Luka 4 - Izwi lya Leza

Kutepaulwa kwa Jeso

¹ Inzho Jeso wakahwa ku lweenje lwa Joodani, ulizwile Moza Usalala, ulimwi wakasololelwa u Moza Usalala kuya mulukula.

² Momo mwaakatepaulwa u Shaatani kwa mazuba ali makumi one. Coonse ciindi ceco kwiina ncaakaakulya, ubobo wakafwa inzala.

³ Inzho Shaatani wakaambila Jeso ati, “Waakuli Mwana Leza, ambila ibwe leli libe cinkwa.”

⁴ Pele Jeso wakamwiingula ati, Kulilembelwe mu maŋwalu ati, “Muntu taponi kucinkwa caloolona.”

⁵ Ulimwi Shaatani wakamutola abusena buli ezeulu wamutondezha shishi shaanshi ku ciindi cishoonto bulyo u kumwaambila ati,

⁶ “Bwami bwashishi shoonse sheshi ndakupa antoomwi u bulelo u bulemu bwasho, kaambo ndakapewa, ndikwete insana shakubupa ku muntu oonse ngundazanda.

⁷ Kuti uwe wanfwukamina u kunkomba, bulelo bobu boonse ndakupa.”

⁸ Jeso wakamwiingula ati, “Kulilembelwe mu maŋwalu ati, ‘Ukombe Mwami Leza wako, walo ice nana nguuyelele kumanina milimo.’”

⁹ Inzho Shaatani wakamutola ku Jelusalemu wamulizika a cisunswa ca ŋanda ya Leza, amane wamulailila ati, “Waakuli Mwana Leza liwaale anshi.

¹⁰ Nkaambo kulilembelwe mu maŋwalu ati, ‘Leza ulakalailila baanjelo bakwe kwaamba bakakukape.’

¹¹ Ulimwi kulilembelwe mu maŋwalu ati, ‘Balakakuzemuna mu matashi abo kwaamba utakalifwumpuli kwibwe.’”

¹² Jeso wakamwaambila ati, “Ulimwi kulilembelwe mu maŋwalu ati, ‘Utasukusha Mwami Leza wako.’”

¹³ Inzho Shaatani naakamana kumutepaula mu shiyanza shoonse wakamushiya kwa ciindi cishoonto bulyo.

Jeso Wakanka Mulimo Wakwe mu Galilaya

¹⁴ Inzho Jeso wakabweela ku Galilaya, kakwete insana sha Moza Usalala. Impuwo yakwe yakazuwa mucishi coonse.

¹⁵ Kayiisha mu shikombelo shaba Juda, ulimwi bantu boonse bakamulemeka.

Jeso Wakakwa mu Nanzaleta

¹⁶ Jeso wakashika ku Nanzaleta koko nkwaakakomenena, inzho mu buzuba bwa kulyoocezha bwa Sabata, wakaya ku cikombelo caba Juda umbona mbwakaakucita lyoonse, wakazhima kwaamba abale maŋwalu.

¹⁷ Inzho bakamutambika ibuka lya mushinshimi Aizaya. Wakalihungulula wayana a cibalo aalembelwe ati,

¹⁸ “Moza wa Mwami uli mulyuume, nkaambo wananika kwaamba, nkambaukile bapushi makani mabotu. Wakantuma kwaamba baanjilwe baangululwe, Boofwu babone, bapenzhewa bahunwe.

¹⁹ Wakantuma kwaambilizha ati ciindi cibotu ca Mwami cashika.”

²⁰ Amane Jeso wakalihunga ibuka wakamutambika mubanzhi wa cikombelo caba Juda amane wakala. Bantu boonse bakaakuli mucikombelo bakamulanjilila.

²¹ Inzho wakabaamba ati, “Ubwasunu cibalo ceci cazuzucizhiwa umbona mbumwateelela nicaakubalwa.”

²² Bakamulumbaizha bantu boonse, ulimwi bakazoowa mbwakaakubandika ca busongo. Bakaamba ati, “Sa wezu muntu ingwe mwanakwe Jozefu?”

²³ Jeso wakabaambila ati, “Cini cini kamweelela kashimi kakuti, ‘Mushilishi lishilice umwini.’ Shoonse nshitwakateelela shakacitwa mu Kapenaumi, shicite umono umbanamuzeenu.”

²⁴ Ulimwi wakabaambila ati, “Cini cini ndamushimwina ati, kwiina mushinshimi uutambulwa mucishi ca kwabo.”

²⁵ “Pele cini cini ndamushimwina ati, ku mazuba a Elaija kakuli bamuka bafwu bapenzhi banji banji mucishi ca Izilaili, ciindi ceco kwakaba inzala mucishi coonse, kaambo inhula ina niyakawa kwa myaka yotatwe umyezhi iili cisambomwi.

²⁶ Pele Elaija takatuminwe kuli naaba womwi wabo, pele wakatumwa kumukamufwu waku Zelefati mucishi ca Sidoni.

²⁷ Ulimwi kamuli bashicinsenda banji banji mucishi ca Izilaili mu mazuba a mushinshimi Elisha, pele kwiina naaba womwi wabo ngwaakaponya, cita bulyo Namaani waku cishi ca Siliya.”

²⁸ Inzho nibakateelela bobo bantu boonse mucikombelo caba Juda bakalemana cini cini.

²⁹ Bakazhimuka bakamukusha mu munzhi Jeso bamukulaanya kutola alupili awo nguwaakuzacilwe munzhi wabo, kwaamba bakamuwaale ankomwenena.

³⁰ Pele walo wakaita akati kabo waya wabashiya.

Jeso Waponya Mulombwana Uukwete Moza Mubiyabi

³¹ Inzho Jeso wakaya ku Kapenaumi, munzhi uuli mucishi ca Galilaya, koko wakayiisha bantu mu Sabata.

³² Bantu boonse bakazoowa kuyiisha kwakwe kaambo mazwi aakwe kakwete insana sha bwami.

³³ Mucikombelo caba Juda kamuli muntu wakaakunjililwe moza mubiyabi. Wezo muntu wakoompolola iizwi ikando ati,

³⁴ “No twakucitaanzhi u Jeso u Munanzaleta? Sa weza kutuzonauna? Ndikwizhi, ndiwe Usalala mutumwa wa Leza.”

³⁵ Ngoonaawo Jeso wakoolemanina moza mubiyabi ati, “Liinze! Hwa mu muntu wezu!” Inzho muntu wezo wakasuntuka wawila anshi, moza mubiyabi wakamuhwa wiina niwakamucisa pe.

³⁶ Bantu boonse bakazoowa ukubuzhanya ati, “Anu makaninzhi aza? Ulalailila myoza mibiyabi ca nsana u bwami, ayo ilamuteelela ulimwi ilahwa.”

³⁷ Inzho impuwo yaka Jeso yakazuwa moonse mucishi ceco.

Jeso Waponya Bantu Banji Banji

³⁸ Inzho Jeso wakahwa mucikombelo caba Juda waya kunjila muŋanda yaka Saimoni. Bainazhala Saimoni kali mulwazhi mubili, inzho bakamulomba Jeso kwaamba amuponye.

³⁹ Ngoonaawo wakaya kuzhima afwaafwi ubulo wakaambila mubili ati upone. Ndilyona ndilyona mulwazhi wakapona, wazhimuka wakanka kubafwutaukila.

⁴⁰ Kumabililo ezuba, bantu boonse bakaakukwete balongwaabo basata malwazhi andeene andeene, bakabaleta kwa Jeso, aze wakababika matashi aakwe wakabaponya.

⁴¹ Ulimwi wakakusha myoza mibiyabi mubantu banji banji. Kabaya bupozomoka ati, “Ndiwe Mwana Leza!” Pele wakabakasha ulimwi katabahuminya kwaamba, kaambo kabamwizhi ati ngu Kilisito.

Jeso Wakambauka mu Shikombelo shaba Juda

⁴² Nibwakaca Jeso wakamuhwa mu Kapenaumi wakaya kubusena buliibile. Bantu bakakanka kumukapula. Nibakamuyana bakasoleka kumushinicizha ati atayi kunji.

⁴³ Pele walo wakabaambila ati, “Ndyeelele kukambauka Makani Mabotu aabwami bwa Leza u minzhi iinji, kaambo ceco ncaakantuma Leza kwiza kucita.”

⁴⁴ Ubobo wakakambauka mu shikombelo shaba Juda mucishi coonse.