Incito 7 - Izwi lya Leza

Mazwi aka Sitivini Munkuta

¹ Inzho mupaizhi mukando wakamubuzha Sitivini ati, “Sa twaambo totu ntwini twini?”

² Sitivini wakaingula ati, “Nubakwesu u numatata, amumpupulale! Leza wa bulemu wakalibonya kwa Taata Abulahamu nakaakucikala mucishi ca Mesopotamiya, natakaakuna kulonga kuya ku Halani.

³ Wakamwaambila ati, ‘Ushiye mukwashi wako u cishi cako, uye ku cishi ncinkaakutondezha.’

⁴ Ngoonaawo Abulahamu wakacishiya cishi ca Caludiya, waya kukala ku Halani. Afwe bulyo ushi, Leza wakamukusha ukumuleta mucishi ceno ncimushite ninzho.

⁵ Leza wiina kumupa inshi niiceya kwaamba lube lukono lwakwe. Pele waamushomezha ati walo, u luhubo lwakwe, balakakona inshi yezhi, nikuba kwaamba ati ku ciindi ceco Abulahamu kaina mwana pe.

⁶ Leza wakamwaambila ati, ‘Baluhubo lwako balakakala mucishi ca bantu banji, babo bakaabacita buzhice, ukubapenzhewa kwa myaka iili myaanda yone.’

⁷ Ulimwi Leza wakaamba ati, ‘Ndakabapa cibebyo bantu babo mbubakaasebezela milimo.’ Kuhwaawo, balakamuhwa mucishi ceco balakampaila mu busena bono.

⁸ Inzho Leza ulakabapa ciyanza ca kupalulwa kwaamba cibe citondezho ca cihuminano. Ubobo Abulahamu wakamupalula Aizeki naakaba u mazuba ali lusele kuhwa kukuzhalwa. Aizeki wakazhala Jakobo, Jakobo wakazhala bana bali ikumi ubatwesha bobile, babo balo mbubashaakale besu.

⁹ “Inzho banakwe Jakobo bakamufwila munyono Jozefu munyokwabo, bakamuuzha kwaamba akabe muzhice ku Ijipiti. Pele Leza kali aze,

¹⁰ wakamufwutula mu mapenzhi akwe oonse ulimwi wakamuyohwa Jozefu ciindi naakalibonya ku bushu bwa Falawo mwami wa Ijipiti. Ubobo Falawo wakamubika Jozefu a bweendelezhi bwa cishi u bwa ŋanda yakwe.

¹¹ Inzho kwakaba inzala mu cishi ca Ijipiti u Kenani, inzala yezho yakaleta mapenzhi manji manji ku bantu. Ba shaakale besu kabatakonzha kuyana cakulya.

¹² Jakobo naakateelela ati ku Ijipiti kuli cakulya, wakatuma banakwe ku Ijipiti mulweendo lwabo lutaanzhi.

¹³ Mulweendo lwabo lwabili, Jozefu wakalipandulula ku banina, ulimwi wakamuzhibya Falawo shabanina.

¹⁴ Jozefu wakatuma kwa ushi kwaamba azhize ku Ijipiti antoomwi ubanakwe. Ku ciindi ceco Jakobo kakwete bantu bashika ku makumi ali ciloba ubatwesha bosanwe.

¹⁵ Inzho Jakobo wakaya ku Ijipiti koko nkwaakaya kufwila walo u ba shaakale besu.

¹⁶ Mitunta yabo yakatolwa ku Shekemu nkuyakazhikwa mu shuumbwe nshaakaula Abulahamu u mali kuhwa ku banakwe Hama.

¹⁷ “Inzho ciindi nicakashika afwaafwi ca kuzuzucizha cishomezho Leza ncaakapa Abulahamu, bantu besu bakahula mu Ijipiti.

¹⁸ Ku ciindi ceco kwakalela mwami unji mu Ijipiti wataakumwizhi Jozefu.

¹⁹ Wezo mwami wakasebezha lucengo u kupenzha bantu besu. Kashinicizha ba matumbu kusowa twana tutece kwaamba tufwe.

²⁰ Ceco nciciindi Mozesi naakazhalwa. Kali mwana mubotu cini cini. Wakakala ukulelwa u bayina muŋanda ya ushi kwa mwezhi yotatwe.

²¹ Naakakushiwa muŋanda, mwanakwe Falawo mukaintu wakamubweza wayakumulela ukoya mwanakwe wakulizhalila.

²² Ubobo Mozesi wakayiya busongo bwa bantu bamu Ijipiti cakubumaninina. Milimo yakwe u mazwi akwe kakwete insana.

²³ “Ciindi Mozesi naakakwata myaka iili makumi one, wakatelaika kuya kuswaya banina banakwe Izilaili.

²⁴ Inzho naakabona umwi wabo ulapenzhewa kumuna Ijipiti, wakamuyohwa muna Izilaili nina, wakayaya muna Ijipiti wezo.

²⁵ Walo wakatelaika ati mukucita bobo banina balazhiba ati ngu Leza wamusebezha kwaamba abafwutule. Pele bayina nibakazhiba.

²⁶ Nibwakaca Mozesi wakabona ba Izilaili bobile balalwa beni ubeni. Mu kuzanda kubahuna wakabaambila ati, ‘Akaka bakwesu, no ncinzhi ncimulwila nubantu bamukowa?’

²⁷ Wezo shikukanka mweenzhiina wakeza wamutonka Mozesi, wamwaambila ati, ‘No nguni wakakubika kwaamba ube muleli umubeteshi akati kesu?

²⁸ Sa ulazanda kunjaya bolya mbuwakayaya muna Ijipiti welya zona?’

²⁹ Ateelele bobo Mozesi, wakalukancila ku Midiyani, nkwaakaya kukala u kuzhala bana bobile balombwana.

³⁰ “Nikwakaita myaka iili makumi one, anjelo wakalibonya kwa Mozesi mu cihuna cizaka mulilo mulukula afwaafwi ulupili lwa Sinai.

³¹ Mozesi wakazoowa naakabona ceci, inzho wakaswena afwaafwi ku cihuna kwaamba aboneshe. Ngoonaawo wakateelela izwi lya Mwami lyaamba ati,

³² ‘Ndime Leza waba shaakale benu, ba Abulahamu u Aizeki u Jakobo.’ Mozesi wakazhangama wakatiya, wiina nakasola kulanga ko.

³³ Ngoonaawo Mwami wakamwaambila ati, ‘Samununa impato shako, nkaambo awo nguuzhimine ngaabusena busalala.

³⁴ Cini cini ndalanga, ndaabona mapenzhi ngubapenga bantu bangu mu Ijipiti. Ndateelela kutongauka kwabo, inzho ndeza kwaamba mbahune, ndazanda nkutume ubweele ku Ijipiti.’

³⁵ “Wezu ngu Mozesi ngubakakaka nibakaamba ati, ‘No nguni wakubika kwaamba ube muleli umubeteshi?’ Inguwe Leza ngwaakatuma, kwiita mwaanjelo ngwaakabona mu cihuna.

³⁶ Mozesi wakabasololela bantu kuhwa mu Ijipiti. Kacita maleele u shitondezho shizoosha mu Ijipiti u lwaatele Lusubila, u mulukula kwa myaka iili makumi one.

³⁷ Mozesi nguwakaambila ba Izilaili ati, ‘Leza ulakatuma mushinshimi kuhwa akati ka banyokwenu uuli ukoya ume.’

³⁸ Mozesi kali antoomwi ubazhali besu ba Izilaili, nibakaakubungene mulukula u anjelo ngubakaamba aze alupili lwa Sinai u ba shaakale besu, ukutambula mazwi a bumi u kwaatambika kuli uswe.

³⁹ “Pele ba shaakale besu bakakaka, bayina kumuteelela, u myonzo yabo keezandisha kupiluka ku Ijipiti.

⁴⁰ Bakaambila Aloni ati, ‘Tupanjile baleza bati batusololele, nkaambo tatwizhi camucitikila Mozesi wezo wakatukusha ku Ijipiti.’

⁴¹ Ceco nciciindi ncibakabumba cibumbwa ca moombe, bakacipa impaizho yakucilemeka, u kutangalila milimo ya matashi abo.

⁴² Ubobo Leza wakabafwutamina wabashiya mu shibi shakukomba shintu sha kwizeulu. Mbubona mbukulembelwe mwibuka lya bashinshimi ati, “Umwe nubana Izilaili! Sa takulikwangu nkumwakaleta mulumbo wa banyama mbumwakayaya ku myaka iili makumi one mulukula?

⁴³ Mwakakomba Molaci leza wa kupanga iintongwezhi ya leza wenu Lefani. Shesho kashili shibumbwa nshimwakapanga kwaamba muukushipaila. Ubobo ndakamutandila kulaale kubaala cishi ca Babiloni.

⁴⁴ “Ba shaakale besu kabakwete itente mubakaakukombela mulukula. Lyakabambwa kwiingaina u cikozhano ceco ncakabona Mozesi.

⁴⁵ Abo ba matata umbona bakalileta antoomwi u Joshiwa naakabatola kuya kukona cishi ca mishobo yezho Leza njakatanda. Bakakala alyo mpaka kushicila ciindi ca mwami Devidi.

⁴⁶ Leza wakamufwila luse Devidi. Devidi wakamukumbila Leza kwaamba amuhumizhe kwaamba ayane busena bwa kuzaka iŋanda iikaba ya Leza ngwaakaakukomba Jakobo.

⁴⁷ Pele Solomoni nguwamuzakila iŋanda yezho Leza.

⁴⁸ “Nikuba ati Namakungwe mutalabala takala mu maanda aazakwa u bantu, ukoya mbwakaamba mushinshimi ati,

⁴⁹ “‘Izeulu ncicuuna cangu ca bwami, inshi ncicilyatilo ca maulu angu. No mulanzacila iŋanda, iili buti? No mbulikwi busena bwangu bwakulyoocezhezha?

⁵⁰ Sa taali matashi angu aakalenga shintu shoonse?’

⁵¹ “Umwe nubacikaka koobwa! Numukwete myonzo iitasanduka! Numwiina matwi! Amwe mulikozhene u ba shaakale benu, ciindi coonse mulookazha Moza Usalala.

⁵² Sa kuli mushinshimi naaba womwi ngubatakapenzha ba shaakale benu? U babo bakashinshima kwiza kwa Musalazhi wa Leza bakabayaya. Amwe ninzho mwamwaaba u kumuyaya.

⁵³ Umwe numwakatambula Milawo ya Leza yakaletwa anshi ano u baanjelo, pele mwiina nimwakeecilila pe.”

⁵⁴ Inzho nibakateelela makani ngakaamba Sitivini bakeenduka, bakakanka kuceka meno ca bukali.

⁵⁵ Pele Moza Usalala wakamunjila Sitivini, ngoonaawo wakalyaalala kwizeulu u kubona bulemu bwa Leza u Jeso ulizhimine kwitashi lya cilyo lya Leza.

⁵⁶ Ngoonaawo wakaamba ati, “Amubone! Ndalibona izeulu lyayaluka, u Mwanaa Muntu ulizhimine kwitashi lya cilyo lya Leza!”

⁵⁷ Bantu bakaashinka matwi abo ukupozomoka iizwi ikando, boonse bakakulumucila kwa Sitivini.

⁵⁸ Bakamukusha ansengwe lya munzhi bamuuma mabwe. Bakamboni bakapasaula shikobelo shabo bamane bakabika ku maulu a mulombwana utewa ati Saulu kwaamba abakwatile.

⁵⁹ Nibakaakumuuma mabwe, Sitivini wakakomba ati, “Mwami Jeso tambula moza wangu!”

⁶⁰ Wakafwukama anshi wapozomoka ati, “Mwami utabapi mulandu wa cibi ceci!” Amane kwaamba bobo, wakafwa. Aze Saulu wakahumina kwaamba cabakabotu kumuyaya.