Luka 14 - Izwi lya Leza

Jeso Kuŋanda yamu Falisi

¹ Mu buzuba bumwi bwa Sabata Jeso wakaya kulya kuŋanda ya mukando waba Falisi, bantu boonse bakamulanjisha.

² Inzho muntu umwi wakeza kwa Jeso, kazhimbile mubili.

³ Inzho Jeso wakababuzha bashi Mulawo ati, “Sa Milawo yesu ilatuhuminya kushilika mu buzuba bwa Sabata na pe?”

⁴ Pele kwiina wakaingula. Ngoonaawo Jeso wakamukwata muntu wezo wamuponya, amane wamuleka waya.

⁵ Inzho wakabaambila ati, “Sa kuti umwi wenu kakwete mwana mulombwana, naa iŋombe yawila mumukalo mu buzuba bwa Sabata, sa teekusha umukalo mu buzuba bobo mbubona?”

⁶ Pele bakakacilwa kumwiingula kukaambo kaka.

Kulibonzha Ukutambula Beenzu

⁷ Inzho Jeso naakabona ati bamwi bantu bakaakutambilwe kwipobwe bakakanka kulisalila masena aakukala a bulemu, wakabaambila kaano kaka,

⁸ “Kuti na muntu wakutamba kwipobwe lya bwinga, utakakala acuuna cibotu ca bulemu. Kulaba nikwiza muntu uumwi ukubaala bulemu,

⁹ amana shimeenzu ako wakakutamba akeze kukwaambila ati, ‘Mupe cuuna wezu muntu.’ Ukalakafwa insoni kuzhimuka u kuya kukala acuuna citali ca bulemu.

¹⁰ Ubobo, kuti watambwa, ulyeelele kusala cuuna citali ca bulemu, kwaamba shimeenzu ako ashika akwaambile ati, ‘Mulongwaangu zhimuka, koya kumbele kushuuna shabulemu.’ Ubobo ulakakwata bulemu kumenso a beenzu noko.

¹¹ Nkaambo kufwumbwa muntu ulisumpula ulakafwiinshiwa, pele muntu ulifwiinsha ulakasumpulwa.”

¹² Inzho Jeso wakamwaambila shimeenzu akwe ati, “Ciindi niwabamba cakulya cakususula niciba cakulalila, utatambi balongwaako na banyoko, nibaba bahubi mbumubambene abo, nkaambo abo balakakutamba kwaamba bakuliye.

¹³ Na wacita ipobwe, tamba bapushi, u balema, utambe basunkuta u boofwu.

¹⁴ Wacita bobo, ulaakwata coolwe nkaambo balo bayina cakuya kuzhola. Leza nguukaakuliya mu buzuba bobo baluleme nibakaabuka ku bafwu.”

Cikozhano ce Pobwe Ikando

¹⁵ Inzho umwi wabalombwana bakaakushite kwitebulu naakaateelela aza makani, wakamwaambila Jeso ati, “Bali u coolwe babo bakaalya ipobwe mu Bwami bwa Leza.”

¹⁶ Jeso wakamwaambila ati, “Kakuli muntu wakacita ipobwe ikando ukutamba bantu banji banji.

¹⁷ Inzho nicakashika ciindi cakulya ipobwe, wakatuma musebezhi wakwe kwaamba akabete boonse mbakaakutambile ati, ‘Kamwiza shoonse shabambwa.’

¹⁸ Pele batambe bakakanka kutama. Mutaanzhi wakaamba ati, ‘Ndalomba kulekelelwa kaambo ndakaula muunda ndazanda nkoobone.’

¹⁹ Umwi wakaamba ati, ‘Ndakaula shipani shosanwe shabasune ndazanda kubasoleka mbone mbubakwela.’

²⁰ Aze umwi ati, ‘Indacitwala, nshikonzha kumushiya nabwinga ice.’

²¹ Inzho musebezhi wakazhoka kwiza kwaambila shimatwangaakwe. Shimatwangaakwe wakalemana u kwaambila musebezhi ati, ‘Fwambaana koya mu mikwakwa umutuzhila twamuminzhi yoonse, ukatambe bapushi u balema u boofwu ubakonaushi.’

²² Naakapiluka musebezhi wakaamba ati, ‘Mwami ndacita mbubona mbuwandailila, pele kucili busena muŋanda.’

²³ Shimatwangaakwe wakamwaambila ati, ‘Koya mu tuzhila twamumatungu utuzhila twamumabali ubaambile bantu bezhize kwaamba iŋanda izule.’

²⁴ Ndamushimwina ati, kwiina naaba womwi wa babo bakaakutambilwe ukaalisola ipobwe lyangu!”

Muulo Wakuba Shiciiya

²⁵ Inzho inkamu inkando ya bantu bakaakuya bumucilila Jeso, ngoonaawo wakacebuka wabaambila ati,

²⁶ “Kuti muntu kazanda kuba shiciiya wangu, ulyeelele kumfwuna kubaala mbwaafwini ushi u baina u mwinakwe ubanakwe, u banina balombwana u bakaintu, ulimwi u bumi bwakwe mwini.

²⁷ Muntu woonse utabwezi ciciinkano cakwe ukuncilila takonzha kuba shiciiya wangu.

²⁸ No nguni akati kenu, aakuzanda kuzaka iŋanda inamfwu, utataanguni kukala anshi u kubona ati sa mali ngaakwete alakonzha kuumana mulimo?

²⁹ Nkaambo watacita bobo, cilakukakila kumaninzha. Ulakonzha bulyo kusha mwiimbi wamakancilo amulimo, pele bantu boonse bacibona cacitika balakamuseka.

³⁰ Balakaamba ati, ‘Amubone wezu muntu, wakakanka kuzaka pele wakakilwa kumaninzha!’

³¹ “Kuti mwami kakwete bashikalumamba bali shuulu shili ikumi, ulazanda kulwa uumwi mwami uukwete bashikalumamba bali shuulu shili makumi obile, ulataanguna wakala anshi walibuzha kwaamba sa ulalozha kulwa, ukumuzunda mwaminina ukwete bashikalumamba banji banji.

³² Pele kuti wayana kwaamba talozha kumuzunda, ulatuma bazhiminizhi bakwe ku mwaminina ca kufwambaana kumulomba ati batalwi kube luumuno akati kabo.”

³³ Jeso wakabaambila ati, “Amwe mbubona bobo, kwiina ukonzha kuba shiciiya wangu cita wezo ufwutamina shoonse nshaakwete.”

Kuti Mwino Wabula Mucanka

³⁴ “Mwino mubotu, pele kuti wabula mucanka kwiina mbuucitwa kwaamba ubote ulimwi.

³⁵ Wiina mulimo kubulongo nikuba kumbolezhi, ulaba wakusowa bulyo. Muntu ukwete matwi ateelele!”