Incito 5 - Izwi lya Leza

Ananiyasi u Safila

¹ Inzho muntu umwi wakaakutewa ati Ananiyasi u mwinakwe Safila, abo bakauzha lubono lumwi ndubakaakukwete.

² Bakapangana u mwinakwe kwaamba bashiye mali amwi ngubakauzha lubono lwabo, u kutola amwi ku batumwa.

³ Pele, Pita wakaamba ati, “Ananiyasi, no nkaambonzhi wahumizha Shaatani kweendelezha monzo wako, kwaamba ucenge Moza Usalala, niwaseseka cipanzha cimwi ca mali nguwakayana niwakauzha lubono lwako?

⁴ Sa niwataakuna kuluuzha lubono lolu kalutali lwako? U ciindi niwakaluuzha, sa mali kaatali ako? No kayi wakatelaika buti mu monzo wako kucita cintu cili bolya? Wiina kucenga bantu, wacenga Leza!”

⁵ Ngoonaawo Ananiyasi naakateelela mazwi aza wakawa anshi wafwa lufwu lwakwaanzuka. Inzho boonse bakateelela cakacitika bakatiya cini cini.

⁶ Ngoonaawo kwakeza bakubushi booputa mu masani mutunta waka Ananiyasi baya kuuzhika.

⁷ Nikwakaita ciindi ca mawoola ali otatwe muka shikwaahwa Ananiyasi, wakeza kunjila mubakaakubele batumwa, pele katezhi cakacitika.

⁸ Pita wakamubuzha ati, “Nshimwina baama, sa wezu ngumweelwe wa mali oonse ngumwakayana nimwakauzha lubono lwenu umulumyaako?” Wakaingula ati, “Ee inguwe.”

⁹ Ngoonaawo Pita wakamubuzha ati, “No kaamboonzhi uwe u mulumyaako mwateelezhanya kwaamba musukushe Moza wa Mwami? Wababona bantu baakwiile kuzhika mulumyaako mbubaba amulyango, inzho balakubweza aze bakakuzhike.”

¹⁰ Aciindi ngoonaawo wakawa anshi kumatende aka Pita, wafwa. Inzho bakubushi babo nibakenjila bakayana kwaamba mukaintu aze ulifwile. Bakamubweza baya kumuzhika kumabali u mulumyaakwe.

¹¹ Ubobo imbungano yoonse u bantu bamwi bakaateelela makani aza bakatiya cini cini.

Batumwa Bakacita Maleele Ushitondezho Shizoosha

¹² Batumwa bakacita maleele manji manji ushitondezho shizoosha akati ka bantu. Boonse bashomi kababungana antoomwi mwibetecelo litewa ati lya Solomoni.

¹³ Kwiina uunji wakasoleka kubasangana watakaakuli mushomi, Pele bantu bamwi bakaakubatembaula.

¹⁴ Nikuba bobo bantu banji banji balombwana u bakaintu bakaakuzunjilwa ku Mwami.

¹⁵ Ubobo bantu bakaakuleta balwazhi banji banji ukubooneka kumbali kunzhila amalo abo, kwaamba Pita ayita cinhule cakwe cibakutuzhe bapone.

¹⁶ Bantu banji banji bakashika kuhwa mu minzhi ilanjene u Jelusalemu. Bakaleta balwazhi babo u babo baakunjililwe myoza mibiyabi, inzho boonse bakapona.

Batumwa Bakanka Kupenzhewa

¹⁷ Inzho mupaizhi mukando u babo mbakaakuli abo bamunkamu yaba Saduki bakafwa munyono.

¹⁸ Bakabaanga batumwa u kubabika muntolongo ya buleya.

¹⁹ Pele mashiku anjelo wa Leza wakeza kuyalula milyango ya ntolongo wabakusha batumwa u kubaambila ati,

²⁰ “Kamuya muŋanda ya Leza, mukaambile bantu boonse sha bumi bobu bupiya.”

²¹ Batumwa bakaateelela malailile aza. Kumancela bakenjila muŋanda ya Leza u kukanka kuyiisha. Inzho mukando wa bapaizhi u balongwaakwe nibakashika, bakoompolola bakando bakando baba Juda kumuswaangano mukando. Ulimwi bakatuma kuntolongo kwaamba batumwa baletwe nkubabele.

²² Babo bakatumwa nibakashika bakayana ati batumwa tabemo muntolongo. Bakapiluka kunkuta u kuya kubulana ati,

²³ “Nitwashika kuntolongo twayana kwaamba milyango yoonse iliyalilwe ulimwi iliinjilwe kabotu kabotu, ubalindizhi twabayana ngubali a milyango. Pele nitwayalula milyango, twayana mukati mwiina muntu ulimo.”

²⁴ Inzho mukando wa balindizhi ba ŋanda ya Leza u bapaizhi bakando nibakateelela bobo bakazhingwa kwaamba ncinzhi cacitika ku batumwa.

²⁵ Ngoonaawo umwi muntu wakashika wabaambila ati, “Amuteelele! Balya balombwana mbumwakaakubikile muntolongo bali muŋanda ya Leza, balayiisha bantu!”

²⁶ Ubobo mukando wa balindizhi ba muŋanda ya Leza wakaya u bantu bakwe kuya kuleta batumwa. Pele bayina kusebezha insana, nkaambo bakatiya kwaamba bantu balaba nibabauma mabwe.

²⁷ Bakabaleta batumwa kunkuta. Inzho mupaizhi mukando wakabaambila ati,

²⁸ “Umwe twakamulailila kwaamba mutayiisha linji mwizhina lya muntu wezu. Pele inzho amubone mbumwacita! Impuwo yakuyiisha kwenu yazuwa moonse mu Jelusalemu. Mulazanda kubika bulowa bwa muntu wezu a mitwi yesu!”

²⁹ Ngoonaawo Pita u batumwa bamwi bakaingula ati, “Tulyeelele kuteelela Leza kubaala bantu!”

³⁰ “Leza wabatatesu uwakabusha Jeso ku bafwu, wezo ngumwakayaya nimwakamukankamina aciciinkano.

³¹ Pele Leza wakamusumpula ukumukalika abusena bwa bulemu, ati abe Musololi u Mufwutuli, kwaamba bantu ba Izilaili basanduke u kutambula lulecelelo lwa shibi shabo.

³² Uswe tuli bakamboni ba shintu sheshi antoomwi u Moza Usalala, wezo Leza ngwaakapa babo boonse bamuteelela.”

³³ Babeteshi nibakateelela makani aza, bakalemana cini cini cakuti kabazanda kubayaya batumwa.

³⁴ Pele umwi wabo mu Falisi utewa ati Gamaliyeli, mwiiyi wa Mulawo, kali muntu wakaakulemekwa cini cini u bantu boonse, wakazhima munkuta walailila ati batumwa botatwe babo baye ansengwe.

³⁵ Ngoonaawo wakaambila babeteshinina ati, “Nubana Izilailima atucenjele kuli ceco ncituzanda kucita ku bantu baba,

³⁶ Amuzhibaluke kwaamba mazuba akamana, kakuli muntu umwi wakaakutewa ati Tiyudasi. Wakakanka kulyeensheensha kuba muntu utiiwa, ulimwi kakwete balombwana baakumucilila bashika ku myaanda yone, pele nakayayiwa, boonse bakaakumucilila bakamwaala u milimo yakwe yakamana.

³⁷ Munshi kwakeza Judasi waku Galilaya ku ciindi ca kubalwa kwa bantu, aze mbubona wakakwela bantu banji banji bakaakumucilila. Pele aze wakayayiwa, bakaakumucilila bakamwaala.

³⁸ Inzho ku makani aza ngutukwete bwasunu, ndamushimwina ati kutabi cintu ncimucita ku bantu baba, Amubaleke bulyo. Nkaambo aakuli mulimo wabo wezu wakacitwa u bantu, mulabona kwaamba toohwililila.

³⁹ Pele na kuti ulahwa kwa Leza tamukonzha kubazunda pe, mulayana kwaamba mulalwa u Leza!” Babeteshi boonse bakacilila malailile mana Gamaliyeli.

⁴⁰ Nibakamana kubandika bakabeta batumwa kwaamba banjile mukati, bamane bakabazupaula tulusu ukubalailila ulimwi kwaamba tabeelele kuyiisha mwizhina lya Jeso, ngoonaawo bakabaleka.

⁴¹ Batumwa bakahwa munkuta balibotelelwe cini cini nkaambo balo cakababela cibotu kupenzhewa ukaambo kezhina lya Jeso.

⁴² Buzuba u buzuba kabayiisha u kukambauka Makani Mabotu muŋanda ya Leza u mumaanda abo, balaamba ati Jeso ngu Munanike wa Leza.