1 Timoti 2 - Izwi lya Leza

Makani a Kukomba

¹ Ca kutaanguna ndazanda kumuzumya zumya kwaamba, mukombele bantu boonse, kukomba kwenu kube kwa kukumbilila bamwi, u kulumba Leza kucitilwe bantu boonse,

² mukombele bami u beendelezhi, kwaamba tuukupona kabotu muluumuno u kupona bumi buleta bulemu kwa Leza munzhila iluleme.

³ Ceci ncibotu ulimwi cilamwiinina Leza mufwutuli wesu.

⁴ Leza ulazanda ati woonse muntu akanununwe ulimwi akazhibe lushinizho.

⁵ Nkaambo kuli bulyo Leza womwi, ulimwi kuli muzhiminizhi womwi uleta Leza u bantu antoomwi, wezo muntu ngu Kilisito Jeso.

⁶ Walo wakalyaaba kwaamba abafwutule boonse bantu bali ano anshi. Ceci cakaba citondezho aciindi ceelele, kwaamba Leza ulazanda kunununa bantu boonse.

⁷ Nkaambo ceci ncindakasalilwa kuba mutumwa u muiyiyi wa bantu bakunze, kukambauka Mulumbe wa lushomo u lushinizho. Nshibeyi, ndaamba meni meni!

⁸ Inzho ndazanda ati mu masena a kubunganina boonse balombwana bakomba, batambike matashi asalala mwizeulu cakutalemana nikuba kuzumanikizhanya,

⁹ abo bakaintu balyeelele kusama kabotu ca bulemu shisani sheelele, kutali kupeswa masusu munzhila yakulikolaika ciitilila, naa kusama inkaya sha goludi, nibuba bulungu budula munshingo u shisani shidula.

¹⁰ Bakaintu baliboshe u milimo mibotu bucita bakaintu batiya Leza.

¹¹ Bakaintu baiye buliinzile cakulibozha.

¹² Nshihuminya bakaintu kuyiisha naa kweendelezha balombwana, balyeelele kuliinza bulyo.

¹³ Nkaambo Adamu nguwakataanguna kulengwa naaya alengwe Eva.

¹⁴ Ulimwi tali Adamu wakacengwa, mukaintu nguwakacengwa ukuusotoka Mulawo waka Leza.

¹⁵ Pele mukaintu ulakafwutulwa kwiita mukuzhala bana kuti watolelela kushoma u lufwuno u busalazhi cakulibonzha.