Luka 11 - Izwi lya Leza

Jeso Wabayiisha ba Shiciiya bakwe Kukomba

¹ Ciindi cimwi Jeso wakaakukomba kubusena bumwi. Naakamana kukomba, umwi wa bashiciiya bakwe wakamwaambila ati, “Mwami, tuyiishe kukomba, ukoya Johani mbwakayiisha ba shiciiya bakwe.”

² Jeso wakabaambila ati, Ciindi nimukomba, kamwaamba ati, “Taata, alilemekwe izhina lyako, abuzhize bwami bwako.

³ Utupe bwasunu shilyo shesu shabuzuba u buzuba.

⁴ Utulekelele milandu yesu, nkaambo aswe mbutubalekelelalela bali milandu kulyuuswe. Utatweenzha mukutepaulwa.”

⁵ Ulimwi Jeso wakabaambila ati, “No mulatelaika buti, kuti umwi wenu waya kuŋanda yamulongwaakwe akati kamashiku, waya kwaamba ati, ‘mulongwaangu njohwa shinkwa shotatwe,

⁶ ndaswaiwa mweenzu ndabula cilyo cakumupa.’

⁷ Inzho atwaambe ati, mulongwaako wezo uuli muŋanda wakutaba ati, ‘Utampenzha, sa tukubwene ku mulyango ati nkuyale? Ulimwi ume ubanangu toona kale. Nshikonzha kubuka kwaamba nkupe cinkwa.’

⁸ Inzho ume ndazanda kumwaambila bolya, nikuba kuti tazanda kubuka kwaamba akupe cinkwa nkaambo kakuti mulongwaako, ulabuka u kukupa shoonse nshuuzanda, ukaambo kakuti wiina kulisenda, ulimwi watatanana kulomba.

⁹ Ubobo ndamwaambila ati, Amupumpe mulakatambula, amukapule mulakayana, amukonkomone mulakayalulilwa mulyango.

¹⁰ Nkaambo kufwumbwa uupumpa ulatambula, aze ukapula ulayana, umulyango ulayalulwa kuli oonse wezo ukonkomona.

¹¹ No kuti mwana kapumpa inswi kwa ushi, sa ushi ulamupa muzoka?

¹² Na wapumpa iyi, sa ulamupa kapilili?

¹³ Inzho naa kuti umwe nubashishibi mulicizhi kupa banenu shintu shibotu, sa Ushenu uuli kwizeulu, takaabaali kupa Moza Usalala kuli babo bamupumpa?”

Jeso u Belizebule

¹⁴ Jeso wakookusha moza mubiyabi wabushicintaamba mu muntu. Inzho moza mubiyabi niwakamuhwa, muntu wezo wakacilozha kwaamba. Ubobo, bantu banji banji bakaakuliwo bakazoowa cini cini.

¹⁵ Pele bamwi akati kabo bakaamba ati, “Ngu Belizebule, mwami wa myoza mibiyabi nguumupa insana shakukusha myoza mibiyabi.”

¹⁶ Bamwi kabali bashikumulingulula Jeso, ubobo bakamupumpa kwaamba acite maleele aatondezha ati cini cini Leza nguwakamutuma.

¹⁷ Pele Jeso wakazhiba ncibaakutelaika, wakabaambila ati, “Bantu ba mucishi cili comwi, kuti baandaana mu mipampo mipampo, ceco cishi tacikatazha kuzunda. Ulimwi kuti bantu bamukowa balwishanya beni ubeni, mukowa wezo ulazundika.

¹⁸ Abo bwami bwaka Shaatani kuti bwalilwisha bwini no bulazhima buti? Ndabuzha bobo kaambo mulaamba ati Belizebule nguumpa insana shakukusha myoza mibiyabi.

¹⁹ Ume ndakusha myoza mibiyabi munzhila njiyona bamucilila njibasebezha. No nkaamboonzhi mulaamba ati ndakusha myoza mibiyabi munsana sha Belizebule? Mbubona bamucilila mbubakaamuzuzha ukumutondezha ati tamululeme.

²⁰ Tali Belizebule pe, Moza wa Leza nguumpa insana shakukusha myoza mibiyabi, calo citondezha ati Bwami bwa Leza bwashika kulyuumwe.

²¹ “Kuti Shaatani kalibambile u shilwisho shakwe shoonse, kalinda iŋanda yakwe, lubono lwakwe lulalikalila muluumuno.

²² Pele kuti kwashika uumwi umubaala insana, wamulwisha ukumuzunda, ulamunanga shilwisho shakwe nshaashoma ukwaabanya lubono ndwaakananga bantu.

²³ “Kufwumbwa uteendelezhanya ame, ati ngushinkondoma, u wezo ngututeembeli aze, ati ulasangaula.”

Moza Mubiyabi Wapiluka mu Muntu

²⁴ “Kuti moza mubiyabi wamuhwa mu muntu, uleendeenda mulukula kuya bukapula kwakulyoocezhezha. Watayana ulaamba ati, ‘Ndabweela bulyo kuŋanda yangu nkundakahwa.’

²⁵ Inzho apiluka, ulayana iŋanda ilibambilwe ilasalala.

²⁶ Amana ulapiluka kuya kuleta myoza mibiyabi iimwi iili ciloba iimubaala kubiya kwiza kunjila u kukala mu muntu wezo. Inzho ku mamanino bumi bwa muntu wezo bulabiya kubaala mbubwaakubele lutaanzhi.”

Kubotelwa Kwini Kwini

²⁷ Inzho Jeso nakamana kwaamba bobo, umwi mukaintu akati kankamu wakapozomoka wamwaambila Jeso ati, “Ulikwete coolwe mutumbu wakakunonsha!”

²⁸ Inzho Jeso wakamwiingula ati, “Kwaambisha, balikwete coolwe babo bateelela izwi lya Leza ukulicita.”

Bantu Balomba Maleele

²⁹ Bantu nibakahula, Jeso wakakanka kubaambila ati, “Bantu ba mazuba ano mbabiyabi. Balazanda bulyo kubona maleele. Pele kwiina maleele ngubakaabona, cita ceco cakacitika ku mushinshimi Jona.

³⁰ Nkaambo mbubona Jona mbwaakaba citondezho ku bantu baku Ninive, aze Mwanaa Muntu mbwaati akabe citondezho ku bantu baano mazuba.

³¹ Mu buzuba bwa lubeta, mwami mukaintu waku Shiba, ulakabazuzha bantu baba, kaambo walo wakeenda mushinzo kuhwa ku mamanino anshi kwiza kuteelela busongo bwa mwami Solomoni. Pele inzho nkwaali ano ubaala ali Solomoni.

³² Ubobo, bantu baku Ninive balakamuzuzha mu buzuba bwa lubeta kaambo balo bakabeba ku shibi shabo naakabakambaucila Jona, pele ano ngaali ubaala ali Jona.

Mumuni wa Mubili

³³ “Kwiina muntu uzasha ilambe amana waliseseka na walihunicila intumba, pele ulalibika acibicilo ce lambe kwaamba limunikile bantu boonse benjila muŋanda.

³⁴ Menso enu ngu mumuni wamibili wenu. Kuti menso kaali kabotu, mubili woonse ulaakuli mu mumuni. Pele kuti menso kaatali kabotu, awo mubili woonse ulaba mu mushinze uushiya mbi.

³⁵ Ubobo ulyeelele kucenjela kwaamba mumuni uuli mwako utabi mushinze pe.

³⁶ Nkaambo kuti mubili wako koozwile mumuni, kakwiina mushinze nuuceya, ulaakuli mu mumuni, umbona ilambe mbulikumunicila mumuni walyo.”

Jeso Wabalemanina ba Falisi u ba Maayi ba Mulawo

³⁷ Jeso nakamana kwaamba, umwi mu Falisi wakamukumbila kwaamba aye bakalye aze. Ubobo Jeso wakahumina bakaya kuŋanda yakwe kuya kulya.

³⁸ Inzho mu Falisi wakazoowa naakabona kwaamba Jeso wakakanka kulya katana kusamba kumatashi kwiingaina uciyanza cabo.

³⁹ Ubobo Mwami wakamwaambila ati, “Cini cini umwe nuba Falisi mulasanzha inkapu umitiba ngushili ansengwe, pele mukati kenu mulizwile bushaacihule mwangu ubusofwaazhi.

⁴⁰ Umwe nubalimbushi! Sa wakashilenga mukati aansengwe tali womwi?

⁴¹ Inzho umwe nubashaacihule mwangu, amubape bapushi, shesho shili mukati munkapu uumitiba, kwaamba shoonse shikamusalalile.

⁴² Mulakapenga umwe nuba Falisi, kaambo mulalipenzha kupa Leza cekumi catuntu twiina mukumo tulungwa mucilisho, pele mulaluba kucita shiluleme ku bantu u lufwuno lwa Leza. Nkaambo sheshi nshishintu nshimweelele kucita cakutaluba shimwi.

⁴³ “Mapenzhi alamulindila umwe nuba Falisi! Nkaambo mulasala shuuna shabulemu mu shikombelo shaba Juda, u kufwuna kwaanzhiwa ca bulemu.

⁴⁴ Mulakapenga umwe! Nkaambo muli ukoya shuumbwe shiina shizhibyo, awo bantu ngubalyatauka, pele tabazhibi ati ngaashuumbwe.”

⁴⁵ Inzho umwi waba shimulawo wakaamba ati, “Mwiiyi, bobo mbuwaamba, aswe watutuka!”

⁴⁶ Jeso wakamwiingula ati, “Mulakapenga umwe nuba Shimulawo! Nkaambo mulatwika bantu mikuli milemu ikatazha kubweza, nikuba bobo umwe lwenu tamuzanda kubayohwa bantu mikuli yezho naashoonto.

⁴⁷ Mulakapenga umwe! Nkaambo Mulazacila bashinshimi bakayayiwa umaushenu shuumbwe shibotu.

⁴⁸ Nkukwaamba ati, mwakahumina ceco ncibakacita baushenu, kaambo balo bakabayaya bashinshimi, umwe mulazaka shuumbwe shabo.

⁴⁹ Nciceco Leza mu busongo bwakwe ulaamba ati, ‘Ndakabatumina bashinshimi u batumwa, bamwi balakayayiwa, ulimwi bamwi balakapenzhewa.’

⁵⁰ Inzho bantu bacikubucilo ceno balakasubulwa ukaambo kabashinshimi mbubakayaya kuhwa ku malenjelo anshi.

⁵¹ Kukancila ku lufwu lwaka Abelo kushicila ku lufwu lwaka Zakaliya, wezo ngubakayaila akati ka cipaililo abusena busalalisha, muŋanda yaka Leza. Ee ndamwaambila ati bantu bankubucilo yezhi balakapewa mulandu ukaambo ka shintu shoonse sheshi.

⁵² “Mapenzhi ngeenu umwe nuba Shimulawo! Mwakaseseka ciyaluzho ca luzhibo kaambo kakuti umwe tamukanjili, ubobo mulashincila babo bazanda kunjila.”

⁵³ Inzho Jeso nakahwa koko, balembi antoomwi u ba Falisi bakakanka kumutongauka cini cini ukumubuzha mibuzho ikwatilizha shintu shinji shinji.

⁵⁴ Kabasoleka kumuteya kwaamba bamuyanine kaambo mukwiingula kwakwe.