2 Timoti 3 - Izwi lya Leza

Mazuba a Mamanino

¹ Kuzhibaluka ati ku mazuba a mamanino kulakaba shiindi shikatazha.

² Bantu balakaba bashikalifwune, balyato, bashikulisumpula, bashikulipa, bashimatushi, ubatalemeka bakwabo, batalumba ulimwi batasalali.

³ Bantu balakabula lufwuno, bayazhi batalekelela, balwati bazoosha, batabuzanda bubotu,

⁴ Balakaba bashilwaanu anu, bantu bayina makani, bashikulisumpula ubazanda kuliboshezha beni kutali Leza.

⁵ Balakaba ukoya bakombi pele insana shabukombi balashikazha. Baba bali bolya kubasesuluka bali bobo.

⁶ Bamwi balanjilila mu maanda a bakaintu ukuboongelezha babo bapengele ukaambo ka shibi shabo beendelezhewa u shisushi sha andeene andeene,

⁷ nikuba ati balayiishiwa lyoonse tabakonzha kubuzhiba lushinizho.

⁸ Umbona ba Janesi u Jambulesi mbubakamukazha Mozesi mbubona baba bantu mbubakazha shalushinizho. Mbantu bakwete mizeezo mibiyabi ulimwi lushomo lwabo ndwakuupaupa amenso.

⁹ Pele bayina nkubaya, nkaambo boonse bantu balakabubona bulimbushi bwabo umbona mbubakabonwa ba Janesi u Jambulesi.

Malailile Aakumamanino

¹⁰ Inzho uwe ulishizhi kabotu injiisho shangu ubweende bwangu, makanze angu, u lufwuno lwangu u lushomo lwangu u lukakatilo lwangu

¹¹ u mapenzhi angu u makatazho angu. Mulishizhi shintu shakancitikila ku Antiyoki, ku Ikoniyamu uku Lisitila. Ndakapenga cini cini pele Mwami wakanhuna muli sheshi shoonse.

¹² Lushinizho ndwakuti kufwumbwa uzanda kupona bumi bwa bu Leza mwa Kilisito Jeso ulakapenzhewa,

¹³ lyalo lelyo babo ba shishibi uba shimatunta nibakaakuhwa kububi kuya kububiyabisha kuya bucenga u kuya bucengwa lwabo beni.

¹⁴ Pele umwe kamubukwete kuya bushoma lushinizho ndumwakayiishiwa u kushoma cini cini, amana mulibezhi baka muyiisha,

¹⁵ ulimwi mulazhibaluka ati kuhwa kubwana bwenu mwakaakweezhi Maŋwalu Asalala, alo akonzha kumupa busongo butola ku lufwutuko kwiita mu kushoma Kilisito Jeso.

¹⁶ Oonse aza Malembe asalala akazozelwa kwa Leza ulimwi alikwete mulimo wa kuyiisha lushinizho, kulemanina walubizha, u koolola muntu u kuyiisha bululami,

¹⁷ kwaamba muntu usebeza mulimo waka Leza ayelele u kuzulila cini cini kucita milimo yoonse mibotu.