Incito 8 - Izwi lya Leza

Saulu Wabapezha bana Kilisito

¹ Bobo mbubona buzuba, imbungano yaba Kilisito yamu Jelusalemu yakakanka kupenzhewa cini cini. Ubobo bashomi boonse bakalukanka bamwaala kuya mu masena oonse a Judiya u Samaliya. Mu Jelusalemu kwakashaala bulyo batumwa.

² Balombwana bamwi bashomi bakamuzhika Sitivini, ulimwi bakamulila cini cini.

³ Pele Saulu wakasoleka kwaamba akwate bashomi u kuyaya imbungano. Kaya iŋanda iiŋanda kuya bukwata bashomi balombwana u bakaintu u kubabika muntolongo.

Makani Mabotu Akambaukwa mu Samaliya

⁴ Inzho babo bakamwaala bakaya insamwailila mucishi coonse kuya bukambauka Makani Mubotu.

⁵ Filipo wakaya ku munzhi mukando waku Samaliya, kuya kukambauka makani a Munanike wa Leza ku bantu ba mucishi.

⁶ Bantu banji banji nibakateelela makani ngakaamba Filipo, u kubona maleele ngaakacita bakashoma.

⁷ Myoza mibiyabi yakaakuhwa mubantu banji banji, keelila ca kupozomoka, ulimwi bantu banji banji balema ubakakupuutile mibili bakapona.

⁸ Ubobo mu munzhi momo mwakaba lutangalo lukando cini cini.

⁹ Inzho mu munzhi wezo kamuhwa mulombwana umwi wakaakutewa ati Saimoni. Kali shimabibo wakaakuzoosha bantu mu Samaliya, nkaambo kalitembaula ati kali mulombwana mwini mwini.

¹⁰ Ulimwi bantu boonse ba mu munzhi wezo, balemekwa u bantu bulyo kabamulumbaizha u kumupa bulemu, ulimwi kabamushoma. Ubobo kabamutembaula ati, “Wezu muntu ulikwete insana sha Leza uutewa ati, ‘Leza Mukando’ ”

¹¹ Saimoni wakaakubazoosha bantu umabibo akwe, cakuti abo bantu bakakanka kumuteelela.

¹² Ciindi Filipo naakakambauka Makani Mabotu, ukukanana sha bwami bwa Leza usha Jeso Kilisito, bantu banji banji bakaintu u balombwana bakashoma u kupapatizwa.

¹³ Aze Saimoni wakashoma, naakamana kupapatizwa wakakala antoomwi u Filipo. Inzho cakamuzoosha naakabona maleele u shitondezho nshaakaakucita Filipo.

¹⁴ Batumwa bakaakuli mu Jelusalemu bakateelela ati abo bantu bamu Samaliya batambula mazwi a Leza. Ngoonaawo bakatumako Pita u Johani.

¹⁵ Inzho nibakashika koko, bakaya kukombela bashomi kwaamba batambule Moza Usalala.

¹⁶ Nkaambo Moza Usalala kootana kushika a muntu naaba womwi wabo, nikuba kwaamba ati bakapapatizwa mwizhina lya Mwami Jeso.

¹⁷ Ba Pita u Johani bakaampa matashi abo a bashomi, ngoonaawo bakatambula Moza Usalala.

¹⁸ Inzho Saimoni welya wakaakuli shimabibo, naakabona kwaamba Moza wapewa ku bantu babo bakaampwa matashi ku batumwa, wakazanda kupa mali ba Pita u Johani.

¹⁹ Wakabaambila ati, “Amumpe insana sheshi kwaamba ame ndukucita ati kufwumbwa muntu ngundaampa matashi watambula Moza Usalala.”

²⁰ Pele Pita wakamwiingula ati, “Kufwa bulyo u mali ako! Uwe ulatelaika ati cipo ca Leza cilaulwa u mali!

²¹ Wiina busena niciba caabilo mu mulimo wesu, nkaambo monzo wako tooluleme ku bushu bwa Leza.

²² Ulyeelele kusanduka ku cibi ceci ncuutelaika. Ukombe ku Mwami kwaamba akulekelele kumizeezo iili mumonzo wako.

²³ Nkaambo ndabona kwaamba uli muntu uuzwile indulwe ya munyono, uli mwaanje ku cibi.”

²⁴ Inzho Saimoni wakaambila Pita ati, “Ndalomba bakwesu, amunkombele ku Mwami kwaamba kutabi cintu niciba comwi cincitikila ku makani aza ngumwaŋambila.”

²⁵ Ba Pita u Johani nibakamana kupa bumboni u kwaamba mazwi a Mwami bakabweela ku Jelusalemu. Nibakaakuya bakaita mu minzhi minji minji ya mucishi ca Samaliya kabaya bukambauka Makani Mabotu.

Muntu waku Isiyopiya

²⁶ Inzho anjelo wa Mwami Leza wakaambila Filipo ati, “Zhimuka u kuya kumukwakwa uli kucibizhi, uyita mulukula kuhwa ku Jelusalemu kuya ku Gaza.”

²⁷ Ubobo Filipo wakazhimuka waya, wakayana mulombwana waku Isiyopiya muzhibe, wakaakuli muntu mulemu. Wezu muntu kapelwe insana shakubamba lubono lwa Kandasi mwami mukaintu wa cishi ca Isiyopiya. Wakahwa ku Jelusalemu kupaila Leza, kaya ku munzhi kwakwe mucikoci.

²⁸ Kaya bubala cakupozha mwibuka lya mushinshimi Aizaya.

²⁹ Ngoonaawo Moza Usalala wakaambila Filipo ati, “Koya afwaafwi u cikoci celya.”

³⁰ Filipo naakaswena afwaafwi, wakamuteelela muntu wezo ulabala mwibuka lya mushinshimi Aizaya. Ngoonaawo wakamubuzha ati, “Sa uliteelele ncaamba makani azo nguubala?”

³¹ Wezo muntu waku Isiyopiya wakaingula ati, “Pe pe, nshaateelele, cita kuti kwaba muntu uumpandululila.” Ngoonaawo Filipo wamukumbila ati ndakumbila ndize mucikoci tubambane.

³² Makani a cibalo ncaakaakuya bubala muna Isiyopiya wezo ngaaza, “Kali ukoya imbelele iiya kuyayiwa. Kali ukoya mwanaa mbelele utalila nashizwa boza. Ubobo wiina naakayalula mulomo wakwe.

³³ Wakalibonzha ulimwi wiina naakabetekwa bweelele. Kwiina ukakaamba shaluhwubo lwakwe anshi ano, nkaambo bumi bwakwe bwabwezwa kuhwa anshi.”

³⁴ Ngoonaawo muna Isiyopiya wakamwita Filipo ati, “Mpandululila, no wezu mushinshimi waambani ku makani aza, sa ulalyaamba lwakwe mwini na ulaamba muntu unji?”

³⁵ Inzho Filipo wakayalula mulomo wakwe, kukancila makani a cibalo ceco ncicona, wakamwaambila shamakani Mabotu a Jeso.

³⁶ Nibakakuya bweenda mumukwakwa, bakashika kubusena bwakaakukwete meenzhi. Ngoonaawo muna Isiyopiya wakaamba ati, “Amubone ngaaza meenzhi. No cinzhi cinkasha kupapatizwa?”

³⁷ Filipo wakaingula ati, “Ulakonzha kupapatizwa na washoma u monzo wako oonse.” Ubobo muna Isiyopiya wezo wakaamba ati, “Ee, ndashoma ati Jeso Kilisito ngu Mwanaa Leza.”

³⁸ Muna Isiyopiya wakanzhimika cikoci cakwe, inzho boonse bobile bakanjila mu meenzhi, ngoonaawo Filipo wakamupapatiza.

³⁹ Nibakahwa mu meenzhi, Moza wa Mwami Leza wakamutola Filipo. Muna Isiyopiya wina linji nakamubona Filipo. Muna Isiyopiya wakaya mu mushinzo wakwe ca lutangalo.

⁴⁰ Ngoonaawo Filipo wakaliyana ku munzhi wa Azotusi. Koko kaya bukambauka Makani Mabotu mu minzhi mpaka wakashika ku Sizaliya.