Luka 9 - Izwi lya Leza

Jeso Watuma bali Ikumi Ubatwesha Bobile

¹ Jeso wakabeta ba shiciiya bakwe bali ikumi ubatwesha bobile. Wakabapa bwami iinsana shakukusha ba myoza miyabi u kuponya malwazhi.

² Amane wakabatuma kwaamba bakakambauke sha bwami bwa Leza u kuya buponya balwazhi

³ Wakabashimwina ati, “Mutabwezi cintu niciba comwi mu mushinzo wenu. Mutabwezi musako niciba cikwama, niciba cakulya, naaba mali. Ulimwi mutabwezi shakusama shobile pe.

⁴ Kufwumbwa muŋanda mubakaamutambula amukakale mo kushicila nimukaamuhwa mu munzhi wezo.

⁵ Ulimwi kufwumbwa koko koonse nkubatakaamutambuli, mwakahwa mu munzhi wezo, mukapampumune lufwuko kumatende enu kwaamba cikabe cicenjezho nkubabele.”

⁶ Ba shiciiya bakaya mu minzhi yoonse kuya bukambauka Makani Mabotu, u kuya buponya balwazhi mu masena oonse.

Helodi Wakapenga mu Monzo

⁷ Inzho mwami Helodi, naakaateelela aza makani oonse akacitika, wakapenga mu monzo cini cini. Nkaambo bamwi bantu kabaamba ati, “Johani Mupapatizhi wabuka ku bafwu.

⁸ Bamwi kabaamba ati, Elaija walibonya ulimwi. Pele bamwi kabaamba ati, umwi wa bashinshimi bakale kale wabuka ku bafwu.”

⁹ Helodi wakaamba ati, “Ume Johani ndakamukosola mutwi, no wezu nguni ucita shintu sheshi nshinteelele?” Ubobo kazandisha kwaamba amubone Jeso.

Jeso Wasanina Bantu bali Shuulu Shosanwe

¹⁰ Nibakapiluka batumwa, bakamwaambila Jeso shoonse nshibakacita. Inzho Jeso wakaya kwaamba akaliibe u ba shiciiya bakwe kubusena buli afwaafwi u munzhi wa Betisaida.

¹¹ Bantu banji banji nibakezhiba nkwakakubele, bakamucilila. Inzho wakabatambula wakanka kubaambila makani a bwami bwa Leza. Ulimwi wakaponya babo boonse bakaakuzanda kwaamba abaponye.

¹² Izuba nilyaakuzanda kwibila, ba shiciiya bali ikumi ubatwesha bobile, bakeza kwa Jeso baamba ati, “Baambile bantu baye mu minzhi umumatungu ali afwaafwi, kwaamba baliyanine shakulya ukwakoona kaambo kono nkutubele nkukwisokwe.”

¹³ Pele Jeso wakabaingula ati, “Noombape cakulya ndimwena umwe.” Balo bakaingula ati, “Uswe tulikwete bulyo shinkwa shosanwe utuswi tobile. Sa ulazanda tuye tukaule shinkwa shinji shinji nshibakezulila bantu boonse baba?”

¹⁴ Nkaambo awo kaali balombwana bakaakutandila ku shuulu shili shosanwe. Inzho Jeso wakabaambila ba shiciiya bakwe ati, “Amubakalice mutukamu twamakumi osanwe.”

¹⁵ Bakacita bobo, bakabakalika bantu boonse.

¹⁶ Ngoonaawo Jeso wakabweza shinkwa shesho shosanwe utuswi tobile, wakalyaalala kwizeulu washilonjezha, amane washikomauna. Wakabapa ba shiciiya bakwe kwaamba babaabanye bantu mutukamu.

¹⁷ Boonse bantu bakalya bakekuta. Ba shiciiya bakabwezelela bufwefwelenga bakezuzha shinzuma shili ikumi ushitwesha shobile.

Pita Waamba ati Jeso Munanike waka Leza

¹⁸ Ciindi cimwi Jeso kali mwini ice ulakomba, ba shiciiya bakeza kwakwe. Wakababuzha ati, “No bantu balaamba ati ume ndime ni?”

¹⁹ Abo bakamwiingula ati, “Bamwi balaamba ati ndiwe Johani Mupapatizhi. Bamwi balaamba ati ndiwe mushinshimi Elaija. Ulimwi bamwi balaamba ati uli umwi wabashinshimii bakale kale uwakabuka ku bafwu.”

²⁰ Jeso wakababuzha ati, “No umwe mulaamba ati ndime ni?” Pita wakaingula ati, “Ndiwe Munanike wa Leza.”

Jeso Waamba sha Mapenzhi u Lufwu Lwakwe

²¹ Jeso wakabalailila ba shiciiya bakwe ati batashimwini muntu naaba womwi aza makani pe.

²² Ulimwi wakaamba ati, “Mwanaa Muntu ulyeelele kupenga mu shintu shinji shinji ukukakwa ubakando, u bapaizhi bakando u balembi. Ulakayayiwa, pele buzuba bwatatu ulakabushiwa.”

²³ Ngoonaawo Jeso wakabaambila boonse ati, “Na kuti muntu ulazanda kuncilila, aliimye, abweze ciciinkano cakwe mazuba oonse ukuncilila.

²⁴ Nkaambo kufwumbwa muntu uzanda kuzobola bumi bwakwe, ulakabusowa. Pele muntu usowa bumi bwakwe ukaambo kangu ulakabuyana.

²⁵ No muntu ulayana impinduunzhi, kuti wahuba inshi yoonse, amana wazhimininwa bumi bwakwe nikuba kubuzonauna? Kwiina pe!

²⁶ Ubobo, kufwumbwa muntu uusa insoni kukaambo kangu u makani angu, aze Mwana muntu ulakamuusila insoni akeza mu bulemu bwakwe, umubulemu bwa ushi u baanjelo basalala.

²⁷ Cini cini ndamushimwina ati nkubali bamwi ano batakaafwi kabatana kubona Bwami bwa Leza.”

Kusanduka kwa Mubili wa Jeso Alupili

²⁸ Kwiite mazuba ali lusele kuhwa nakaamba aza makani, Jeso wakabweza Pita u Johani u Jemusi munina. Wakaya alupili kuya kukomba.

²⁹ Inzho naakaakucikomba, ciwa cakwe cakasanduka, ushakusama shakwe shakatuba buu!

³⁰ Ndilyona ndilyona kwakabulika balombwana bobile ba Mozesi u Elaija bakaakubandika u Jeso.

³¹ Bakabonwa mu bulemu bwa kwizeulu balabandika u Jeso makani a lufwu lwakwe ndwaakaafwa ku Jelusalemu.

³² Pita u beenzhiina kabali mutulo, pele nibakashinshimuka, bakabubona bulemu bwaka Jeso u balombwana babo bobile mbakaakuzhimine abo.

³³ Ciindi balombwana baba nibakaakuzanda kuya, Pita wakamwaambila Jeso ati, “Mwiiyi, cabota kwaamba tuli ano abusena! Tulazaka shifwutu shotatwe, cimwi cilaba cako, cimwi cibe caka Mozesi, cimwi cibe caka Elaija.” Pele Pita katacizhi ncakaakwaamba.

³⁴ Naakaakucaamba, ikumbi lyakeza kubahumba. Ba shiciiya bakatiya cini cini ikumbi nilyakabahumba.

³⁵ Kwakwahwa izwi mwikumbi lyaamba ati, “Wezu ngu mwanangu nakufwunwa ngundakasala noomuteelele.”

³⁶ Limane kwaamba izwi, Jeso wakashaala mwini ice. Ba shiciiya bakaliinza wii! Kwiina muntu naaba womwi ngubakaambila aza makani aceco cakacitika ncibakabona.

Jeso Wamuponya Mweembezhi Uunjililwe Moza Mubiyabi

³⁷ Mu buzuba bwakacilila, bakaseluka alupili. Inkamu inkando yakamuswaanganya Jeso.

³⁸ Ngoonaawo umwi mulombwana wakaakuli mukati munkamu wakoompolola ati, “Mwiiyi mufwile luse mwanangu ndakulomba nkaambo ngu mwanangu ice nana.

³⁹ Ulanjilwa moza mubiyabi mukali. Ulamulizha ulamucina anshi ukumuwizula ukumukusha injohwu ku mulomo. Ulamupenzha ukumucisa tamuleka pe.

⁴⁰ Ndakabalomba ba shiciiya bako kwaamba bookushe moza mubiyabi wezu pele bakakacilwa.”

⁴¹ Ngoonaawo Jeso wakaamba ati, “Akaka umwe nubantu bazumu mitwi, umutashomi. Ndakala amwe ciindi cilamfwu buti?” No ndamupengela ciindi cili buti? Mulete kono mwanako.

⁴² Mweembezhi wezo nakaakwiza kwa Jeso, moza mubiyabi wakamunjila, wamucinina anshi wakanka kusansa. Inzho Jeso wakoolemanina moza mubiyabi, wamuponya mweembezhi ukumupilusha kwa ushi.

⁴³ Bantu boonse shakabazoosha sheshi insana inkando sha Leza shakuponya. Bantu nibakaakucizhinjilwe ku shintu sheshi shakacitika, Jeso wakabaambila ba shiciiya bakwe ati,

Jeso Waamba sha Lufwu Lwake Ulimwi

⁴⁴ “Amwaateeleleshe mazwi azo ngunzanda kumwaambila! Mwanaa Muntu ulakaabwa kumatashi a bantu.”

⁴⁵ Pele bantu bayina nibakezhiba ncakaakwaamba. Nkaambo kaasesekelwe kwaamba batateelelesha. Ubobo bakatiya kumubuzha.

No Nguni Mukando?

⁴⁶ Kwakaba kukazhanya akati ka bashiciiya ba Jeso mukaambo kakuti nguni mukando akati kabo.

⁴⁷ Pele Jeso wakeezhiba mizeezo yaakuli mu myonzo yabo. Wakaleta kana wakazhimika afwaafwi,

⁴⁸ amane wakabaambila ati, “Kufwumbwa muntu utambula kana kaka mwizhina lyangu, ati ndime ngwaatambula. Ulimwi aze untambula, ati wamutambula Taata wakantuma. Wezo ngumutelaicila ati wiina mbwaabele akati kenu, ngu mukando.”

Ngumutalwi aze ati mulyaaze

⁴⁹ Inzho Johani wakaamba ati, “Mwami, twakabona muntu umwi ulakusha myoza mibiyabi mwizhina lyako, pele twakamukasha kaambo takucilila ukoya mbutukucilila uswe.”

⁵⁰ Pele Jeso wakamwaambila Johani ati, “Mutamukasha, kaambo wezo ngumutalwi aze ati mulyaaze.”

Basamaliya Bakaka Kumutambula Jeso

⁵¹ Inzho nicakashika afwaafwi ciindi ca kwaamba Jeso atolwe kwizeulu, wakakanka kukanza kuya ku Jelusalemu.

⁵² Wakatuma banshinkombe bamwi kwaamba baye kumbele lyakwe, bakaya kunjila mu munzhi wa Samaliya kwaamba bamululamikile shintu shoonse.

⁵³ Pele bantu ba mu munzhi wezo bayina nibakamutambula Jeso, kaambo bakazhiba ati ulaya ku Jelusalemu.

⁵⁴ Inzho ba shiciiya bakwe ba Jemusi u Johani nibakabona bobo, bakamwaambila Jeso ati, “Mwami, sa ulazanda toompolole mulilo kuhwa kwizeulu kuzonaula bantu baba?”

⁵⁵ Jeso wakacebuka wabalemanina ba shiciiya.

⁵⁶ Ngoonaawo bakaitilila baya mu munzhi unji.

Bantu Beelele Kucilila Jeso

⁵⁷ Nibakaakuya bweenda munzhila, muntu umwi wakamwaambila Jeso ati, “Ndakucilila kufwumbwa nkuukaya.”

⁵⁸ Pele Jeso wakamwaambila ati, “Ba mwaaba balikwete mena, bazuni balikwete shitaanto, pele Mwanaa Muntu wiina aakoona pe.”

⁵⁹ Jeso wakamwaambila muntu umwi ati, “Ncilila.” Pele muntu wezo wakaamba ati, “Mwami, ndaakuzanda ati ntaangune nje ku munzhi nkazhike taata.”

⁶⁰ Pele Jeso wakamwiingula ati, “Baleke bafwu bazhike bafwu nokwabo. Uwe koya ukakambauke makani a bwami bwa Leza.”

⁶¹ Ulimwi umwi muntu wakaamba ati, “Ndakucilila Mwami, pele ntaangune nje nkalaye bakwesu.”

⁶² Jeso wakamwaambila ati, “Kwiina muntu ucita ati, akanka kulima iiyamba ulalanga munshi uyelele bwami bwa Leza.”