Luka 24 - Izwi lya Leza

Jeso Wabuka ku Bafwu

¹ Mu buzuba butaanzhi bwa nsunda cifwumo fwumo, bakaintu bakaya ku cuumbwe, bakabweza umafwuta aanunka kalonze ngubakaakubambile.

² Bakayana ati ibwe lyakakushincilwe acuumbwe ndikunkulushe.

³ Ubobo bakanjila mu cuumbwe, pele bakayana ati mutunta wa Jeso kootemo.

⁴ Bacizhinjilwe ku makani aza, balombwana bobile basamine shikobelo shibeka beka bakeza kuzhima afwaafwi.

⁵ Bakaintu bakatiya cini cini, bakafwulama balanga anshi, balombwana babo bakababuzha ati, “No kaamboonzhi mulakapula mumi akati kabafwu?”

⁶ Temo mono wabuka! Amuzhibaluke mbwaakamushimwina naakucili mu Galilaya ati,

⁷ “Mwanaa Muntu ulyeelele kwaabwa mu matashi a bantu ba shishibi, ukuyayiwa aciciinkano, ulimwi mu buzuba bwatatu ulakabuka ku bafwu.”

⁸ Ngoonaawo bakaintu bakaazhibaluka mazwi akwe.

⁹ Inzho bakakuhwa ku cuumbwe kuya kushimwina ba shiciiya bakwe bali ikumi uutwesha womwi aza makani, u babo bamwi bakaakumucilila Jeso.

¹⁰ Bakaintu baba kabali ba Maliya Magadalena, u Joana u Maliya baina Jemusi. Inzho baba, u bakaintu bamwi mbucaakuli abo bakaya kukananina batumwa aza makani.

¹¹ Batumwa bayina nibakaashoma makani aza, bakatelaika ati ntwaambo twa musalo wabakaintu.

¹² Pele Pita wakazhimuka waalukancila ku cuumbwe. Naakashika wakasondela, wakabona bulyo shisani shakaakuputilwe mufwu. Wakabweela ku munzhi ulizhinjile kaambo ka ceco cakacitika.

Cakacitika Munzhila yaku Emausi

¹³ Inzho mu buzuba bobo mbubona, balombwana bobile bakaakucilila Jeso, kabaya ku munzhi wa Emausi kuhwa ku Jelusalemu. Mushinzo wezu koolampa bamaile bali baliciloba uutwesha womwi.

¹⁴ Nibakaakuya bweenda munzhila kabaya bubandika makani akacitika mu Jelusalemu.

¹⁵ Nibakaakuya bweenda ukulya musalo, Jeso wakaposhoka, wabeenzha wakanka kuya bweenda abo.

¹⁶ Bakamubona pele bayina kumwizhiba.

¹⁷ Ngoonaawo Jeso wakababuzha ati, “Anu makaninzhi aza ngumuya bwaamba?” Inzho bakazhima bamulanjilila balyeetezha.

¹⁸ Umwi wabo uutewa ati Kiliyopasi wakamubuzha ati, “Sa uwe ndiwe mweenzu ice nana mu Jelusalemu, utashizhi shintu shakacitika ano ngoona mazuba?”

¹⁹ Walo wakabuzha ati, “Anu nshintuunzhi?” Bakamwiingula ati, “Shintu shakacitika kwa Jeso waku Nanzaleta. Wezu muntu kali mushinshimi mukando, ulimwi kayiisha u kucita milimo izoosha ku bushu bwa Leza uku bantu boonse.

²⁰ Pele bapaizhi bakando u beendelezhi ba cishi, bakamwaaba kwaamba apewe mulandu wa lufwu, inzho wakakankaminwa aciciinkano.

²¹ Pele uswe twakaakushoma ati nguukaanununa ba Izilaili. Inzho bwasunu mbuzuba bwatatu kuhwa nicaacitika ceci.

²² Bamwi bakaintu ba munkamu yesu batunzhinga. Bafwuma kuya ku cuumbwe kaacishiyashiya anshi,

²³ pele mutunta wakwe bayina kuuyana mu cuumbwe, nibapiluka baamba ati babona bulyo baanjelo babashimwina ati mumi.

²⁴ Ulimwi bamwi bamunkamu yesu, kabayile ku cuumbwe bayana mbubona mbubaamba bakaintu, pele walo bayina kumubona.”

²⁵ Ngoonaawo Jeso wakabaambila ati, “Umwe nubalimbushi! Umutafwambaani kuhumina shintu shoonse nshibakaamba bashinshimi.

²⁶ Sa sheshi shintu kashiteelele kucitika ku Munanike wa Leza, kwaamba anjile mu bulemu bwakwe?”

²⁷ Kuhwaawo Jeso wakabapandulwila shoonse shilembelwe mu maŋwalu shizeeme kwakwe. Kutalicila kumabuka ngaakalemba Mozesi kuya kushika kuli shesho nshibakalemba bashinshimi.

²⁸ Nibakashika afwaafwi amunzhi ngubakaakuya, Jeso wakacita ukoya shikwiitilila,

²⁹ pele balo bakamukasha baamba ati, “Utayi, bona kwashiya kale izuba lyebila katuya aŋanda.” Ngoonaawo wakayaabo amunzhi.

³⁰ Nibakasengela cakulya, wakabweza cinkwa walumba kwa Leza amane wacikomona wabapa.

³¹ Inzho menso abo akayaluka, bakamuzhiba. Ngoonaawo wakazeluka bulyo waya cakutabonwa linji.

³² Inzho bakaamba beni ubeni ati, “Bwe! Sa mazwi akwe kaatatuyasi naakukanana munzhila, ciindi naakupandulula Malembe?”

³³ Ngoonaawo bakazhimuka babweela ku Jelusalemu, nkubakaya kuyana batumwa bali ikumi uutwesha womwi balibungene antoomwi u bantu bamwi mbucaakuliaabo,

³⁴ balabandika ati, “Cini cini Mwami wabuka! Saimoni Pita wamubona.”

³⁵ Inzho u babo ba shiciiya bobile bakakanka kubapandulwila cakacitika munzhila, umbubakamuzhiba Jeso nakabakomwena cinkwa.

Jeso Walibonya ku Bashiciiya Bakwe

³⁶ Nibakaakucipandulula aza makani, mwini Jeso wakazhima akati kabo ca shibulicila, wabaambila ati, “Luumuno alube amwe.”

³⁷ Pele bakazoowa ukutiya cini cini, kaambo bakatelaika ati babona moza mubiyabi.

³⁸ Inzho wakabaambila ati, “No mwapengaanzhi? Nkaamboonzhi ncimuzuluzha?

³⁹ Amwaabone matashi umatende angu, ndime cacini cini. Amuŋampaampe muteelele ati ndime, kaambo moza mubiyabi wiina mubili ushifwuwa ukoya mbwiinkwete ume.”

⁴⁰ Naakaakwaamba bobo wakabatondezha matashi umatende akwe.

⁴¹ Nikuba bobo bayina nibakahumina kaambo kalutangalo ukuzoowa, inzho wakababuzha ati, “Sa kwiina cakulya ano?”

⁴² Bakamupa citinka canswi inzoce.

⁴³ Wakacibweza walya boonse balimulanjilile.

⁴⁴ Ngoonaawo wakabaambila ati, “Sheshi inshisho shintu nshindakaakumwaambila lelya nindakakuli amwe, nkaambo shoonse shilembelwe mu Mulawo wa Mozesi, umalembe a bashinshimi, umu Ntembauzho, ushaamba ume shilyeelele kuzuzucizhiwa.”

⁴⁵ Naakaamba bobo wakeeyalula mizeezo yabo kwaamba bateeleleshe Malembe ncaamba.

⁴⁶ Wakabaambila ati, “Ceci ncicilembelwe ati, Munanike wa Leza ulyeelele kupenga u kubuka ku bafwu mu buzuba bwatatu,

⁴⁷ ulimwi ati mwizhina lyakwe makani akusanduka u kulecelelwa kwa shibi akambaukwe ku bantu bamishobo yoonse kukancila mu Jelusalemu.

⁴⁸ Umwe muli bakamboni ba shintu sheshi.

⁴⁹ Ulimwi ume ndakamutumina ceco Taata ncakashomezha, pele mulyeelele kulindila mu munzhi mono mpaka insana shihwa kwizeulu shikashice ali umwe.”

Jeso Watolwa Kwizeulu

⁵⁰ Inzho wakabasololela kuya ku munzhi wa Betani, nibakashika koko, Jeso wakatambika matashi akwe wabalonjezha.

⁵¹ Naakaakucibalonjezha wakaandaana abo, wakatolwa mwizeulu.

⁵² Inzho bakamukomba, bamane babweela ku Jelusalemu balibotelelwe cini cini mu myonzo.

⁵³ Ciindi coonse kabanjila muŋanda ya Leza balatembaula Leza.