Amane wakahwa, ulaya bulila.