Maako 13 - Izwi lya Leza

Jeso Wakanana Makani Aakuzonaunwa kwa Ŋanda ya Leza

¹ Inzho Jeso mbwaakahwila bulyo muŋanda ya Leza, umwi wa bashiciiya bakwe wakamwaambila ati, “Mwiiyi, bona! Taaliboteli mabwe aza ubuzace bwa ŋanda yezhi!”

² Jeso wakamwiingula ati, “Inta mwaabona mazace aza makando ali bolya? Kwiina ibwe likaashaala lilizhilicilwe ebwe nina. Oonse alakoolomonwa.”

Mapenzhi u Kupenzhewa

³ Inzho Jeso naakaakushite alupili lwa masamu a maoliva lulanjene iiŋanda ya Leza, ba Pita u Jemusi u Johani u Andulu bakamubuzha Jeso kumbali ati,

⁴ “Tushimwine, no ndililiye nishikaacitika shintu sheshi, ulimwi nciinzhi cikaaba citondezho ca kwaamba sheshi shintu shikalacitika?”

⁵ Ngoonaawo Jeso wakakanka kubayiisha ati, “Amucenjele kwaamba kutabi muntu uumucenga.

⁶ Nkaambo bantu banji banji balakeza mwizhina lyangu, baamba ati, ‘Ndime Kilisito.’ Ulimwi balakasowa banji banji.

⁷ Mutakapenji mwakateelela ati koku kuli inkondo, nikuba kuteelela impuwo ya nkondo kumashi aakulaale. Sheshi shilyeelele kucitika, pele taalyaati ngumamanino aciindi.

⁸ Cishi cilakalwa u cishi nina, abo bwami u bwami nina. Kulakaba kuzungaana kwanshi mu masena andeene andeene. Ulimwi kulakaba inzala, pele aza ngu makancilo a mapenzhi.

⁹ “Inzho umwe, amucenjele kaambo bantu balakamutola kunkuta. Mulakaumwa mu shikombelo shaba Juda, mulakazhima kumbele lya babeteshi ubami ukaambo kangu, mulakabaambila Makani Mabotu.

¹⁰ Pele kaatana kushika mamanino, Makani Mabotu alyeelele kukambaukwa ku bantu boonse.

¹¹ Ciindi nibakaamukwata u kumutola kunkuta mutakalipakashizha shakuyakwaamba, pele mukaambe kufwumbwa ceco ncimukaapewa aciindi awo, kaambo mazwi ngumuya kwaamba taali enu, Moza Usalala nguuya kwaamba.

¹² Muntu ulakaaba munina kwaamba ayayiwe, abo bamazhali balakacita mbubona bobo kubanabo, bana balakahobelela babazhala ati bayaiwe.

¹³ Umwe mulakasulwa ku bantu boonse ukaambo kezhina lyangu. Pele wezo uzumanana kushicila ku mamanino ulaafwutulwa.

Mapenzhi Makando

¹⁴ “Inzho mwakacibona cisesemyo cisofwaazha cilizhimine nguciteelele kuzhima” (uubala naateeleleshe), babo bali mu Judiya balyeelele kulukancila mu mapili.

¹⁵ Wezo ukaayanwa alululi lwa ŋanda teelele kusowa ciindi kuseluka kwaamba akushe cintu muŋanda niciba comwi cakutolelela.

¹⁶ Muntu ukaayanwa umuunda atakalanga munshi kubweza cikobelo.

¹⁷ Kulakaba kupenga cini cini kuli babo bamishi ubanonsha ku mazuba azo!

¹⁸ Kamukomba Leza kwaamba sheshi shintu shitakacitici ciindi campeyo.

¹⁹ Nkaambo ku mazuba azo kulakaba mapenzhi makando abaala, aatanabwenwe kuhwa ciindi Leza naakalenga inshi kushika bwasunu. Ulimwi takukabi linji mapenzhi ali ukoya azo.

²⁰ Kuti Leza natakaafwiinsha mazuba azo ukaambo ka bantu bakwe basale, nikwakaakwiina muntu uuti naakafwutulwa.

²¹ Ku ciindi ceco na muntu akamwaambile ati, “Bona nguwezu Kilisito na ati, ‘Bona, nguwelya!’ Mutakahumina.

²² Nkaambo kulakaba ba Kilisito babeshi ulimwi u bashinshimi babeshi. Balakacita shitondezho u shintu shizoosha kwaamba bakacenge bantu banji banji kubicilizha ubasale baka Leza caakukonzheka.

²³ Ubobo amucenjele u kulibambila. Ndamushimwinina limwi shintu sheshi shoonse nishitana kucitika.”

Kwiza kwa Mwanaa Muntu

²⁴ Mu mazuba azo akamana mapenzhi, izuba lilakashiya.

²⁵ Insana sha kwizeulu shilakazungaana, intongwezhi asho shilakawa.

²⁶ Inzho Mwanaa Muntu ulakalibonya umakumbi uleza bwiza iinsana u bulemu.

²⁷ Ulakatuma baanjelo kwaamba babunjike antoomwi bantu bakwe basale kuhwa kushooko shoonse shone shaano anshi.

Ciiyo Kuhwa ku Mukuzu

²⁸ Amwiiye ciiyo kuhwa ku mukuzu. Mitabi niitalika kushuuka, umatuhu nakanka kusonsa mulazhiba ati mainza aba afwaafwi.

²⁹ Mbumbona bobo, mwakabona shintu sheshi shakanka kucitika, mulaazhiba ati ciindi caba afwaafwi.

³⁰ Amuzhibaluke ati shintu sheshi shoonse shilaacitika ano anshi bantu baano mazuba kabatana kumaninina kufwa.

³¹ Izeulu iinshi shilakaloba, pele mazwi angu taakaloba.

Kwiina Uuzhi Buzuba Niciba Ciindi

³² “Pele kwiina naaba womwi uubwizhi buzuba bobo niciba ciindi. Nibaba baanjelo ba kwizeulu, naaba Mwana, pele bulyo Taata ice.

³³ Kamulindila, amucenjele nkaambo tamwizhi ciindi ceco nicikaashika.

³⁴ Cilakaba ukoya muntu wakashiya basebezhi bakwe kwaamba baakulindila iŋanda yakwe, ciindi walo naakabweza lweendo lwa kuya kulaale. Umwi uumwi wakapewa mulimo wakucita, umulindizhi waamulyango wakamulailila ati alindile.

³⁵ Ubobo amwe kamulindila, kaambo tamucizhi ciindi mukamwini iŋanda nakaashika, ambweni mangolezha, naaba akati kamashiku, naa kumancela niciba cifwumo fwumo.

³⁶ Ulakaba naakaamuyana muloona akaposhoka cakutabulana.

³⁷ Nciŋamba kwenu ndaambila boonse ati amulindile.”