Luka 20 - Izwi lya Leza

Jeso Mbwaakabuzhiwa Bwami Bwakwe

¹ Bumwi buzuba Jeso naakaakuyiisha bantu muŋanda ya Leza u kukambauka Makani Mabotu, bapaizhi bakando u balembi kubicilizha ubakando ba cishi, bakeza kwakwe

² boombuzha ati, “Tushimwine, no ninsanaanzhi nshucisha shintu sheshi? No nguni wakakupa insana shesho?”

³ Jeso wakabaingula ati, “Ame ndamubuzha mubuzho. Amuŋambile,

⁴ nguni wakamutuma Johani kupapatiza, ngu Leza na mbantu?”

⁵ Inzho bakakanka kubuzhanya beni ubeni ati, “Anu twaambe acani? Kuti twaambe ati ngu Leza wakamutuma, ulatubuzha ati, no kaamboonzhi mwiina nimwakamushoma?

⁶ Pele kuti twaambe ati, lwakahwa ku bantu, bantu boonse baba balatuuma mabwe, kaambo balizhi ati Johani kali mushinshimi.”

⁷ Ubobo bakamwiingula ati, “Tatumwizhi wakamutuma.”

⁸ Jeso wakabaambila ati, “Ame nshimushimwini wakampa insana shincisha sheshi.”

Cikozhano ca Balimi mu Muunda wa Misaansa

⁹ Inzho Jeso wakabaambila bantu cikozhano ceci, ati, “Muntu umwi wakashimpicila micelo ya misaansa mu muunda wakwe. Wakooshisha mu matashi abalimi waya ku cishi cimwi kukala ciindi cilamfwu.

¹⁰ Nicakashika ciindi ca kutebula misaansa, wezo muntu wakatuma musebezhi ku balimi babo kwaamba bamupe aze mwaabilo wakwe. Pele balimi bakamuuma musebezhi wezo ukumutanda cinkambaminwe.

¹¹ Kuhwaawo wakatuma uumwi musebezhi ku balimi kwaamba bamupe micelo, aze bakamuuma bamutubulusha bamutanda cinkambaminwe.

¹² Ulimwi wakatuma musebezhi watatu, wezu walo bakamuyasa bamusowela kunze ku muunda.

¹³ Inzho mukamwini muunda wa masaansa wakaamba ati, no ndacita buti? Ndatuma mwanangu nakufwunwa ambweni balakamulemeka!

¹⁴ Pele balimi nibakamubona bakalihwiya ati, nguwezu shimulyazhina, atumuyaye kwaamba muunda ube wesu!

¹⁵ Ubobo bakamuyaya bamusowela kunze ku muunda wa masaansa.” Jeso wakababuzha ati, “No mukamwini muunda ulabacita buti bantu babo?

¹⁶ Ulakeza kubayaya balimi u kupa bantu banji muunda wakwe wa masaansa.” Bantu nibakateelela bobo bakaamba ati, “Pe pe kutabi bobo!”

¹⁷ Pele Jeso wakabalanjilila, wababuzha ati, “No maŋwalu aza aambilaanzhi ati, “Ibwe ndibakasowa bazashi, lyaba ndiibwe lizandika lya mucooko ca ŋanda, cilapandululaanzhi?

¹⁸ “Kufwumbwa muntu uukaawila ebwe leli ulaacokauka, ulimwi muntu ngulikaawila ibwe leli lilakamupondaula.”

Makani a Mutelo

¹⁹ Inzho balembi u bapaizhi bakando bakasoleka kwaamba bamukwate Jeso awo ngoona, kaambo bakezhiba ati mbaakaakukumbilizha mucikozhano ceci, pele bakatiya bantu.

²⁰ Ubobo bakakanka kumoongelezha kwaamba bayane ciindi cakumukwata. Bakatuma bantu bashikoopoopa amenso kumulingalinga mu twaambo kwaamba bamukwashe ukumubetesha kunkuta ya mweendelezhi.

²¹ Baba bantu bakamwaambila Jeso ati, “Mwiiyi, tulizhi ati uwe ulaamba u kuyiisha shiluleme. Ulimwi tulanga cimo uciwa ca muntu, pele ulayiisha inzhila ya lushinizho.

²² Twaambile, sa tulyeelele kutela mutelo ku muleli mukando waku Loma na pe?”

²³ Jeso wakaazhiba maanu abo, ngoonaawo wakabaambila ati,

²⁴ “Amuntondezhe ili. No cikozhano ceci izhina leli nshakani?” Bakamwiingula ati, “Nshaka Kaizala waku Loma.”

²⁵ Inzho wakabaingula ati, “Cabota! Amupe muleli mukando waku Loma shintu shakwe, ulimwi amupe Leza shinakwakwe.”

²⁶ Inzho bakakacilwa kumuyanina kaambo kakumubetesha, ubobo bakaliinza bulyo, kwiingula kwakwe kwakabazoosha.

Makani Akubuka ku Bafwu

²⁷ Ba Saduki bakeza kwa Jeso. Babo baamba ati bafwu tabakabuci. Bakamubuzha ati,

²⁸ “Mwiiyi, Mozesi wakatulembela mulawo waamba ati, kuti munyoko wafwa katwele mukaintu pele wiina kuzhala bana, munina ulyeelele kumukona mukamufwu kwaamba amuzhalile bana mufwu.

²⁹ Inzho kakuli babunina mu lushomo bali ciloba, mukando wabo wakatwala mukaintu pele wakafwa katana kuzhala mwana.

³⁰ Uumucilila wakamukona mukamufwu,

³¹ ulimwi uwatatu mbubona, pele aze wakafwa. Kabaya bufwa boonse mpaka kushicila kuli wa ciloba, kabatashiyi bana.

³² Ku mamanino aze mukaintu wakafwa.

³³ Inzho bwakashika buzuba bafwu mbubakaabushiwa, wezu mukaintu ulakaba mukani?”

³⁴ Jeso wakabaingula ati, “Balombwana u bakaintu baano mazuba balatwalana,

³⁵ pele babo boonse bakaatambulwa muciindi cizhiza, ukubushiwa ku bafwu, tabakatwali ulimwi tabakatwazhiwa.

³⁶ Balakaba ukoya baanjelo, ulimwi tabakafwi linji pe. Balakaba bana baka Leza kaambo babuka kuhwa ku bafwu.

³⁷ Aze Mozesi wakaamba kaanzambwene ati bafwu balakabushiwa. Nkaambo naakalemba makani a cisoko cizaka mulilo, wakamwaambila Mwami ati, Leza waka Abulahamu, Leza waka Aizeki, ulimwi u Leza waka Jakobo.

³⁸ Ngu Leza wa bantu balanga tali Leza wa bantu bafwu, kaambo kumenso akwe boonse balalanga.”

³⁹ Inzho balembi bamwi Bakaamba ati, “Koko nkwiingula kubotu mwiiyi!”

⁴⁰ Ubobo bakatiya kumubuzha mibuzho iinji.

Sa Kilisito Mwanakwe Ni?

⁴¹ Jeso wakababuzha mubuzho ati. “No Bantu balaambilaanzhi ati, Munanike wa Leza ndunungu lwa Devidi?”

⁴² Nkaambo Devidi lwakwe mwini wakaamba mwibuka lya Ntembauzho ati, “Mwami Leza wakaambila Mwami wangu ati, ‘Kala kululyo lwangu,

⁴³ mpaka nkabice ba shinkondonoko kwaamba cibe cilyatilo ca matende ako.’

⁴⁴ Bolya Devidi mbwakamwaamba ati, ‘Mwami.’” No ulakonzha buti kuba mwanakwe?

Jeso Waamba Amubacenjelele Bamaayi ba Mulawo

⁴⁵ Inzho boonse bantu nibakaakupupulele Jeso wakabaambila ba shiciiya bakwe ati,

⁴⁶ “Amubacenjelele balembi, babo bazanda kweendeenda balisamine masani malamfwu. Ulimwi balifwini kwaanzhiwa ca bulemu mu shisambalilo, u kusala shuuna shibotu mushikombelo shaba Juda, u masena a bulemu mu mapobwe.

⁴⁷ Balacenga bamuka bafwu ukubananga maanda abo. Ulimwi balazanda kucita mambonwa ku bantu kwiita mu kukomba shikombyo shilamfwu. Leza ulakabapa cibebyo cibaala kubiya!”