Maako 12 - Izwi lya Leza

Cikozhano ca Bashimuunda Babiyabi

¹ Inzho Jeso wakakanka kubayiisha mu shikozhano ati, “Umwi muntu wakashanga manungu a waini mu muunda wakwe, amane woozacila lwiingo, waasha ilindi lyakushinina waini, ukuzaka busanza bwamulindizhi. Muunda wakooshisha ku balimi, amane waya ku cishi cinji.

² Ciindi ca kutebula micelo ya waini nicakashika, wakatuma musebezhi ku balimi kwaamba bamupe aze caabilo ca micelo yamumunda.

³ Pele balimi bakamukwata musebezhi wezo bamuuma ukumutanda, bamupilusha cinkambaminwe.

⁴ Ulimwi mukamwini muunda wakatuma uumwi musebezhi. Balimi bakamutulula luuma ukumupenzha cuusha insoni.

⁵ Ulimwi wakatuma uumwi musebezhi, wezo walo bakamuyaya. Ubamwi banji banji mbaakaakutuma bakacitwa mbumbona bobo, bamwi kabaumwa, bamwi kabayaiwa.

⁶ Kwakashaala womwi bulyo waakaakweelele kutumwa, wezo mwanakwe mukamwini muunda ngwaakaakufwini. Inzho ku mamanino wakamutuma mwanakwe ku balimi. Wakaamba ati, ‘Balakamupa bulemu mwanangu.’

⁷ Pele balimi nibakoombona bakashimwizhanya ati, ‘Nguwezu shimulyazhina. Kamwiza tumuyaye! Kwaamba muunda ube wesu.’

⁸ Ngoonaawo bakamukwata u kumuyaya, bamusowela ansengwe lya muunda.”

⁹ Amane Jeso wakababuzha ati, “No mukamwini muunda ulacitaanzhi? Cini cini ulakeza kubayaya balimi babo ukuupa muunda ku bantu banji.

¹⁰ Inta mwakaabala Malembe aamba ati, “Ibwe ndibaakaka bazashi, lyaba ndiibwe lya cooko lizandika.”

¹¹ Mwami nguwakapa kwaamba sheshi shicitike ubobo shilazoosha cini cini.

¹² Beendelezhi baba Juda nibakezhiba ati mbaakaakukumbilizha mu cikozhano ceci, bakasoleka kwaamba bayane inzhila ya kumwaanga Jeso. Pele bakatiya bantu ubobo bakaya bamushiya.

Mubuzho Wamutelo

¹³ Ba Falisi u bantu bamwi bamukabunga kaba Helodiyani bakatumwa kwa Jeso kwaamba bamuyanine mulandu kwiita mu mazwi aakwe.

¹⁴ Bakashika kwakwe bamwaambila ati, “Mwiiyi, tulizhi ati uli muntu uululeme. Wiina makani unshibakutelaicila bantu, pele ulayiisha kabotu inzhila iniini ya Leza. Twaambile, sa cililuleme kwaamba tuukutela mutelo ku muleli mukando waku Loma? Sa tulyeelele kutela, na pe?”

¹⁵ Pele Jeso wakaazhiba maanu aabo. Ngoonaawo wakababuzha ati, “Nkamboonzhi ncimuningululila? Amulilete ili ndibone.”

¹⁶ Ubobo bakalileta ili lyomwi, Jeso wakababuzha ati, “No mutwi wezu ngwaani? Iizhina lilembelwewo ndyaani?” Bakamwiingula ati, “Nshamuleli mukando Kaisala waku Loma.”

¹⁷ Jeso wakabaambila ati, “Amumupe Kaisala shakwe Kaisala, ulimwi sha Leza amumupe Leza.” Inzho Jeso kwiingula kwakwe kwakabakankamika cini cini.

Mubuzho Wakubuka kwa Bafwu

¹⁸ Inzho kwakeza ba Saduki bamwi. Baba imbabo baamba ati bantu tabakabuci kuhwa ku bafwu, bakamubuzha Jeso ati,

¹⁹ “Mwiiyi, Mozesi wakatulembela mulawo wakuti, ‘Naa munyoko wafwa, washiya mukaintu wiina mwana, munina ulyeelele kumukona mukamufwu kwaamba amuzhalile bana mufwu.’

²⁰ Kakuli balombwana babunina mu lushomo bali ciloba. Mukando wabo wakatwala, pele wakafwa wiina nakazhala mwana.

²¹ Wakaakumucilila wakamukona mukamufwu, pele aze wakafwa wiina bana. Uwatatu wakacita umbona bobo,

²² mpaka boonse bali ciloba bakamutwala u kufwa cakutazhala bana. Ku mamanino aze mukaintu wakafwa.

²³ Inzho mubuzho wesu nguwezu, boonse bakabushiwa kuhwa kubafwu, no mukaintu wezu ulakaba waani, nkaambo boonse kabamutwele?”

²⁴ Jeso wakabaingula ati, “Muli bazhimini nkaambo tamweezhi mazwi aalembelwe, ulimwi tamushizhi insana sha Leza.

²⁵ Nkaambo bantu bakabushiwa ku bafwu balakaakuli ukoya baanjelo bamwizeulu tabakatwalani pe.”

²⁶ Inzho ku makani aakubushiwa ku bafwu sa mwiina nimwakabala mwibuka ndyaakalemba Mozesi ukaambo kacisoko cakaakuhwilima mulilo? Leza wakamwaambila Mozesi ati, “Ndime Leza wa Abulahamu, Leza wa Aizeki, Leza wa Jacobo.”

²⁷ Ngu Leza wa bantu balanga tali Leza wa bafwu pe. Aakuli mbumutelaika bobo muli bazhimini cini cini.

Mulawo Mukando

²⁸ Inzho kakuli umwi wa balembi wakaakuliwo wakateelela mubuzho. Wakabona kwaamba ati Jeso wakabaingula kabotu ba Saduki, amane wakeza kwa Jeso wamubuzha ati, “No nguuliye mulawo mukando ubaala iimwi yoonse?”

²⁹ Jeso wakamwiingula ati, “Mulawo mukando nguwezu, Teelela uwe Izilaili! Mwami Leza wesu, ngu Leza ice nana.

³⁰ Fwuna Mwami Leza wako u monzo wako woonse, u moza wako woonse, u mizeezo yako yoonse, iinsana shako shoonse.”

³¹ Uumwi mulawo mukando wabili nguwezu, “Fwuna shimukobonoko umbona mbulifwini umwini. Kwiina mulawo mukando kubaala yezhi pe.”

³² Mwiiyi wa mulawo wakaambila Jeso ati, “Waamba kabotu Mwiiyi, cilishinizhe bobo mbuwaamba ati Mwami Leza ice bulyo ngu Leza, kwiina baleza bamwi pele walo ice.

³³ Inzho muntu ulyeelele kufwuna Leza u monzo wakwe oonse, u mizeezo yakwe yoonse iinsana shakwe shoonse ulimwi afwune shimukobonina ukoya mbwalifwini mwini. Kucita bobo ncintu cikando kubaala kuleta banyama kwaamba batentwe acipaililo u kupa shipaizho shimwi kwa Leza.”

³⁴ Jeso wakabona ati mwiiyi wezu wakaingula camaanu, ubobo wakamwaambila ati, “Tuli kulaale u bwami bwa Leza.” Kuhwaawo kwiina muntu wakamubuzha mubuzho ulimwi.

Mubuzho wa Mesiya

³⁵ Jeso naakaakuyiisha muŋanda ya Leza wakabuzha ati, No balembi balaambilaanzhi ati Kilisito ulakahwa kumukowa waka Devidi.

³⁶ Aakuli walo Devidi lwakwe mwini naakanjilwa Moza Usalala wakaamba ati, Mwami Leza wakaamba ku Mwami wangu ati, kala kuluya lwangu lwa cilyo, mpaka nkabike ba shinkondonoko kunshi lyamatende ako.

³⁷ Aakuli Devidi mwini wakamwita Kilisito ati, “Mwami.” No ninzho Kilisito ulaba buti mwanakwe Devidi? Bana buleya bakakutambula kuyiisha kwa Jeso ca kubotelwa.

Jeso Watapatila Balembi

³⁸ Inzho Jeso nakaakuyiisha wakaamba ati, “Amucenjele kubalembi bazandisha kuya bweenda kabasamine shikobelo shilamfwu, ukwaanzhiwa ca bulemu mu shisambalilo,

³⁹ u kukala a shuuna shabulemu mu shikombelo shaba Juda u mapobwe.

⁴⁰ Balacenga bamuka bafwu ukubananga imbono shabo, ulimwi balazanda kulibonya ku bantu mu kukomba shikombyo shabo shilamfwu. Cisubulo cabo kwa Leza cilaabaala kubiya.”

Mulumbo wa Mukamufwu

⁴¹ Bumwi buzuba Jeso naakaakushite muŋanda ya Leza kufwaafwi ucizobwelo ca mali, wakaakulanjilile bantu mbubabika mali. Bahubi banji banji bakaakubika mali manji manji.

⁴² Inzho kwakeza mukamufwu mupushi wabika tuli tushoonto shoonto tobile twamukuba.

⁴³ Ngoonaawo Jeso waketa ba shiciiya bakwe wakabaambila ati, “Ndamushimwina ati wezu mukamufwu mupushi wapa kubaala boonse babika mucizobwelo.

⁴⁴ Nkaambo babika tushoonto bulyo kuhwa kubuhubi bwabo, pele walo wezu mubupushi bwakwe wabika shoonse nshaakwete, wiina ncaashaazha muŋanda yakwe.”