Luka 5 - Izwi lya Leza

Jeso Weta ba Shiciiya Bakutaanguna

¹ Bumwi buzuba Jeso kazhimine kumbali kwihiba lya Genesaleti. Inzho kwakabungana bantu banji banji bakaakuzanda kuteelela izwi lya Leza.

² Jeso wakabona mato obile alishokele. Bazezhi kabatemo mu mato, kabasanzha tunyandi twabo.

³ Inzho Jeso wakenjila mu bwato bumwi bwakaakuli bwaka Saimoni. Wakamulomba ati abushikule bukuhwe ashoonto kumuuma. Jeso wakakala mu bwato wakakanka kuyiisha bantu.

⁴ Nakamana kuyiisha wakamwaambila Saimoni ati, “Katuya akati kezhiba kwaamba mukawaale tunyandi twenu mukwashe inswi.”

⁵ Saimoni wakaingula ati, “Mwami, twazela mashiku oonse aza, pele kwiina ncitwayaya. Pele kucilila mazwi ako, ndatuwaala tunyandi.”

⁶ Nibakacita mbubakashimwinwa, bakayaya inswi shinji shinji, tunyandi twabo atitukazapuke.

⁷ Ngoonaawo bakoobola bazezhi nokwabo bakaakuli mu bwato bumwi kwaamba bezhize kubayohwa. Bakazuzha mato oonse obile iinswi cakuti, mato kazanda kuloba kaambo kanswi.

⁸ Saimoni Pita abone bobo, wakamufwukamina Jeso waamba ati, “Swena kulaale ame Mwami, kaambo ume ndi muntu shishibi.”

⁹ Saimoni ubeezhiina bakazoowa cini cini ukaambo kakuhula kwanswi shesho nshibakakwasha.

¹⁰ Abo bazezhinina Saimoni, ba Jemusi u Johani banakwe Zebedi bakazoowa. Jeso wakamwaambila Saimoni ati, “Utatiyi, kaambo kuhwa bwasunu ulaba muzezhi wa bantu.”

¹¹ Bakashosha mato abo a mulando. Bakashiya shintu shoonse, bacilila Jeso.

Jeso Waponya Mulombwana Mulwazhi Cinsenda

¹² Ciindi cimwi Jeso kalyuumunzhi umwi mwakaakuli mulombwana wakaakuli mulwazhi cinsenda mubili oonse. Inzho muntu wezo naakamubona Jeso wakamufwukamina u kumukumbila ati, “Mwami, ndizhi ati ulikwete insana shakumponya, mponya na ulazanda!”

¹³ Jeso wakahungulula itashi lyakwe wamwaampa, waamba ati, “Ee ndazanda. Pona!” Ngoonaawo shicinsenda wakapona.

¹⁴ Inzho Jeso wakamulaililisha cini cini ati, “Utashimwini muntu naaba womwi, pele koya ukalitondezhe ku mupaizhi, wamana ukape cipaizho cabusalazhi bwako, umbona mbwaakalailila Mozesi kwaamba cikabe citondezho ku bantu boonse ati wapona.”

¹⁵ Nikuba bobo impuwo yaka Jeso yakazuwa mucishi coonse. Ulimwi bantu banji banji bakeza kwakwe kuteelela ukushilikwa malwazhi abo.

¹⁶ Pele Jeso wakabashiya waya kubusena buliibile kuya kukomba.

Jeso Waponya Mulema

¹⁷ Bumwi buzuba Jeso naakaakuyiisha, ba Falisi bamwi u ba maayi ba mulawo, bakahwa kuminzhi yoonse ya mucishi ca Galilaya uya Judiya, ulimwi ukumunzhi wa Jelusalemu. Insana sha Mwami shakaakuliwo shakwaamba Jeso aponye balwazhi.

¹⁸ Inzho kwakeza bantu bamwi bakaakuzemwine muntu mulema amacila, bakasoleka kumunjizha muŋanda kwaamba bamooneke kumbele kwa Jeso.

¹⁹ Ukaambo kakuhula kwa bantu, bakakacilwa. Ubobo bakaliza alululi lwa ŋanda, baluhumbula bamane bamuselusha ca kumulenjezha amacila akati ka bantu ku bushu bwa Jeso.

²⁰ Jeso naakabona kushoma kwabo, wakaamba ati, “Shibi shako shalecelelwa mulongwaangu.”

²¹ Balembi u ba Falisi bakakanka kubuzhanya mulwabo ati, “Anu nguni wezu usampula Leza? Kwiina muntu ukonzha kulecelela shibi shabantu, cita Leza mwini ice.”

²² Inzho Jeso wakaazhiba matelaishi abo, wakabaambila ati, “No mulalibuzhabuzhaanzhi mu myonzo yenu?

²³ Nciciliye cuuba uba, u kwaamba ati, ‘Shibi shako shalekelelwa,’ na ati, ‘Zhimuka uyende?’

²⁴ Inzho ndamutondezha kwaamba ati Mwanaa Muntu ulikwete insana shakulecelela shibi shabantu ano anshi.” Amane Jeso wakamwaambila mulema ati, “Zhimuka ubweze macila ako, koya kwako.”

²⁵ Ngoonaawo wakazhimuka boonse balimulanjilile, wabweza macila akwe waya kwakwe ulaya butembaula Leza.

²⁶ Boonse bantu bakazoowa cini cini, ulimwi bakatiya, bakatembaula Leza ati, “Ubwasunu twabona shintu nshitutanabwene!”

Jeso weta Levi

²⁷ Munshi lyaaza, wakahwa ansengwe, inzho wakabona shimutelo uutewa ati Levi, kali amulimo wakwe. Jeso wakamwaambila ati, “Ncilila.”

²⁸ Ngoonaawo Levi wakazhimuka, wakashiya shisebezho shakwe shoonse wakamucilila Jeso.

²⁹ Inzho Levi wakacitila Jeso ipobwe ikando kuŋanda yakwe. Kakuli bashimitelo banji banji u bantu bamwi mbakaakukala abo.

³⁰ Ba Falisi u balembi bamwi, bakatongaucila ba shiciiya ba Jeso ati, “Nkaamboonzhi ncimulya u kunwa antoomwi ubashimutelo u bashishibi?”

³¹ Jeso wakabaingula ati, “Bantu bazumu tabazanda mushilishi, cita balwazhi.

³² Ndiina kuzhila balulami, pele ndakezhila ba shishibi kwaamba basanduke.”

Mubuzho Wakuliimya Kulya

³³ Bamwi bantu bakamwaambila Jeso ati, “Ba shiciiya baka Johani balaliimya kulya shiindi shinji shinji, ulimwi balakomba. U ba shiciiya baba Falisi balacita umbona bobo, pele bako balalya u kunwa.”

³⁴ Jeso wakabaingula ati, “Sa mulakonzha kushinicizha beenzhiina shikutwala kutalya ciindi mukamwini bwinga aakulyaabo? Pe pe tamukonzha!

³⁵ Pele cilakashika ciindi shibwinga nibakaamubweza, indilyo lelyo nibakaaliimya kulya.”

³⁶ Inzho Jeso wakabaambila cikozhanyo ulimwi ati, “Kwiina muntu uuzapula namaapi kucisani cipiya ukumusasa acisani cikulukulu. Acita bobo ati wazonauna cisani cipiya, unamaapi takeendelana kabotu u cisani cikulukulu.

³⁷ Ulimwi kwiina muntu uutuntila waini mupiya munkomo yesalu inkulukulu. Kuti wacita bobo, wezo waini mupiya ulaandula inkomo yesalu inkulukulu, waini ulasoomokela anshi, asho inkomo shilazonauka.

³⁸ Pele waini mupiya ulabikwa munkomo yesalu impiya

³⁹ Ulimwi kwiina muntu uzanda kunwa waini mupiya amana kunwa mulala, kaambo ulaamba ati wakale kale ulabaala kubota.”