Luka 23 - Izwi lya Leza

Jeso Wabetekwa kwa Pilato

¹ Boonse bantu banji banji bakazhimuka batola Jeso kwa Pilato.

² Bakakanka kumutamicizha twaambo twakuti, “Twakamuyana ulalengaulila bantu wabasowa, kabaambila ati tabeelele kutela ku muleli mukando Kaizala waku Loma. Ulimwi kaamba ati walo mwini lwakwe ngu mwami munanike.”

³ Pilato wakamubuzha Jeso ati, “Sa ndiwe mwami waba Juda?” Jeso wakaingula ati, “Waamba.”

⁴ Ngoonaawo Pilato wakaambila bapaizhi bakando u bantu banji banji bakaakubungene ati, “Ndiina mulandu ngundamuyanina wezu muntu.”

⁵ Pele balo bakatatanana cini cini ati, “Wezu muntu ulapilinganya bantu, mucishi coonse ca Judiya injiisho yakwe. Wakakancila ku cishi ca Galilaya, inzho nguwezu washika ukono.”

Jeso Watolwa kwa Helodi

⁶ Pilato nakateelela bobo wakabuzha ati, “Sa wezu muntu ngwakucishi ca Galilaya?”

⁷ Inzho naakazhiba ati Jeso kahwa kubusena bwa cishi bwakaakweendelezhiwa u Helodi, wakamutuma kwa Helodi kaambo kali mu Jelusalemu ku ciindi ceco.

⁸ Helodi wakabotelwa cini cini naakabona Jeso, kaambo wiina naakaakumubwene kateelele bulyo impuwo, pele nikuba bobo ku ciindi cilamfwu kazandisha kubona Jeso mbwaacita maleele.

⁹ Ubobo Helodi wakamubuzha Jeso mibuzho minjii minji, pele Jeso wiina nakaingula.

¹⁰ Inzho bapaizhi bakando u balembi bakeza afwaafwi bakakanka kumutamicizha twaambo tuzumuzumu.

¹¹ Ngoonaawo Helodi u bashikalumamba bakamuseka Jeso ukumulimbusha. Bakamusamika cisani ucikobelo cilamfwu cibotu, bamane bakamubweezha kwa Pilato.

¹² Bobu mbubuzuba ba Pilato u Helodi nibakakanka kuteelezhanya, lyoonse kabatazandana.

Jeso Wakosolelwa Kufwa

¹³ Pilato wakabunganya bapaizhi bakando, u beendelezhi ubashicishi boonse.

¹⁴ Inzho wakabaambila ati, “Mwakandetela muntu wezu u kwaamba ati ulapilinganya bantu ukubalengaulila ulimwi wabasowa. Pele ume indamoombolozha ku bushu bwenu, ndiina kumuyanina mulandu nuuba womwi kutwaambo ntumwamutamicizha.

¹⁵ U Helodi wiina kumuyanina mulandu ncamupilushizha kulyuuswe. Kwiina ncaakacita wezu muntu ceelele lufwu.

¹⁶ Ubobo ndamuumya bulyo tulusu, ndamana mwaangulule.”

¹⁷ Inzho kacili ciyanza ca Pilato kwaamba lyoonse cashika ciindi ce Pobwe lya Kwiitilila, kabakushizha mwaanje womwi.

¹⁸ Inkamu yoonse ya bantu yakapozomoka ati, “Wezu naafwe! Utwaangulwile Balabasi!”

¹⁹ Wezu Balabasi kali muntolongo kaambo kabupapyu umanyongwe akacitika mu munzhi, ulimwi u buyazhi.

²⁰ Inzho Pilato mbwakaakuzanda kwangulula Jeso, wakabalomba bantu ulimwi.

²¹ Pele balo bakapozomoka ati, “Naakankaminwe aciciinkano! Naakankaminwe aciciinkano!”

²² Pilato wakabaambila bantu lwatatu ati, “No mulanduunzhi ngwaacita? Kwiina mulandu ngundamuyanina uyelele lufwu. Ubobo ulakwipaulwa bulyo amana alekwe.”

²³ Pele bakapozomoka cini cini ati, “Naakankaminwe aciciinkano!” Inzho ku mamanino iyowe lyabo lyakazunda.

²⁴ Pilato wakahumina cibakakupumpa.

²⁵ Wakaangulula muntu ngubakaakuzanda, wezo wakabikwa muntolongo kabupapyu u buyazhi, wakabapa Jeso kwaamba bamucite mbubakaakuzanda.

Jeso Wakankaminwa Aciciinkano

²⁶ Inzho bakamutola Jeso, pele nibakaakuya bweenda bakaswaanganya muntu wakaakuhwa kumatungu, izhina lyakwe kali Saimoni waku Kuleni, bakamukwata bamutwika ciciinkano kwaamba acizemune, Jeso kaya bweenda kumbele lyakwe.

²⁷ Kakuli bantu banji banji bakaakuya bucilila munshi. Akati kabo kakuli bakaintu bakaakuya bulila ukumukwiilila.

²⁸ Jeso wakabacebuka wabaambila ati, “Nubakaintu ba Jelusalemu! Mutandilila, amulilile nubeni u banenu.

²⁹ Nkaambo alakashika mazuba bantu nibakakaamba ati, ‘Balikwete coolwe bakaintu babo batakazhala ukunonsha!

³⁰ Inzho ceco cilakaba nciciindi ncibakakaambila mapili ati, amutuwile! Umalundu ati, amutusesece!’

³¹ Nkaambo kuti shintu sheshi shacitika kwangu ndicisamu citece, no cilakaba buti kwenu nushisamu shizumu?”

³² Inzho kakuli balombwana bamwi bobile bakaakuli bafwumpi, ubakatolwa kuyaiwa antoomwi u Jeso.

³³ Nibakashika abusena butewa ati, “Kaanza” bakamukankamina Jeso aciciinkano, antoomwi ubafwumpi babo bobile, umwi kucilyo umwi kucimonsho.

³⁴ Jeso wakaamba ati, “Taata balecelele kaambo tabacizhi ncibacita.” Inzho bakaabana shakusama shakwe kwiita mukuuwala makakata.

³⁵ Bantu banji banji kabazhimine ansansa baleebela, ciindi beendelezhi nibakaakuseka ukumusaalizha Jeso ati, “Wakabafwutula bantu banji, aze naalifwutule mwini tubone, na ngumunanice ngwaakashomezha Leza.”

³⁶ Abo bashikalumamba bakamusaalizha, bakeza kwakwe, bamutambika waini uulula,

³⁷ bamwaambila ati, “Waakuli mwami waba Juda, lifwutule.”

³⁸ Ulimwi ezeulu aciciinkano cakwe, kaalembelwe ati, “Nguwezu mwami waba Juda.”

³⁹ Inzho umwi mufwumpi wakaakukankamininwe aciciinkano wakamutuka Jeso ati, “Sa uwe tuli munanike wa Leza? Lifwutule aswe utufwutule!”

⁴⁰ Pele mufwumpinina wakamulemanina ati, “Sa uwe tumutiyi Leza? Toonse twapewa cibebyo cikozhene.

⁴¹ Uswe twapewa ceelele milimo yesu mibiyabi, pele wezu wiina ncaakabisha.”

⁴² Amane wakamwaambila Jeso ati, “Ukanzhibaluce Jeso wakezhiza mu Bwami bwako!”

⁴³ Aze Jeso wakamwaambila ati, “Cini cini ndakushimwina ati, ubwasunu tulaba aze mu paladaiso.”

Lufwu lwa Jeso

⁴⁴ Ciindi nicakashika afwaafwi akalendebwe, kwakashika mushinze anshi yoonse wakatola mawoola otatwe.

⁴⁵ Ngoonaawo cishitilizho ca muŋanda ya Leza cakaanduka akati.

⁴⁶ Inzho Jeso wakapozomoka iizwi ikando ati, “Taata! Moza wangu ndoobika mu matashi ako!” Amane kwaamba bobo wakafwa.

⁴⁷ Inzho shikalumamba naakabona cakacitika wakatembaula Leza waamba ati, “Cini cini wezu mulombwana kaluleme!”

⁴⁸ Inzho bantu babo bakeza kweebela ceco cakaakucitika, bakabweela kuminzhi yabo kabaya bulyuuma ashamba shabo cakweetezhewa.

⁴⁹ Boonse babo bakaakumwizhi kabotu Jeso, kubicilizha u bakaintu bakaakumucilile kuhwa ku Galilaya, kabazhimine ansansa baleebela shakaakucitika.

Kuzhikwa kwa Jeso

⁵⁰ Inzho kakuli mulombwana utewa ati Jozefu wakaakuhwa ku munzhi wa Alimatiya mucishi ca Judiya. Kali muntu mubotu ulemekwa,

⁵¹ ulimwi wakakulanjila kushika kwa Bwami bwa Leza. Nikuba kuti kali uumwi wakabunga kabeendelezhi wiina naakahumizhanya abo mu mizeezo, umushintu nshibaakucita.

⁵² Wakaya kwa Pilato wakumbila mutunta waka Jeso.

⁵³ Wakoowangula mubili aciciinkano woopopela mucisani cibotu, wootola waya kuuwoneka mu cuumbwe cakakololwa mwibwe, uciina nicakazhikwa muntu.

⁵⁴ Bobu kabuli buzuba bwakulibambila kaambo buzuba bwa Sabata kabuli afwaafwi kushika.

⁵⁵ Balya bakaintu ba Galilaya bakamushindikila Jeso, bakacilila Jozefu munuma kuya kubona mutunta wa Jeso nguwakazhikwa.

⁵⁶ Inzho bakabweela ku munzhi kuya kubamba mafwuta aanunka kalonze akunanika mubili wa Jeso. Mu Sabata bakalyoocezha, kwiingaina u Mulawo.