Luka 21 - Izwi lya Leza

Cipo ca Mukamufwu

¹ Inzho Jeso wakabona bantu bahubi balabika mali mucizobwelo.

² Ulimwi wakabona mukamufwu umwi wakaakuli mupushi cini cini, wabika tuli tobile twamukuba.

³ Ngoonaawo wakaamba ati, “Ndamushimwina cini cini ati wezu mukamufwu mupushi wapa kubaala baba boonse babika.

⁴ Nkaambo bamwi babika tushoonto bulyo kuhwa ku shintu shinji shinji nshibahubile. Pele walo wezu mukamufwu mupushi wapa mali oonse ngaakukwete, ngaakushoma mu bumi bwakwe.”

Shitondezho Shaciindi ca Mamanino

⁵ Bamwi bantu bakaakwaamba makani aŋanda ya Leza, mbuyakaakuzacilwe u mabwe mabotu meebeshi, u shipo shibotu shizoosha shakaakupewa kwa Leza. Jeso wakaamba ati,

⁶ Cilakashika ciindi nikukaabula ibwe niliba lyomwi lizhilicilwe ebwe nina litakaaolomonwa, kuli sheshi shoonse nshimubwene.

Inkondo Umazwanga

⁷ Inzho bakamubuzha Jeso ati, “Mwiiyi, no ndililiye nishikaacitika? Ulimwi ncinzhi cikaaba citondezho ca ciindi nishikaacitika sheshi shoonse?”

⁸ Jeso wakabaambila ati, “Amucenjele mutacengwa, kaambo balakeza bantu banji banji mwizhina lyangu baamba ati, ‘Ndime wezo.’ Ulimwi ati, ‘Ciindi cashika.’ Mutakabacilila.

⁹ Inzho mulakateelela inkondo umazwanga anshi yoonse, mutakatiyi. Sheshi shintu shilyeelele kwaamba shikataangune kucitika, pele tashaamba ati mamanino ashika pe pe.”

¹⁰ Jeso wakaamba ati, “Cishi cilakalwa u cishi nina, bwami bulakalwa u bwami nina.

¹¹ Kulakaba kuzungaana kwanshi mu masena andeene andeene, ulimwi kulakaba inzala u malwazhi inshi yoonse, kulakaba shintu shizoosha ushitondezho shikando shitizha kuhwa mwizeulu.

¹² Pele kashitana kucitika shoonse sheshi, mulakaangwa u kupenzhewa, mulakatolwa kuya kubetekwa mu shikombelo shaba Juda, u kumubika muntolongo, mulakatolwa kubami ukubeendelezhi ukaambo kangu.

¹³ Inzho ceci cilakaba nciciindi cenu cakushimwina bantu Makani Mabotu.

¹⁴ Mutakapengi mu mizeezo kwaamba ati no tulalikwabilila buti?

¹⁵ Nkaambo ndakamupa mazwi u busongo kwaamba kutakabi naaba womwi wabashinkondonokwenu ukaamukazha ncimukakaamba.

¹⁶ Mulakaabwa ubazhali benu, u banyokwenu, ubanyokokwenu boonse, u balongweenu, ulimwi bamwi benu balakayayiwa.

¹⁷ Bantu boonse balakamusula ukaambo kangu.

¹⁸ Pele nikuba bobo kwiina nikaba kasusu komwi kati kakazhimine kuhwa kumitwi yenu.

¹⁹ Amukwatishe muzume, kaambo bobo mbumukonzha kulihuna.”

Kuzonaunwa kwa Munzhi wa Jelusalemu

²⁰ Pele mwakabona ati munzhi wa Jelusalemu wazhingulukwa u bashikalumamba, inzho amuzhibe ati uli afwaafwi kuzonaunwa.

²¹ Ubobo, babo bali mucishi ca Judiya balyeelele kulukancila mu mapili, abo bali mu Jelusalemu balyeelele kumuhwa, bali mu myuunda batakabweela mu Jelusalemu.

²² Nkaambo aza alakaba “Mazuba a cisubulo,” Kwaamba cilembelwe mu maŋwalu cizuzucizhiwe.

²³ Mulakapenga umwe nubakaintu bamishi ubanonsha ku mazuba azo! Kulakaba mapenzhi atanabwenwe anshi yezhi. Leza ulakabapa cibebyo bantu.

²⁴ Bamwi balakayayiwa u maceba bamwi balakatolwa buzhice ku bantu bakunze, Jelusalemu ulakalyataukwa kushicila ciindi cabo bakunze cikazuzucizhiwe.

Shitondezho Shakwiza kwa Mwanaa Muntu

²⁵ Kulakaba shitondezho kwizuba, kumwezhi ukuntongwezhi. Ano anshi kulakaba kutiya ukulibilika cini cini mumashi oonse. Kulakaba kuhuluma ukutooma kwa nyenje u mankutisha.

²⁶ Bantu balakawizuka ku bukandu nibalindila kubona ceco cizanda kushika anshi yeno yoonse. Insana sha kwizeulu shilakazungaana.

²⁷ Inzho balakoombona Mwanaa Muntu uleza mu makumbi insana u bulemu.

²⁸ Sheshi shintu mwakashibona shakanka kucitika, mukalanje mwizeulu, nkukuti kufwutuka kwenu kwaba afwaafwi.

Ciiyo ce Samu lya Bukuzu

²⁹ Ngoonaawo Jeso wakabaambila cikozhano ceci ati, “Amutelaike bukuzu u masamu amwi oonse.

³⁰ Mwabona ati matuhu akanka kusonsa mulazhiba kwaamba ati mainza ali afwaafwi.

³¹ Mbubona bobo mwakabona kwaamba shintu sheshi shacitika, amuzhibe ati Bwami bwa Leza buli afwaafwi.

³² “Cini cini ndamushimwina ati, shintu sheshi shoonse shilakacitika izhalane leli kalitana kumana kufwa.

³³ Izeulu iinshi shilakamana, pele mazwi angu taakamana.”

Jeso Wakaamba Mulinde

³⁴ “Amukale mulilibambile, myonzo yenu itaakutuntaanina bulyo kulya u kunwa, u shintu shoonse shaano anshi, kaambo buzuba bobu bukalakamuyana tamulibambile.

³⁵ Kwiza kwa buzuba bobu kulakaba ukoya kooze kateye, kalakafwisuka ukukwasha bantu boonse ano anshi.

³⁶ Amukale mulilibambile u kukomba ciindi coonse kwaamba mukayane insana shakumwiisha mu shintu shoonse sheshi shikaacitika, ukuzhima ku bushu bwa Mwanaa Muntu.”

³⁷ Inzho ku mazuba azo Jeso kayiisha muŋanda ya Leza, pele mangolezha kaya ukoona ku Lupili lwa Oliva.

³⁸ Inzho bantu boonse kabafwuma kuŋanda ya Leza kuya kumuteelela.