Luka 18 - Izwi lya Leza

Cikozhano ca Mukamufwu Umubeteshi

¹ Inzho Jeso wakabaambila cikozhanyo cakubayiisha kwaamba ati balyeelele kukomba lyoonse bataakulengaana.

² Wakabaambila ati, “Mu munzhi umwi kamuli mubeteshi wezo watakaakutiya Leza, ulimwi katalemeka bantu.

³ Mu munzhi wezo nguwena kamuli mukamufwu wakaakwiza kumubeteshi wezo kulyeenzelela ati, ‘Nkoswela kaambo kashimulanduma!’

⁴ Kwakaita ciindi cilamfwu mubeteshi wezu ulakaka, pele limwina, wakatweluka mu monzo waakwe ati, ‘Nikuba kwaamba ati nshimutiyi Leza, ulimwi nshilemeka muntu,

⁵ pele kaambo kakuti mukaintu wezu wansubula, ndamukoswela mulandu wakwe ndikalile, atampenzha linji.’”

⁶ Ngoonaawo Jeso wakabaambila ati, “Amuteelele mbwaamba wezu mubeteshi uutaluleme.

⁷ Sa Leza takonzha kubacitila shiluleme basale bakwe bamukwiilila muunza u mashiku kwaamba abayohwe? Ulimwi sa tafwambaani kubayohwa?

⁸ Ndamushimwina ati, ulakabakoswela twaambo twabo ca kufwambaana. Sa Mwanaa Muntu akashika ano anshi ulakayana lushomo?”

Cikozhano camu Falisi u Shimutelo

⁹ Ulimwi Jeso wakaamba cikozhanyo ceci ku bantu balishoma bululami kubaala bamwi.

¹⁰ Wakaamba ati, “Kakuli balombwana bobile bakaya muŋanda ya Leza kukomba. Umwi kali mu Falisi, umwi kali shimutelo.

¹¹ Mu Falisi wakazhima wakomba ati, ‘Ndakulumba Leza nkaambo ume nshili ukoya bantu boonse bamwi, batashomeki, bashibutongo, bashimamambe, na ukoya wezu shimutelo.

¹² Ndaliimya kulya shiindi shobile munsunda yomwi, ulimwi ndapa cekumi kuli shesho shoonse nshinjana.’

¹³ Pele shimutelo wakazhima ansansa, katalozha ukusansula menso kwizeulu, wakalikwata acamba waamba ati, ‘Leza mfwila luse ume, ndishishibi.’”

¹⁴ Jeso wakabaambila ati, “Ndamushimwina ati shimutelo wakabweela kwakwe ulilulamicilwe, pele mu Falisi wiina nakalulamikwa. Nkaambo kufwumbwa muntu uulisumpula ulakafwiinshiwa, pele wezo muntu uulifwiinsha ulakasumpulwa.”

Jeso Watulonjezha Twana

¹⁵ Bantu bamwi bakaleta twana kwa Jeso kwaamba atukwate. Inzho ba shiciiya bakabalemanina babo bakaleta twana.

¹⁶ Pele Jeso wakabeta bana babo, waamba ati, “Amubaleke bana beze kwangu mutabakasha, nkaambo Bwami bwaka Leza mbubwabo bantu bali ukoya bana.

¹⁷ Cini cini ndamushimwina kwaamba oonse muntu utatambuli Bwami bwa Leza ukoya mwana takabunjili pe.”

Muntu Muhubi

¹⁸ Mweendelezhi waba Juda umwi wakamubuzha Jeso ati, “Mwiiyi mubotu, no nciteenzhi kwaamba njane bumi buteeli?”

¹⁹ Jeso wakamubuzha ati, “No wentilaanzhi ati mubotu? Kwiina mubotu cita Leza ice bulyo.

²⁰ Uliizhi milawo yaamba ati, ‘Utabi shimamambe, utabi nuuyaya, utebi, utalenjelela umwi kaambo, lemeka uso u banoko.’”

²¹ Muntu wezo waingula ati, “Milawo yezhi yoonse ndeecilila kuhwa kubwana bwangu.”

²² Jeso nakateelela bobo, wakamwaambila ati, “Kuli comwi bulyo cisheele ncuuyelele kucita. Ukauzhe lubono lwako loonse, wamana mali ukaape bapushi, ulakayana lubono kwizeulu, wamana uzhize uncilile.”

²³ Wezo muntu naakateelela bobo wakalyeetezha, kaambo kahubile cini cini.

²⁴ Jeso wakamulanjilila waamba ati, “Ncizumu cini cini ku bantu bahubi kunjila mu Bwami bwaka Leza!

²⁵ Ncuubauba kwaamba inkamela injile mukapulo kansonde kubaala muntu muhubi kunjila mu Bwami bwaka Leza.”

²⁶ Bantu bakateelela ceci, bakamubuzha Jeso ati, “No nguni ukonzha kufwutulwa?”

²⁷ Jeso wakaingula ati, “Sheshi shintu shibakakila bantu, Leza tashimukakili.”

²⁸ Pita wakaamba ati, “Langa! Uswe twakashiya maanda esu tulikucilile.”

²⁹ Jeso wakabaambila ati, “Cini cini ndamushimwina ati kufwumbwa muntu ukaashiya iŋanda yakwe, na mwinakwe u banina, nibaba bamuzhala, na banakwe ukaambo ka Bwami bwaka Leza,

³⁰ ulakatambula shinji shinji muciindi ceno, muciindi ciza ulakatambula bumi buteeli.”

Jeso Waamba sha Lufwu Lwakwe Ciindi Catatu

³¹ Inzho Jeso wakaambula ba shiciiya bakwe bali ikumi ubatwesha bobile wabaambila ati, “Amubone! Tulaya ku Jelusalemu, koko shoonse nshibakalemba bashinshimi sha Mwanaa Muntu nkushikaazuzucizhiwa.

³² Mwanaa Muntu ulakaabwa mu matashi abamashi, balakamusaalizha, bakamutuke ukumufwila mate.

³³ Balakamukwipaula u kumuyaya, pele kubuzuba bwatatu ulakabuka.”

³⁴ Inzho ba shiciiya kwiina niciba comwi ncibakateelela ku shintu sheshi. Bayina kucizhiba ncakaakwaamba Jeso.

Jeso Waponya Moofwu

³⁵ Inzho Jeso nakashika afwaafwi u Jeliko, wakayana umwi muntu moofwu ulishite kumbali kunzhila ulakumbila.

³⁶ Moofwu nakateelela bantu banji banji balaita, wakabuzha ati, “Ncinzhi cacitika?”

³⁷ Bantu bakamwaambila ati, “Jeso waku Nanzaleta nguuyita.”

³⁸ Ngoonaawo moofwu wakapozomoka ati, “Jeso! Mwanakwe Devidi! Mfwila luse!”

³⁹ Bantu bakaakusolwele bakamulemanina ati, “Liinze uwe!” Walo wakabaazha ukupozomoka ati, “Akaka Mwanakwe Devidi mfwila luse!”

⁴⁰ Inzho Jeso wakazhima, wabaambila bantu kwaamba bamulete moofwu kwakwe. Naakashika afwaafwi, Jeso wakamubuzha ati,

⁴¹ “No ulazanda ati nkucitileenzhi?” Moofwu wakaingula ati, “Mwami, ndazanda kubona ulimwi.”

⁴² Jeso wakamwaambila ati, “Bona! Lushomo lwako lwakuponya.”

⁴³ Ngoonaawo wakacikonzha kubona, wacilila Jeso, ukutembaula Leza. Abo bantu nibakabona ceci bakamutembaula Leza.