Luka 8 - Izwi lya Leza

Bamakaintu Bakaakucilila Jeso

¹ Nikwakaita ciindi, Jeso wakabweza lweendo lwa kuya mu minzhi mikando umishoonto kuya bukambauka Makani Mabotu a bwami bwaka Leza. Abo bali ikumi ubatwesha bobile bakaya aze,

² kubicilizha u bakaintu bamwi mbakakusha myoza mibiyabi umbaakaponya malwazhi, mazhinaabo ngaaza, Maliya uwakutewa ati Magadalena, uwakakushiwa myoza mibiyabi iili ciloba,

³ u Jowana muka Cuuza, wakaakuli mukando wabasebezhi ba mwami Helodi. U Suzana ubamwi banji banji bakaakumuyohwa Jeso u ba shiciiya bakwe kwiita mu mbono shabo.

Cikozhano ca Shikuminza

⁴ Inzho bantu banji banji bakahwa mu minzhi yaandeene andeene bakabungana. Jeso wakabaambila mucikozhanyo ati,

⁵ “Shikuminza wakaya ukuminza imbuto, inzho naakaminza, imbuto shimwi shakawila munzhila, shakalyataukwa ulimwi bazuni bakashilya.

⁶ Shimwi imbuto shakawila ebwe aakaakuli ihu ishoonto. Mbushakahwila bulyo shakakanka kukusa shakabula mushiwe.

⁷ Shimwi imbuto shakawila mu meya, meya akakulila antoomwi ushishango shesho, akashiyasa ukushishaanicizha.

⁸ Shimwi imbuto shakawila mwihu ibotu, shakakomena ukweela micelo, shakahula shaba mwaanda.” Inzho Jeso wakamanizha ukoompolola ati, “Ukwete matwi naateelele!”

Muzeezo wa Cikozhano

⁹ Ba shiciiya bakwe bakamubuzha ncicaamba cikozhanyo ceci.

¹⁰ Jeso wakabaambila ati, “Umwe mwakapewa luzhibo lwamaseseke a bwami bwaka Leza. Pele bantu bamwi, balaambilwa shintu shoonse mushikozhanyo shaloolona. ‘Kwaamba nibabona batabonesha, nibateelela batateelelesha.’”

Jeso Wapandulula Cikozhano ca Shikuminza

¹¹ “Inzho mbubolya mbucaamba cikozhanyo. Imbuto ndizwi lyaka Leza.

¹² Imbuto shakawila munzhila, mbantu balya bacita ati, baateelela bulyo mazwi, Shaatani weza kubananga kwaamba atenjili mu myonzo, yabo batahumina ukufwutulwa.

¹³ Shesho shakawila mwihu lili ebwe shilaamba bantu bafwumbi baateelela mazwi a Leza balaatambula ca kubotelwa, pele mazwi tanjili mu myonzo yabo, balahumina ku ciindi cishoonto bulyo, pele masukusho ashika balawa.

¹⁴ Shesho shakawila mu meya shilaamba bantu babo bateelela izwi lya Leza, pele balazandisha shintu shaano anshi, mizeezo, buhubi, ukulibotezha mu bumi, sheshi shintu shilabashaanicizha cakuti micelo yabo teebizwa.

¹⁵ Imbuto shakawila mwihu ibotu shilaamba bantu bateelela mazwi ukwaazobola mu myonzo mibotu iteelela. Ubobo balaakwatisha cini cini mpaka baya kuzhala micelo ca buuza.”

Cikozhano ce Lambe

¹⁶ “Kwiina muntu usonsa ilambe amana walihunikila intumba, na kulibika umisena yabulo. Pele ulalibika acibicilo kwaamba limunikile boonse banjila muŋanda.”

¹⁷ “Nkaambo kwiina cintu ciseseke citakaazubululwa, niciba cakuhwiya citakaateelelwa.”

¹⁸ “Ubobo amucenjele mbumuteelela, nkaambo muntu uunteelela ulakazunjililwa, pele muntu uutanteeleli ulakanangwa ukashoonto nkaatelaika ati ulikwete.”

Baina u Banina Jeso

¹⁹ Inzho baina u banina Jeso bakeza nkwaakaakubele, pele kabatalozha kushika afwaafwi nkaambo kakuhula kwa bantu.

²⁰ Inzho umwi muntu wakamushimwina Jeso ati, “Banoko u banyoko mbubalya balizhimine ansengwe balazanda kukubona.”

²¹ Jeso wakaingula ati, “Baama u bakwesu mbubabo bateelela izwi lya Leza u kulicita.”

Jeso Walyuumuzha Iwuwo u Meenzhi

²² Bumwi buzuba Jeso wakanjila mu bwato antoomwi u ba shiciiya bakwe. Wakabaambila ati, “Atulanduke kumutala wezhiba.” Ngoonaawo bakashikula bwato bakakanka kuya.

²³ Bwato nibwakaakuya bweenda ameenzhi Jeso wakoona. Inzho kwakaunga iwuwo, u mankutisha akabuuma bwato awo meenzhi akakanka kunjila mu bwato, ba shiciiya bakapenga cini cini.

²⁴ Ngoonaawo ba shiciiya bakaya kumubusha Jeso ati, “Mwami, Mwami tukalafwa!” Jeso naakabuka wakalilemanina iwuwo u mankutisha, ndilyona kwakaliinza wii!

²⁵ Ngoonaawo Jeso wakababuzha ba shiciiya ati, “No ndulikwi lushomo lwenu?” Pele balo kabatiile ukuzoowa cini cini, bakaamba ati, “No wezu muntu uli buti? Muuwo u mankutisha shilamuteelela!”

Jeso Wakusha Myoza Mibiyabi Minji Minji mu Muntu

²⁶ Inzho Jeso u ba shiciiya bakwe bakaya kushoka ku cishi ca Gelasini cilangene u cishi ca Galilaya.

²⁷ Jeso mbwaakamuhwila bulyo mu bwato, wakaswaanganya muntu wakahwa mu munzhi. Wezu muntu kenjililwe myoza mibiyabi. Shiindi shinji shinji katasama, ulimwi katakala mu munzhi pele kayanika bulyo kunamaumbwe ciindi coonse.

²⁸ Inzho nakamubona Jeso wakoompolola iizwi ikando ati, “Uwe Jeso, Mwanakwe Leza Namakungwe Mutalabala ulazanda kuncita buti? Akaka ndakukomba utampenzha pe!”

²⁹ Wakaamba bobo kaambo Jeso wakaambila myoza mibiyabi kwaamba ihwe mu muntu wezo. Shiindi shinji shinji keemupenzha myoza mibiyabi yezhi, kalindililwa kumwi ulyaanjilwe inceetani iinshimbi kumatashi ukumaulu pele kashikosaula, ulimwi myoza mibiyabi keemutola mulukula.

³⁰ Inzho Jeso wakamubuzha ati, “No ndiweni izhina lyako?” Walo wakamwiingula ati, “Ndime makamu.” Wakaamba bobo kaambo kenjililwe myoza mibiyabi minji minji.

³¹ Myoza mibiyabi yakamupumpa Jeso kwaamba ateetandili kubusena bwa bafwu.

³² Inzho afwaafwi u busena bobo kakuli butanga bwa ngulube bwa kaakucela kumbali ku lupili. Ubobo myoza mibiyabi yakamupumpa Jeso ati eehuminye kuya kunjila mu ngulube. Jeso wakebaleka yaya.

³³ Myoza mibiyabi yakahwa mu muntu wezo yaya kunjila mu ngulube. Butanga boonse bwa ngulube bwakakunkulucila umukonka wezhiba ikando, ukufwila mu meenzhi.

³⁴ Beembezhi nibakabona cakacitika, bakalukanka baya kukanana mu minzhi uumatungu.

³⁵ Bantu bakaya kubona ceco cakacitika. Nibakashika kwa Jeso bakayana muntu wezo wakakushiwa myoza mibiyabi uli kabotu ulishite afwaafwi u Jeso ulisamine kabotu, ubobo bakatiya.

³⁶ Babo bakaakuliwo, bakapandulula mbucaacitika.

³⁷ Inzho inkamu ya bantu boonse ba mucishi ca Gelasini yakamupumpa Jeso kwaamba amuhwe mucishi cabo. Bukandu bunji bunji bwakabakwata, ubobo Jeso wakenjila mu bwato kwaamba apiluke.

³⁸ Inzho muntu wezo wakakushiwa myoza mibiyabi wakamupumpa Jeso ati, “Ndalomba tuye aze.” Pele Jeso wakamwaambila ati,

³⁹ “Pe pe, koya ku munzhi ukabaambile bantu shoonse shintu nshaakucitila Leza.” Ngoonaawo wezo muntu wakaya mu munzhi woonse kuya bukanana shintu nshaakamucitila Jeso.

Mushimbi Mufwu u Mukaintu Mulwazhi

⁴⁰ Inzho Jeso nakapiluka kuhwa kumutala wezhiba, bantu bakamutambula ca kubotelwa kaambo boonse ngubakaakulindila.

⁴¹ Kwakeza mulombwana uutewa ati Jailosi, kali mweendelezhi wa cikombelo caba Juda. Wakamufwukamina Jeso ukumupumpa kwaamba baye aze kwakwe.

⁴² Jailosi kakwete mwana mushimbi wamyaka iili ikumi iitwesha yobile. Wezu mwana kali mulwazhi ca lufwu. Inzho Jeso nakaakuya bweenda, inkamu ya bantu keemuzhingulukile.

⁴³ Kakuli mukaintu umwi wakaakusata kalobola kwa myaka iili ikumi itwesha yobile. Wakasowa lubono lunji lunji kubashilishi, pele kakwiina muntu naaba womwi wakaakukonzha kumuponya.

⁴⁴ Ubobo wezo mukaintu wakeza kumanuma kwa Jeso akati ka bantu bakaakumuzhingulukile wakwata kumubundo wacisani ca Jeso. Ndilyona ndilyona bulowa bwakaleka kuhwa.

⁴⁵ Inzho Jeso wakabuzha ati, “No nguni wankwata?” Bantu boonse bakakazha, Pita wakaamba ati, “Mwiiyi, ulabuzha wakukwata, sa tubwene bantu mbubakushaanikizhizhe!”

⁴⁶ Pele Jeso wakaamba ati, “Nkwaali wankwata, kaambo ndashiteelela insana shamuhwa.”

⁴⁷ Inzho mukaintu wezo naakabona kwaamba takonzha kuzuba, wakaya ulazhangama kwa Jeso cabukandu, wafwukama kumatende akwe wapandulula ku bantu boonse ncakamukwatila, ulimwi umbwaakapona ku ciindi ncicona.

⁴⁸ Jeso wakamwaambila ati, “Mwanangu, kushoma kwako kwakuponya. Koya muluumuno.”

⁴⁹ Jeso naakaakucaamba, kwakeza muntu umwi wakahwa kuŋanda ya Jailosi waamba ati, “Utamupenzha bulyo Mwiiyi, mwanako wafwa kale.”

⁵⁰ Pele Jeso nakateelela bobo, wakamwaambila Jailosi ati, “Utatiyi shoma bulyo mushimbi ulaba kabotu.”

⁵¹ Inzho Jeso nakashika kuŋanda ya Jailosi, wiina kubahuminya bantu boonse kwaamba benjile, cita bulyo Pita u Johani u Jemusi u ushi u baina mwana.

⁵² Boonse bantu bakaakuliwo, bakaakulila ukutengula ukaambo kalufwu lwa mushimbi. Pele Jeso wakabaambila ati, “Mutamulila kaambo wiina kufwa uloona.”

⁵³ Bantu bakamuseka Jeso kaambo kabezhi ati mushimbi wafwa.

⁵⁴ Ngoonaawo Jeso wakamukwata kumatashi woompolola ati, “Buka mwanangu!”

⁵⁵ Inzho moza wakwe wakapiluka, ngoonaawo mwana wakazhimuka. Jeso wakabaambila ati nomupe cakulya alye.

⁵⁶ Bakwabo bakazoowa cini cini, pele Jeso wakabalailila ati kutabi muntu ngumwaambila cintu ceci cacitika.