Luka 2 - Izwi lya Leza

Kuzhalwa kwaka Jeso

¹ Mu mazuba azo Agasitasi Kaisala muleli mukando wa Loma wakabika mulawo wakuti bantu boonse bali mubulelo bwa Loma babalwe.

² Ciindi kubalwa koku kwa kutaanguna nikwakacitwa, Koneliyasi nguwakaakuli mweendelezhi mukando wa cishi ca Siliya.

³ Inzho bantu boonse bakaya kulembwa kuminzhi yabo.

⁴ Aze Jozefu wakahwa ku munzhi wa Nazanleta mucishi ca Galilaya. Wakaya ku munzhi wa Devidi uutewa ati Betelehemu, mucishi ca Judiya kaambo kali wa luhubo lwa mwami Devidi.

⁵ Wakaya kwaamba akalembwe antoomwi u Maliya, mukaintu ngwaakaakusesele. Ciindi ceco Maliya kemishi.

⁶ Nibakaakucili koko, mazuba aakutumbuka aka Maliya akashika.

⁷ Wakazhala mwana wakwiiya mweembezhi. Wakamuzambaila masani wamooneka mukato kalila iŋombe muluba, kaambo bakabula busena muŋanda ya beenzu.

Beembezhi u Baanjelo

⁸ Kubuzuba bobo ciindi ca mashiku kakuli beembezhi bakaakuwilile, kabeembela imbelele kulutanga.

⁹ Ngoonaawo anjelo wa Mwami wakalibonya nkubabele, bulemu bwa Mwami bwakamunika kuzhinguluka ngubaakubele bwakatuba buu! Nibakabona ceci bakatiya cini cini.

¹⁰ Pele anjelo wakabaambila ati, “Mutatiyi, amubone ndamuletela Makani Mabotu a kaabotela bantu boonse.

¹¹ Ubwasunu mu Betelehemu, mu munzhi wa Devidi, mufwutuli ngumwakashomezhewa wazhalwa, ngu Kilisito Mwami wenu.

¹² Inzho nciceci citondezho, mulakayana mwana mutece muzambaile umasani ulilele mukato kalila iŋombe.”

¹³ Aciindi ngoonaawo kwakabonwa ikamu lya baanjelo kwizeulu antoomwi u anjelo mukando balatembaula Leza ati,

¹⁴ “Natembaulwe Leza wezeulu lyamazeulu. Awo anshi naabe luumuno akati ka bantu babo Leza mbaabotelwa.”

¹⁵ Baanjelo nibakabweela kwizeulu, beembezhi bakashimwizhanya ati, “Atufwambaane katuya ku Betelehemu tukabone cintu ceci cacitika ncaatushimwina Mwami.”

¹⁶ Bakaya ca kufwambaana, bakayana Maliya u Jozefu u mwana Jeso ulilele mukato kalila iŋombe.

¹⁷ Inzho beembezhi nibakamubona, bakakanana makani oonse ngaakabashimwina anjelo kukaambo ka mwana wezo.

¹⁸ Bantu boonse nibakateelela shakaamba beembezhi, bakazoowa cini cini.

¹⁹ Maliya wiina naakashiluba shintu shoonse sheshi, ulimwi kashitweluka cini cini.

²⁰ Beembezhi bakapiluka, kabaya butembaula Leza u kumupa bulemu, ukaambo ka shintu shoonse nshibakateelela u kubona. Kashili umbona mbwakabashimwina anjelo.

Jeso Waulikwa

²¹ Mwana naakakwata mazuba ali lusele kuhwa ukuzhalwa kwakwe, wakapalulwa, ukuulikwa izhina lya Jeso. Leli ndiizhina ndyakapewa kwa anjelo katana ukumitwa.

Jeso Watolwa Muŋanda ya Leza

²² Ciindi cakusalazha ba Jozefu u Maliya nicakashika, kwiingainya u malailile azo Leza ngaakapa Mozesi, bakatola mwana ku Jelusalemu kwaamba bakamushishe ku bushu bwa Mwami,

²³ nkaambo mbukulembelwe mu mulawo wa Leza ati, “Mwana woonse mweembezhi mutaanzhi ulyeelele kutolwa kwa Leza”

²⁴ Bakatola cipaizho kwiingaina u mulawo wa Mwami mbuwamba ati balyeelele kutola inzhiba shobile naa bana bankwilimba bobile.

²⁵ Inzho mu Jelusalemu kamuli mulombwana wakaakutewa ati Simiyoni. Kali muntu uuzwile Moza Usalala ulimwi wakaakucita shizanda Leza. Wakaakulanjila lufwutuko lwa ba Izilaili.

²⁶ Ulimwi Moza Usalala wakamushomezha ati, takafwi katana kumubona Kilisito Munanike wa Leza.

²⁷ Simiyoni wakasololelwa u Moza Usalala, wakenjila muŋanda ya Leza, ciindi ushi u baina Jeso nibakamunjizha kwaamba bacite caamba mulawo.

²⁸ Simiyoni wakamubweza mwana wamufwumbatila mu matashi akwe wakakanka kutembaula Leza ati,

²⁹ “Mwami cini cini wabamba cishomezho cako, inzho ndimuzhice wako ndakonzha kufwa muluumuno,

³⁰ nkaambo menso angu amubona mufwutuli.

³¹ Wezo nguwatuma ku bantu boonse.

³² Wezu ngu mumuni uuzubulula luzando lwako ku bantu bakunze, nguumunicila bantu ba Izilaili.”

³³ Ushi u baina Jeso bakazoowa cini cini nibakateelela nshakaamba Simiyoni ku makani aka Jeso.

³⁴ Ngoonaawo Simiyoni wakabalonjezha u kwaambila Maliya ati, “Wezu mwana wakasalwa kwiza kucina u kubusha bantu banji banji mu Izilaili. Ulakaba cizhibisho ncaakatuma Leza ceco bantu banji banji ncibakaasampaula.

³⁵ Ubobo matelaishi ali mu myonzo yabo alakazubululwa. Inzho uwe Maliya, mause alakakuyasa ku monzo ukoya iceba lilampa.”

Bushinshimi bwaka Ana

³⁶ Kakuli mukaintu mushinshimi wakaakuli mukamufwu. Izhina lyakwe kali Ana mwanakwe Faniwelo, wamushobo wa Asha. Wakatwalwa kacili nakalindu. Wakakala bulyo myaka iili ciloba umulumyaakwe, inzho kali mucembele.

³⁷ Ku ciindi ceco kakwete myaka iili makumi ali lusele iitwesha yone. Katamuhwi muŋanda ya Leza muunza u mashiku kakomba Leza ukuliimya kulya.

³⁸ Ku ciindi ncicona ceco Jeso naakaletwa muŋanda ya Leza, aze Ana wakashika, wakalumba Leza wakaamba makani a mwana kuli babo bakaakulindila kunununwa kwa Jelusalemu.

Kubweela ku Nanzaleta

³⁹ Nibakamana kucita shintu shoonse kwingaina umbushakaambwa mu mulawo wa Leza, bakabweela ku munzhi wabo waku Nanzaleta uuli mucishi ca Galilaya.

⁴⁰ Inzho mwana wakakomena wazuma waba iinsana, kazwile busongo ulimwi kakwete shileleko sha Leza.

Mweembezhi Jeso Muŋanda ya Leza

⁴¹ Ushi u baina Jeso kabaya ku Jelusalemu amwaka u mwaka kwipobwe lya kwiitilila

⁴² Ciindi Jeso naakaakukwete myaka iili ikumi iitwesha yobile, bakaya kwipobwe umbona mbubakaakucita lyoonse.

⁴³ Nilyakamana ipobwe, bakapiluka ku Nanzaleta, pele Jeso wakashaala mu Jelusalemu. Ushi u baina Jeso kabatezhi bobo.

⁴⁴ Kabatelaika ati uli akati ka bantu u beenzhiina. Bakeenda mushinzo wa buzuba bomwi. Inzho bakakanka kumukapula akati kabasazhinokwabo ubeezhinokwabo.

⁴⁵ Nibatakamuyana, bakabweela ku Jelusalemu kuya kumukapula.

⁴⁶ Nibakamukapula kwa mazuba ali otatwe bakaya kumuyana muŋanda ya Leza, ulishite akati kaba maayi ba mulawo, ulateelela mbubakaakukanana ukubabuzha mibuzho.

⁴⁷ Bantu boonse bakateelela kwiingula kwakwe kwa busongo bakazoowa cini cini.

⁴⁸ Inzho nibakamuyana bakazoowa. Baina wakamwaambila ati, “Mwanangu, no ncinzhi nciwatucitila bolya? Bona ume uuso twafwa kukapula, ulimwi twaakupengele cini cini.”

⁴⁹ Jeso wakabaingula ati, “No mwaakunkapulilanzhi? Sa kamutezhi ati ume ndyeelele kuba muŋanda yaka Taata?”

⁵⁰ Pele kwiina nibakateelela ncakaakwaamba.

⁵¹ Inzho Jeso wakayaabo ku munzhi wa Nanzaleta, ulimwi kabalemeka u kucita nshibamwaambila. Pele baina wakashizobola shintu shoonse sheshi mu monzo wakwe.

⁵² Inzho Jeso kaya bukomena mu maanu umucimo, ulimwi wakaba mwana uufwinwi kwa Leza uku bantu.