Baefeso 5 - Izwi lya Leza

Kweenda mu Mumuni

¹ Inzho mbumuli banakwe Leza mbaafwini, mulyeelele kumukozha.

² Amupone bumi bwa lufwuno, mbubona Kilisito mbwakatufwuna. Wakalyaaba mwini lwakwe ukaambo kesu kwaamba cibe cituuzho u cipaizho kwa Leza cabwema bubotu.

³ Mbumuli bantu ba Leza, bumambe u kulikumbuzha nikuba kulisofwaazha kuli koonse takweelele kwaambwa akati kenu.

⁴ Kutabi mafwunze aunsha insoni nituba twaambo twabulimbushi, ukusabwizhanya kwenu kutabi kwalucengo pele akube kwakutembaula Leza.

⁵ Amuzhibishe kwaamba ati kwiina muntu uusofweele naaba shimamambe naa shaacihule mwangu ukonzha kukona bwami bwaka Kilisito u bwami bwa Leza.

⁶ Kutabi muntu uumucenga ku mazwi bulyo atasebezi, nkaambo shintu shili bolya nshishileta bukali bwa Leza ku bantu batamucilila.

⁷ Ubobo mutaakweenda abo.

⁸ Ku mazuba a kale kale amwe mwakaakuli mu mushinze, pele mazuba ano muli mu mumuni wa Mwami. Ubobo kamweenda ukoya bantu bali mu mumuni.

⁹ Nkaambo mucelo wa mumuni ulayanwa mu shintu shoonse shibotu, shiluleme sha cini cini.

¹⁰ Amuliiye shintu shibotezha Mwami.

¹¹ Mutabi nimuyanwa mu milimo mibiyabi ya mu mushinze, pele amwiizubulule ishaale atuba.

¹² Nkaambo cilausha insoni nikuba bulyo kushaamba nshibacita mu maseseke.

¹³ Inzho mumuni nguuzubulula kwaamba shilibonye shishaale atuba.

¹⁴ Nciceco ncikulembelwe ati, “Buka uwe nucoona, Buka kuhwa ku bafwu, u Kilisito ulakumunikila.”

¹⁵ Amucenjele cini cini mukweenda kwenu. Muteenda ukoya bantu bayina ncibezhi, pele amweende mbuli bantu basongo.

¹⁶ Ciindi mutacisowa amucisebezhe bweelele, kaambo ano mazuba mabiyabi.

¹⁷ Ubobo mutabi balimbushi, pele amuzhibe ceco Leza ncaazanda.

¹⁸ Mutakolwa mukuku ulamupa kulebwa, pele amusololelwe u Moza Usalala.

¹⁹ Amwaambauzhanye kwiita mu ntembauzho, iinyimbo shamu Moza, amwiimbile Leza inyimbo shakubotelwa kuhwa mu myonzo yenu.

²⁰ Mwizhina lya Mwami wesu Jeso Kilisito, lyoonse mulumbe Leza Tatesu ukaambo ka shintu shoonse.

Bakaintu u Balumyaabo

²¹ Amulemekane umwi uumwi mbubona mbumumulemeka Kilisito.

²² Nu bakaintu amulibonzhe ku balumyeenu mbubona mbumulibonzha ku Mwami.

²³ Nkaambo mulombwana ngu mutwi wa mukaintu mbubona Kilisito mbwaali mutwi wa mbungano, ili ngu mubili wakwe ulimwi ngu mufwutuli wanjiyo.

²⁴ Mbubona imbungano mbwiilibonzha kwa Kilisito, abo bakaintu balyeelele kulibonzha ku balumyaabo mu shintu shoonse.

²⁵ Nu balombwana numutwele nombafwune benenu, mbubona Kilisito mbwakeefwuna imbungano u kulyaaba ukaambo kanjiyo,

²⁶ kwaamba esalazhe u kwiisanzha mu meenzhi kwiita mwizwi lyakwe.

²⁷ Kazanda ati ibe imbungano yakwe mukamwini yabulemu, iina butongo nikaba kabala niciba cibiyabi cimwi, pele ibe inondoshi ulimwi iisalala.

²⁸ Ubobo balombwana batwele balyeelele kubafwuna benabo mbubona mbubafwini mibili yabo. Wezo uufwini mwinakwe ati ulyuufwini mubili wakwe.

²⁹ Nkaambo kwiina muntu uswile mubili wakwe, uloosanina ukuubamba kabotu, mbubona u Kilisito mbwaacilila imbungano

³⁰ iili ngu mubili wakwe, inzho uswe tuli shizo sha mubili wakwe.

³¹ Mbubona mbwaamba maŋwalu ati, “Nkaambo kako mulombwana ulakashiya ushi u baina ukukakatila kumwinakwe, inzho bobile baba balakaba mubili womwi.”

³² Aza mazwi alatwaambila makani maseseke, pele alaamba sha Kilisito iimbungano.

³³ Pele ulimwi a Leza kwenu, kwaamba woonse mulombwana uutwele, afwune mwinakwe umbona mbwaalifwini mwini. Ulimwi mukaintu uutwelwe ulyeelele kupa bulemu mulumyaakwe.