Luka 19 - Izwi lya Leza

Jeso u Zekiyasi Shimutelo

¹ Inzho Jeso wakanjila mu munzhi wa Jeliko, kali shikwiitilila.

² Mu munzhi momu kamuli muntu wakaakuli mukando wabashimutelo, izhina lyakwe kali Zekiyasi. Ulimwi kali muntu muhubi.

³ Inzho wezu muntu kazanda kubona Jeso pele kaambo kakuhula kwa bantu, ulimwi ukaambo kakufwiimpa kwakwe, katakonzha kumubona

⁴ Ubobo wakalukancila kumbele, waliza mucisamu ca mukuzu cakaakuli kumbali kunzhila koko Jeso nkwakaakweelele kwiita.

⁵ Inzho Jeso naakashika abusena awo, wakalyaalala mwizeulu wamwaambila ati, “Zekiyasi seluka fwambaana, bwasunu ndyeelele kuya kukala muŋanda mwako.”

⁶ Zekiyasi wakaseluka ca kufwambaana, wamutambula ukumusansaucila Jeso.

⁷ Inzho bantu babone bobo, bakakanka kutongauka u kwaamba ati, “Amubone wezu muntu, wabaalila kuŋanda ya muntu shishibi.”

⁸ Zekiyasi wakazhimuka wamwaambila Mwami ati, “Teelela Mwami! Ndalwiita akati lubono lwangu, cimwi cipanzha ndacipa bapushi, ulimwi na kuli muntu ngundakananzha lubono calucengo, ndamuzholela lubono lwake shiindi shone.”

⁹ Ngoonaawo Jeso wakamwaambila ati, “Ubwasunu lufwutuko lwashika muŋanda yezhi, kaambo aze wezu muntu ngwa luhubo lwaka Abulahamu.

¹⁰ Mwanaa Muntu wakeza kukapula ukufwutula bazhimini.”

Cikozhano ca mali Alubulo

¹¹ Inzho bantu nibakaakucipupulala aza makani, Jeso wakaya kumbele kubaambila ucimwi cikozhano. Inzho kali afwaafwi kushika ku Jelusalemu, ulimwi bantu kabatelaika ati Bwami bwaka Leza bukalashika.

¹² Wakabaambila ati, “Kakuli mulombwana wakaakulemekwa cini cini, wakabweza mushinzo wakuya ku cishi ca kulaale kuya kupewa bwami, amana akapiluce.

¹³ Katana kuzhimuka, waketa basebezhi bakwe bali ikumi wabapa ikumi lya mpondo shalubulo wabaambila ati, ‘Mwaapindauke mali aza kwaamba ndakazhoka nkayane impindu.’

¹⁴ Pele bashicishinina kabamuswile, ubobo mbwakaila bulyo bakatuma inkombe munshi lyakwe ati, ‘Uswe tatuzanda muntu wezo kwaamba abe mwami wesu.’”

¹⁵ “Inzho Kwiite ciindi cilamfwu shimatwangaabo wakapiluka, amane wakaboompolola basebezhi bakwe kwaamba bamupandululile mbubakaasebezha mali azo.

¹⁶ Mutaanzhi wakeza waamba ati, Mwami, ili lyako lyayana mali aamwi ali ikumi.”

¹⁷ Ngoonaawo wakamwaambila ati, “Wacita kabotu uli musebezhi mubotu! Inzho kaambo washomeka mucintu cishoonto, ndakubika kuba mweendelezhi waminzhi iili ikumi.”

¹⁸ Aze musebezhi wabili wakeza waamba ati, “Mwami mali ako ayana aanji ali osanwe.”

¹⁹ Mwami wakamwaambila ati, “Uwe ulaba mweendelezhi waminzhi yosanwe.”

²⁰ Musebezhi wamamanino wakeza waamba ati, “Ndileli ili lyako, ndakalyaanga muntaulu ndaakulizobwele.

²¹ Ndakatiya kaambo uli muzumuzumu, ulabweza nciwatakabika, ulatebula nciwatakashanga.”

²² Mwami wakwe wakamwaambila ati, “Uwe umusebezhi mubiyabi! Ndakuzuzha u mazwi ako umukamwini. Mbuuzhi ati ndimuzumuzumu, ndabweza ncindatakabika, ukutebula ncindatakashanga,

²³ no kaamboonzhi nciwatakaabicila mali aangu mwi banci? Kwaamba ciindi ninkaapiluka, ndakaya kwabweza nkayane apanga impindu.”

²⁴ Ngoonaawo mwami wakabaambila bakaakuzhimine ambali ati, “Amumunanje ili mupe wezo uukwete ali ikumi.”

²⁵ Balo bakaamba ati, “Mwami ulikwete kale mali ali ikumi.”

²⁶ Mwami wakabaingula ati Ndamushimwina ati, “Muntu ukwete ulakazunjililwa, pele muntu ukwete kashoonto, ulakanangwa ukashoonto kako nkaakwete.

²⁷ Inzho baba bashinkondoma batakaakuzanda kwaamba mbe mwami wabo, nombalete kono bayayiwe nduukubabwene.”

Jeso Wenjila Bumuzundi mu Jelusalemu

²⁸ Jeso nakamana kwaamba bobo, wakasolola kuya ku Jelusalemu.

²⁹ Naakashika afwaafwi u minzhi ya Betefage u Betani, ku lupili lwa masamu a Oliva, wakatuma ba shiciiya bakwe bobile.

³⁰ Wabaambila ati, “Kamuya mu munzhi welya. Kumanjililo mulakayana mwana wa mbongolo uutanalizilwe umuntu, ulyaanjilwe ku cisamu, mukamwaangulule mumulete kono.

³¹ Na kuti kukabe muntu uukaamubuzha ati, no ncinzhi ncimumwaangulwila? Mukamwaambile ati, Mwami ulazanda kumusebezha.”

³² Inzho bakaya, kuyana mbubona mbwakabaambila Jeso.

³³ Nibakaakwaangulula, bamukamwini bakababuzha ati, “Njaanzhi imbongolo njimwaangulula?”

³⁴ Balo bakaingula ati, “Mwami ulazanda kwiisebezha.”

³⁵ Ngoonaawo bakeetola kwa Jeso, bazala makoti abo ambongolo bamulizika Jeso.

³⁶ Naakaakulizile ambongolo, ulaya bweenda kuya ku Jelusalemu, bantu bakazala makoti abo mumukwakwa.

³⁷ Nakashika afwaafwi u Jelusalemu, awo mukwakwa nguwakukunkuluka alupili lwa masamu a oliva, yoonse inkamu yaba shiciiya bakwe yakakanka kusapwa, ukupozomoka balatembaula Leza kaambo ka milimo mikando njibakabona.

³⁸ Bakaamba ati, “Ulikwete coolwe uzhiza mwizhina lya Mwami! Akube luumuno kwizeulu, u bulemu bube kwa Leza!”

³⁹ Inzho bamwi ba Falisi bakaakuli munkamu ya bantu bakamwaambila Jeso ati, “Mwiiyi, baambile ba shiciiya bako baliinze.”

⁴⁰ Jeso wakabaingula ati, “Ndamushimwina ati, kuti bantu baliinza, aza mabwe alakanka kupozomoka.”

Jeso Walilila Munzhi wa Jelusalemu

⁴¹ Inzho Jeso naakashika afwaafwi mu munzhi wa Jelusalemu, naakoobona wakoolilila

⁴² wakaamba ati, “Akaka! Kuti niwaakwizhi bwasunu cikonzha kukuletela luumuno! Pele ninzho shilisesecelwe kulyuuwe.

⁴³ Nikuba bobo alakashika mazuba ngukaabula coolwe, lelyo ba shinkondonoko nibakaakushila kalambwe kakakuzhinguluce, bakakubice akati ukushincilizha kumbahu shoonse ukabule mbuulikwabilila.

⁴⁴ Ulimwi balakakuumbululila anshi uwe mu munzhi. Boonse bahwa mulyuuwe balakazonaunwa. Kwiina ibwe likashaala lilizhilicilwe ebwe nina, kaambo wiina kucizhiba ciindi Leza naakuzhile ukufwutula.”

Jeso Muŋanda yaka Leza

⁴⁵ Inzho Jeso wakanjila Muŋanda ya Leza wakanka kutanda babo bakakuuzhizha mo.

⁴⁶ Wakabaambila ati, “Kulilembelwe mu maŋwalu ati, Iŋanda yangu ilaaba iŋanda yakukombela. Pele umwe mweecita cizubilo ca batewu.”

⁴⁷ Jeso kayiisha muŋanda ya Leza mazuba oonse. Bapaizhi bakando, u balembi u beendelezhi babantu bashicishi kabakapula inzhila yakumuyaya.

⁴⁸ Pele bakeebula kaambo bantu boonse kabazanda kupupulala u kuteelela nshakaakwaamba Jeso.