Incito 6 - Izwi lya Leza

Kusalwa kwa Bayohwi bali Ciloba

¹ Mu mazuba azo ciindi bashomi nibaakuya buhula ku mweelwe, kwakaba matongaushi akati kaba Juda bakakwaamba ci Heleni u babo bakaakwaamba ci Juda, nkaambo bamuka bafwu babo, kabatabakwati kabotu muciindi cakwaabanya shipo shabuzuba u buzuba.

² Ubobo batumwa bali ikumi ubatwesha bobile bakaswaanganya inkamu yoonse ya bashomi u kubaambila ati, “Taciluleme kwaamba uswe tucileke kukambauka mazwi a Leza tuukukwete kwaabanya shakulya.

³ Inzho nubakwesu amusale balombwana bali ciloba akati kenu, mbumwizhi kwaamba balizwile Moza u busongo, kwaamba bapewe mulimo wezu.

⁴ Pele uswe lwesu tulalyaaba kumulimo wa kukomba u kukambauka.”

⁵ Inzho inkamu yoonse yakabotelwa ku makani aza, ngoonaawo bakasala Sitivini mulombwana wakaakuzwile lushomo u Moza Usalala, u Filipo, u Polokolasi u Nikana, u Timoni, u Pamenasi u Nikolasi waku Antiyoki, wezo wakasanduka kale kuba mu Juda katana kuba mushomi.

⁶ Baba balombwana bakaletwa ku batumwa. Batumwa bakabakombela ukubaampa matashi.

⁷ Inzho Mazwi a Leza akazuwa koonse koonse, u mweelwe wabashomi wakaakuya buhula mu Jelusalemu. Bapaizhi banji banji bakashoma.

Ba Juda Bamukwata Sitivini

⁸ Inzho Sitivini kazwile luse iinsana sha Leza. Kacita maleele ushitondezho sha nsana akati ka bantu.

⁹ Pele nikuba bobo bamwi bantu bakaakumukazha, kwaambisha babo bankamu ya cikombelo caba Juda cakaakutewa ati ca Bantu Baangulule. Baba kabali ba Juda bahwa ku Sailini uku Alekizandiliya, ulimwi kakuli bamwi bakaakuhwa kumashi a Siliya u Ezha. Baba bantu bakakanka kukazhanya u Sitivini

¹⁰ Moza wa Leza wakamupa busongo bunji bunji Sitivini, cakuti kabatakonzha kuzhima ku busongo u Moza ngwaakaakwaambya.

¹¹ Ubobo bakalya makulo u bantu bamwi kwaamba bamulenjelele twaambo Sitivini twakuti, “Twakamuteelela ulaamba makani aakusampaula Mozesi u Leza!”

¹² Mukucita bobo bakaleta lupyopyongano akati ka bantu, bakando bakando ba cishi, u balembi. Ngoonaawo bakamukwata Sitivini u kumutola kunkuta.

¹³ Bakaleta bakamboni babeshi bakaamba ati, “Wezu muntu lyoonse ulaamba makani aakusampaula iŋanda ya Leza iisalala u Mulawo.

¹⁴ Nkaambo twakamuteelela ulaamba ati, Jeso waku Nazanleta ulakeumbulula iŋanda ya Leza, ukusandula shiyanza nshaakatupa Mozesi!”

¹⁵ Inzho boonse babo bakaakuli munkuta bakamutongomwena Sitivini, bakabona bushu bwakwe bwaba ukoya bushu bwa anjelo.