Baefeso 4 - Izwi lya Leza

Lukamantano lwa Mubili

¹ Ume, ndimwaange ukaambo kakusebezela Mwami, ndamulomba kwaamba ati mupone bumi buli ukoya mbumwakaakubele ciindi Leza naakamwita.

² Amulibonzhe u kulifwiinsha u kukakatila lyoonse. Mulekelelane ca lufwuno

³ ulimwi musoleke kubamba lukamantano luhwa ku Moza Usalala, luumuno lumuswaanganye antoomwi.

⁴ Kuli mubili womwi u Moza Usalala womwi, mbubona mbukuli lulangilo lomwi Leza ndwaakamoompolwela.

⁵ Kuli Mwami womwi u lushomo lomwi u lupapatizo lomwi.

⁶ Kuli Leza womwi Ushabo bantu boonse. Walo ulababaala boonse, ulasebeza kwiita muli boonse, ulimwi uli mubantu boonse.

⁷ Pele umwi uumwi wesu wakatambula cipo ncakapewa kwa Kilisito kwiingainya umbwakaabanya.

⁸ Mbuli mbukulembelwe ati, “Ciindi nakaliza kwizeulu, Wakatola banji banji bakaakwaanjilwe, wakapa shipo ku bantu bakwe.”

⁹ Inzho mbuli mbulyaamba izwi lya Leza ati, “Wakaliza,” no kuliza caambaanzhi? Cilaamba ati, wakataanguna kuseluka wenjila anshi eni.

¹⁰ Inzho wezo wakaseluka, inguwe nguwena wakaliza kuya mwizeulu lya mazeulu, kwaamba azulile koonse koonse.

¹¹ Inzho inguwe wakapa shipo ku bantu kwaamba ati bamwi babe batumwa, bamwi babe bashinshimi, bamwi babe bakambaushi, bamwi babe beembezhi u ba maayi.

¹² Wakacita bobo kwaamba ati boonse bantu baleza balibambile mulimo wakufwutaucila ukuzaka mubili waka Kilisito.

¹³ Ubobo ku mamanino toonse tulakaba u lukamantano lomwi lwakushoma u kuzhiba Mwana Leza. Inzho tulakakomena mubukale bwesu tukakozhane u Jeso mu shiyanza shoonse.

¹⁴ Tatukabi linji ukoya bana bashoonto bapepululwa bulyo kufwumbwa kuya muuwo walwiiyo lwalucengo lwa bantu basongo basowa bantu.

¹⁵ Pele mubwini bwa moza wa lufwuno tulyeelele kwaamba tukomene mu shintu shoonse mwa Kilisito, walo uuli ngu mutwi

¹⁶ uyendelezha mubili woonse ukuswaanganya shizo shoonse. Ulimwi cizo ucimwi ucimwi kuti casebeza mulimo nguceelele, mubili woonse ulakomena kwiita mu lufwuno.

¹⁷ Inzho kuzhiminina Mwami ndaambisha cini cini ati tamweelele kupona ukoya bantu bakunze, bamizeezo iina mbwibele.

¹⁸ Ulimwi u matelaishi abo ali mu mushinze. Mbazhimini ku bumi bwa Leza ukaambo kakubula luzhibo, ulimwi nkaambo myonzo yabo mizumu tabazholwa.

¹⁹ Tabafwi insoni kucita shintu shisofweele, tabalisenda nibakacita cibi cili buti.

²⁰ Inzho umwe bobo imbo mbumwakayiishiwa makani aka Kilisito.

²¹ Mbuli ba shiciiya bakwe, makani akwe meni meni mwakaateelela, mwakayiishiwa sha bwami shili mwa Jeso.

²² Ubobo amucileke kupona bumi bwakalekale bwabunyama, bwalucengo busofweele.

²³ Mizeezo u myonzo yenu neebe mipiya,

²⁴ amusame buntu bupiya bobo bwakalengwa mu cinkozha ca Leza. Bulitondezhe bwini, mu bumi bwini bwini bululeme busalala.

²⁵ Inzho kutabi linji kucenga, umwi uumwi wenu ambe makani meni meni kumweenzhiina, kaambo uswe toonse tuli shizo sha mubili waka Kilisito.

²⁶ Na kuti walemana, utalecela bukali kwaamba bukutole mu shibi, utalemani buzuba boonse pe.

²⁷ Mutamulecela Shaatani kwaamba amutepaule.

²⁸ Babo bakaakwiba, bacileke kwiba bakanke kusebeza kwaamba baliyanine bukalo bwa bantu bashomeka u kuyohwa bapenzhi.

²⁹ Mutaakupwazaika kwaamba, pele amwaambe mazwi mabotu akonzha kuyohwa ukuzaka bamwi mu mapenzhi abo, kwaamba babo bamuteelela bayane lwiiyo.

³⁰ Ulimwi utapi kwaamba Moza Usalala wa Leza ubiilwe, nkaambo ncicikanto ncimubicilwe cizhibya ati muli bakwe, cishomezho cakuti buzuba bulakashika nimukakaangululwa.

³¹ Inzho amukushe yoonse imfwundimfwundi, kulemana u bukali u kuzwangana, kutamikizhanya ukusulana kuli buti koonse.

³² Amube ba shinkumbu ulimwi ba shiluse kuli umwi uumwi. Amube u myonzo mibonhu yakulekelelana, mbubona amwe Leza mbwakamulekelela kwiita mwa Kilisito.