Maako 10 - Izwi lya Leza

Makani Aakulekana

¹ Jeso wakahwa ku Kapenaumi, waya ku cishi ca Judiya cili kumutala wa lweenje lwa Joodani. Bantu banji banji bakamubunganina, wakabayiisha umbona mbwakaakucita lyoonse.

² Ba Falisi bamwi bakeza kumubuzha Jeso mubuzho wakumulingulula ati, “Tushimwine, sa ku mulawo cililuleme kwaamba mulombwana aleke mwinakwe?”

³ Jeso wakabaingula umubuzho ati, “No Mozesi wakamulailila buti?”

⁴ Bakaingula ati, “Mozesi wakahuminya mulombwana kulembela mwinakwe luŋwalu lwakulekana, amana wamuleka.”

⁵ Jeso wakabaambila ati, “Mozesi wakamulembela mulawo wezu kaambo muli bazumu mitwi.

⁶ Pele ku makancilo a malenjelo, Leza wakalenga mulombwana u mukaintu.

⁷ Ubobo mulombwana ulakashiya ushi u baina ukukakatila kumwinakwe,

⁸ inzho bobile baba ulaba mubili womwi nana. Tabacili bobile linji, pele baba mubili womwi.

⁹ Babo Leza mbaaswaanganya kutabi muntu uuyelele kubaandaanya.”

¹⁰ Nibakapiluka kuŋanda, abo ba shiciiya bakamubuzha Jeso makani aza ngoona.

¹¹ Wakabaambila ati, “Kufwumbwa wezo uuleka mwinakwe ukutwala uunji, waba shimamambe.

¹² Mbumbona bobo u mukaintu uukuhwa kumulumyaakwe ukutwalwa ku mulombwana uunji ati wabucilwa.”

Jeso Walonjezha Twana

¹³ Bamwi bantu bakaleta banabo kwa Jeso kwaamba abaampe matashi ukubalonjezha, pele ba shiciiya bakabakasha bantu babo.

¹⁴ Jeso abone bobo wakabalemanina ba shiciiya bakwe, wakabaambila ati, “Amubaleke bana beze kwangu mutabakasha kaambo bwami bwa Leza mbwabo bali bolya.

¹⁵ Cini cini ndamushimwina ati, Kufwumbwa wezo uutatambuli bwami bwa Leza ukoya mwana, takabunjili pe.”

¹⁶ Inzho Jeso wakafwukata bana wabaampa matashi ukubalonjezha.

Mulombwana Muhubi

¹⁷ Jeso mbwakakancila bulyo lweendo lwakwe, mulombwana umwi wakamulukancila, wakamufwukamina wamubuzha ati, “U mwiiyi mubotu, ncintuunzhi cibotu ncinjelele kucita kwaamba njane bumi butamana?”

¹⁸ Inzho Jeso wakamubuzha ati, “No ulentila nzhi ati ndimubotu? Kwiina muntu mubotu cita Leza ice nana.

¹⁹ Uliizhi milawo ya Leza yaamba ati, Utabi nuuyaya, utabi shimamambe, utebi, utalenjelela uumwi kaambo, utabi mubeshi, lemeka uso u banoko?”

²⁰ Wezo mulombwana wakaingula ati, “Mwiiyi, kuhwa kubwana bwangu kwiina nuuba womwi mulawo ngundatakacilila.”

²¹ Jeso wakamutongomwena ca lufwuno u kumwaambila ati, “Kwashaala cintu comwi. Koya ukauzhe shoonse nshuukwete, mali nguukayana, ukape bapushi, ubobo ulakakwata lubono kwizeulu, wamana uzhize uncilile.”

²² Naakaateelela aza mazwi wakausa wakaya ulicendenkene ku bushu nkaambo kahubile lubono lunji lunji.

²³ Jeso wakabacebauka ba shiciiya bakwe wakabaambila ati, “Ncizumu ku bantu bahubi kunjila mu bwami bwa Leza!”

²⁴ Aza makani akabazhinga ba shiciiya. Jeso wakabaambila ulimwi ati, “Banangu, ncizumu kunjila mu bwami bwa Leza.

²⁵ Ncuubauba inkamela kunjila mulinso lyakasonde kubaala muntu muhubi kwaamba enjile mu bwami bwa Leza.”

²⁶ Ba shiciiya nibakateelela bobo bakazoowa cini cini, bakabuzhanya ati, “Mwaamba alo kuli uukaafwutuka?”

²⁷ Jeso wakabalanjilila wabambila ati, “Ku bantu ceci tacikozheka, pele Leza wiina ncaakacilwa pe.”

²⁸ Inzho Pita wakaamba ati, “Bona, uswe twakashiya shoonse twakucilila.”

²⁹ Jeso wakabaambila ati, “Ee imbubo, ulimwi ndamwaambila ati kufwumbwa uushiya iŋanda yakwe nibaba banina balombwana u bakaintu, naaba baina naa ushi, nibaba bana, niiba myuunda ukaambo kangu u Makani Mabotu,

³⁰ ulakatambula shinji shinji ku ciindi ceno, myaanda myaanda ya maanda, banina balombwana u bakaintu, umanokwabo, u bana umyuunda kubicilizha u mapenzhi, pele muciindi cizhiza ulakayana bumi butamana.

³¹ Pele bataanzhi banji banji balakaba bashaalizhi abo bashaalizhi balakaba bataanzhi.”

Jeso Waamba sha Lufwu Lwakwe Ciindi Catatu

³² Jeso u ba shiciiya bakwe kabaya bweenda munzhila iiya ku Jelusalemu, pele Jeso kali lwaambele, ba shiciiya kabalibilicile, u bantu bakaakubacilile kabafwile bukandu. Ulimwi Jeso wakaambula ba shiciiya bakwe bali ikumi ubatwesha bobile wakakanka kubashimwina shoonse shizanda kumucitikila.

³³ Jeso wakabaambila ati, “Amubone tulaya ku Jelusalemu, koko Mwanaa Muntu nkwaakakaabwa ku bapaizhi bakando u ba maayi ba mulawo. Ulakabetekelwa lufwu, balakamwaaba kumatashi a bantu bakunze.

³⁴ Balakamusaalizha ukumufwila mate, balakamuzupaula u kumuyaya. Pele kubuzuba bwatatu ulakabuka ku bafwu.”

Kulomba kwaba Jemusi u Johani

³⁵ Inzho Jemusi u Johani banakwe Zebedi, bakeza kwa Jeso bamwaambila ati, “U Mwiiyi, kuli cintu ncituzanda kwaamba utucitile.”

³⁶ Jeso wakababuzha ati, “No ncinzhi ncimuzanda kwaamba mucitile?”

³⁷ Bakamwiingula ati, “Tulazanda ati wakakala acuuna cako ca bulemu, ukatuhuminye kwaamba tukakale umwi kucilyo umwi kucimonsho cako.”

³⁸ Ngoonaawo Jeso wakabaambila ati, “Tamucizhi ncimukumbila. Sa mulakonzha kunwina mu nkapu ya mapenzhi njinkaanwina ume? Sa mulakonzha kupapatizwa mu mapenzhi ngu nkaapapatizwa ume?”

³⁹ Bakamwiingula ati, “Tulakonzha.” Inzho Jeso wakabaambila ati, “Cini cini munkapu mwiinkaanwina amwe mulakanwina mo, ulimwi mulakapapatizwa lupapatizo ndwinkaapapatizwa.

⁴⁰ Pele kukala kuluya lwangu lwa cilyo na lwa cimonsho indime iimpa pe. Taata, nguukakapa masena aza kuli babo mbaakaasala.”

⁴¹ Inzho ba shiciiya babo bamwi bali ikumi nibakateelela makani aza, bakabalemanina ba Jemusi u Johani.

⁴² Ngoonaawo Jeso wakaboompolola boonse wabaambila ati, “Mulizhi ati akati ka bantu bakunze, bami baleendelezha iinsana, ulimwi balasebezha kami kami kulela bantu babo.

⁴³ Pele kulyuumwe taceelele kuba bobo pe. Kufwumbwa uzanda kuba mukando ulyeelele kuba musebazhi wenu.

⁴⁴ Kufwumbwa uzanda kuba mutaanzhi ulyeelele kuba mutwanga wabo boonse.

⁴⁵ Nkaambo naaba Mwanaa Muntu wiina kwiza kusebezelwa, wakeza kusebezela bamwi milimo, ulimwi u kupa bumi bwakwe kwaamba anunune bantu banji banji.”

Jeso Wamuponya Batimeyasi Moofwu

⁴⁶ Inzho bakashika ku munzhi wa Jeliko. Jeso naakahwa mu munzhi antoomwi u ba shiciiya bakwe u bantu banji banji, umwi mulombwana moofwu shikulombelela kashite kumbali kunzhila, izhina lyakwe kali Batimeyasi mwanakwe Timeyasi.

⁴⁷ Naakateelela ati ngu Jeso waku Nanzaleta waita, wakakanka kupozomoka ati, “Jeso, Mwana Devidi, mfwila luse!”

⁴⁸ Bantu bakamulemanina u kumwaambila ati aliinze. Pele walo wakapozomokesha ati, “Mwana Devidi, mfwila luse!”

⁴⁹ Ngoonaawo Jeso wakazhima waamba ati, “Noomwite!” Ubobo bakamwita mulombwana moofwu, bamushimwina ati, “Botelwa! Zhimuka ulakwita!”

⁵⁰ Ngoonaawo wakacisowa cikobelo cakwe, wazhimuka weza kwa Jeso.

⁵¹ Inzho Jeso wakamubuzha ati, “Nciinzhi ncuuzanda ati nkucitile?” Mulombwana moofwu wakamwiingula Jeso ati, “Mwiiyi, ndazanda kubona ulimwi.”

⁵² Jeso wakamwaambila ati, “Koya, kushoma ume kwakuponya.” Ngoonaawo wakacikonzha kubona ukumucilila Jeso nkwaakaakuya.