Luka 10 - Izwi lya Leza

Jeso Watuma Bantu bali Makumi Ciloba Ubatwesha Bobile

¹ Munshi lyaaza, Mwami wakasala bantu bali makumi ciloba ubatwesha bobile, wakabatuma bobile bobile kwaamba bamusololele kuya mu minzhi, umumasena oonse momo mwakaakuzanda kuya.

² Wakabaambila ati, “Butebuzhi bwakomena, pele bashikutebula baceya. Ubobo amumukombe Mwami wabutebuzhi kwaamba atume basebezhi kwiza kutebula.

³ Kamuya! Pele amubone ndamutuma ukoya bana ba mbelele akati ka baumpe.

⁴ Mutabwezi shikwama sha mali, nishiba inkomo, nishiba impato. Ulimwi mutaakuya buzhimazhima munzhila kuya bwaanzhanya u bantu.

⁵ Kufwumbwa muŋanda mumukeenjila, mukataangune kwaamba ati, ‘Luumuno lwa Leza alube muŋanda yezhi.’

⁶ “Kwaakuli muntu uzanda luumuno muŋanda yezho, luumuno lwenu lulakakala kwakwe, kwaakwiina, lulakamuzhokela.

⁷ Muŋanda mumukeenjila, mukalye u kunwa kufwumbwa ceco ncibakaamupa, kaambo musebezhi ulyeelelwe boonzo bwakwe. Mutakaakuya mu maanda andeene andeene.

⁸ Kufwumbwa mu munzhi mumukeenjila, kuti bakamutambule, mukalye kufwumbwa ceco ncibakaamusengelela.

⁹ Mukaponye balwazhi bali mu munzhi wezo, ulimwi mukabaambile bantu ba mu munzhi wezo ati, ‘Bwami bwa Leza bwaswena afwaafwi kulyuumwe.’

¹⁰ Pele kufwumbwa mu munzhi mubatakaamutambuli, mukamuhwe, mukaye mu mikwakwa mukaambe ati,

¹¹ ‘Ulufwuko lwamumunzhi wezu loonse lukakatile kumatende esu. Twalukunkumuna, kwaamba cibe cicenjezho nkumubele.’ Nikuba bobo amuzhibaluke ati, Bwami bwa Leza buli afwaafwi.

¹² Ndamushimwina ati, kubuzuba bwa lubeta, mulandu wa Sodoma ulakaceya kubaala wa munzhi wezo.”

Minzhi Iina Lushomo Yacenjezhewa

¹³ “Mulakapenga umwe numinzhi ya Kolozini u Betisaida! Kuti maleele akacitwa muli umwe, naakacitwa mu minzhi ya Taya u Sidoni, minzhi ya bantu batashomi, nibakabeba kale kale bulyo. Nibakasama masaka ukulibuwa itwe kutondezha buusu.

¹⁴ Inzho ndamushimwina ati, mu buzuba bwa lubeta, Leza ulakatondezha luse kuminzhi ya Taya u Sidoni kubaala kulyuumwe.

¹⁵ Aze u Kapenaumi! Sa ulatelaika ati balakakutembaula kwizeulu? Pe pe, ulakasowelwa mukalambwe kamulilo utamana.”

¹⁶ Ulimwi Jeso wakabaambila ba shiciiya bakwe ati, “Muntu uumuteelela, ati wanteelela, aze wezo uumukaka ati wankaka, ulimwi ati wamukaka Leza wakantuma.”

Kupiluka kwa bali Makumi Ciloba Ubatwesha Bobile

¹⁷ Inzho balombwana bali makumi ciloba ubatwesha bobile mbaakaakutumine Jeso bakapiluka balibotelelwe. Bakamwaambila Jeso ati, “Mwami myoza mibiyabi keetuteelela nitwaakakwiikusha mwizhina lyako.”

¹⁸ Inzho Jeso wakabaambila ati, “Ndakamubona Shaatani wakawila anshi ukoya lulabo.

¹⁹ Amuteelele! Ndakamupa insana shakuzunda shinkondonokwenu, mulakalyata bazoka utupilili, tamukalicisa pe.

²⁰ Nikuba bobo mutatangala nkaambo bamuteelela. Pele amutangale ukuti mazhina enu alilembelwe kwizeulu.”

Jeso Watangala

²¹ Inzho ngoona aciindi awo, Jeso wakatangala mu Moza Usalala waamba ati, “Ndakulumba Taata, U Mwami wezeulu iinshi, nkaambo wazubulwila bana bashoonto shintu nshiwakaseseka kubasongo uba shimaanu. Imbubo Taata ukuti waakuzanda ati cibe bolya.

²² “Ndakapewa shintu shoonse kwa Taata. Kwiina naaba womwi umwizhi Mwana, cita Taata. Ulimwi kwiina umwizhi Taata, cita ndi Mwana u babo boonse mbakasala Mwana kwaamba abazubulwile.”

²³ Inzho Jeso wakacindulucila ba shiciiya bakwe wahwiya ati, “Mulilonjelwe umwe numubona shintu sheshi nshimubona.

²⁴ Nkaambo cini cini ndamushimwina ati bashinshimi banji banji ubami, kabazandisha kubona sheshi nshimubona, pele bayina nibakashibona, ulimwi kabazandisha kuteelela aza ngumuteelela, pele bayina nibakaateelela.”

Cikozhano ca Musamaliya Mubotu

²⁵ Inzho muntu umwi shimulawo, wakeza kwa Jeso wakamubuzha mubuzho wakumuteya ati, “U mwiiyi, no ncinzhi ncinjelele kucita kwaamba nkayane bumi butamana?”

²⁶ Jeso wakamubuzha ati, “No kulilembelwe buti mu maŋwalu? Ulapandulula buti?”

²⁷ Wezo muntu wakaingula ati, “Fwuna Mwami Leza wako u monzo wako woonse, u moza wako woonse, iinsana shako shoonse, u matelaishi ako oonse, ulimwi fwuna Shimukobonoko mbubona mbuulifwini umwini.”

²⁸ Inzho Jeso wakamwaambila ati, “Waingula kabotu, ucite umbona bobo ulakayana bumi butamana.”

²⁹ Pele walo shimulawo mbwaakaakuzanda kuliboshezha, wakamubuzha Jeso ati, “No nguni shimukoboma?”

³⁰ Jeso wakamwiingula ati, “Kakuli muntu wakahwa ku Jelusalemu kaya ku Jeliko. Munzhila bakamukwata bafwumpi, bamuuma ukumusamununa shakusama. Bamane baya bamushiya uliwizukile.

³¹ Inzho umwi mupaizhi kaya bweenda munzhila njiyona yezho, naakashika abusena awo, wakabona muntu ulilele, pele wakazeeluka kumabali waya wamushiya.

³² Umbona bobo, aze mu Levi nakashika awo abusena wakoombona muntu wezo ulilele, amane wazeeluka kuluya lumwi wamushiya.

³³ Pele Musamaliya wakaakuya bweenda munzhila yezho, wakashika awo abusena, naakamubona wezo muntu, wakamufwila intenda.

³⁴ Wakaya ngakaakulele, wamutila mafwuta u waini ashilonda ukumuzambaila shisani ashilonda shakwe, amane wamukatula wamubika ambongolo yakwe wamutola kuŋanda ya beenzu kuya kumubamba.

³⁵ Mu buzuba bwakacilila, Musamaliya wakapa mweendelezhi waŋanda ya beenzu mali obile a muwaya waya, wamwaambila ati, Umubambe muntu wezu, ndakapiluka ndakakuzholela kufwumbwa mali nguukasebezha.”

³⁶ Inzho Jeso wakamaninzha u kubuzha shimulawo ati, “No nguni abantu baba botatwe nguutelaika ati wakalitondezha kwaamba ngushimukobonina uwelya muntu ngubakauma bafwumpi?”

³⁷ Shimulawo wakaingula ati, “Nguwelya wakamutondezha luse.” Aze Jeso wakamwaambila ati, “Koya ukacite mbubona bobo.”

Jeso Wabaswaya ba Malita u Maliya

³⁸ Inzho Jeso u ba shiciiya bakwe nibakaakuya bweenda mulweendo lwabo, bakashika mu munzhi mwakaakuhwa mukaintu uutewa ati Malita. Wezu mukaintu wakabatambula muŋanda yakwe.

³⁹ Malita kakwete munina mukaintu, izhina lyakwe kali Maliya, wezu mukaintu, wakakala kumbali kwa Jeso kapupulala kuyiisha kwakwe.

⁴⁰ Ku ciindi ceco Malita wakapakasha ku milimo njakaakucita. Inzho wakaya kwa Jeso wamwaambila ati, “Mwami, sa tubwene ati mukwesu wandekelezha milimo? Mwaambile azhize anjohwe.”

⁴¹ Mwami wakamwiingula ati, “Malita, Malita! Upengelaanzhi ukulipakashizha shintu shinji shinji?”

⁴² “Pele kuli cintu comwi bulyo cizandika. Maliya wasala cintu cibotu, ciina ukaamunanga.”