Malika 6 - Itesamende Imya

¹ Neke baho ukuhuma ikivungu kikyo neke ahelelage kukâja, je akulye. Neke avańigendwa vakwe neke vamuninilage.

² Neke pe jifike ińwabaha neke akŏle mukudalika inôngwa muluholanilo lwavo. Neke avolofu, avapulikaga, neke dzivatova, ge mwileme neke vatigilage: adzivonye kwi idzen’idzi? Lwe luhala luki, lwe apelilwe? Gye mitu miki imińangufu, gye ivonesa namavoko gakwe? 7, 15.

³ Mańi tutigye je muhongola-fibiki jula, je muswamuve va Malija, je mamavo va va-Jakovo na Jose na Juda na Simono? Neke navahadzave tusili navovonda apanda? Neke baho kuvene dzidzukage dza kuvambudza idzene idzi.

⁴ Neke umwene Jesu avalongelage atigilage: ukungi konda umuvidzi avanu vikumuginya neke apakwe, na pe akulye, na kulukolo, na muńumba jakwe, umo vikumugunila.

⁵ Neke atane ukuvavo-nehedza umwitu nambi gumwi umuńa-ngufu, lu lwa kuvavīka hela ga mavoko avatamwatamwa neke avahōsage.

⁶ Neke adzumage uvudzila-lufuvo vwanavo. Neke adzungutilage mutukâja tonda utwa mulubali neke avadalikilage inôngwa.

⁷ Neke avakemelage avańikyumi navavili neke amule ukuvatuma konda-konda, nakula vavili nakula vavili. Neke avapelage nuvutavulilwe uvwa kulosehedza imibepo imilamafu. Luk. 10, 1.

⁸ Neke avavūlage atigilage: muṅasi mutane ukuńamula kinu, mwibatage lu lusondzo lwene. Mukaleke nibukuli ja fŭka, mufileke na fi filyo, mutane ukutegula nutuhĕla mumukandalo.

⁹ Neke indātu idza mundzajo idzo mufwalage, isopeka dzitane ukuva dzivili.

¹⁰ Neke avalongelage atigilage: nińumba, je mudzikwingye, mukikale mumo ukufika gi mihegele gyeńo.

¹¹ Neke pakivungu, kye vikana ukuvanukila uńeńe, vakane nukuvafuvwa, lwe mwilonga, apo kwe mukahume ukwanavo, mukavapumūnile nalu lufuna ulwa kundzajo; lwe luvedzage lwa volesi kuvene.

¹² Neke baho vahelelage neke vakaludalikage lu lwa kuta: mupelage, mupitukage.

¹³ Neke vavadagage avademono avolofu, neke vavabakage nimono avata-mwatamwa, neke vahôkage. Jak. 5, 14. 15.

¹⁴ Neke dze dzikapulisage na pivaha lya Helodo, pakuva ilitavwa lya Jesu lyatambulike konda. Neke (umwene Helodo) atigilage: je Johana, umudzabisi, adzulubwike kuvafwe, kye gilesile gimwidikage na gi mitu imińangufu.

¹⁵ Neke avangi vatigilaga je Elija, avangi vatigilaga je muvidzi hela, ndevye vavonekaga avavidzi avangi.

¹⁶ Neke umwene Helodo, avye apulike ulu, neke atigilage je Johana umudzabisi, je ndamukegite umutwe, adzulubwike.

¹⁷ Ndivwene Helodo atumile avanu kwa Johana, avańa-kumwibata ngufu hela, neke amudindilage muńumba indinde, ulwimye pa Helodija, uva kwa munuṅuve u-Filipi, pakuva amutolile.

¹⁸ Ndivwene Johana amulongaga atigilaga: luli mwîko uveve, lwe umutolile umudala va munuṅuvo, uva Filipi.

¹⁹ Lwe lwene ulwamufipaga mwileme u-Helodija neke asakulage ija kumuvulagila neke alemwage.

²⁰ Ndivwene Helodo ujo amogopaga u-Johana, amudzelye ukuva mugolofu, ukuva mwîmike. Mbêpali amukengelaga, neke indzolofu, dze apulikaga kwa Johana, idzo agendelaga; neke akēlaga nukumupulika.

²¹ Neke baho kifikage nikigono kya kwimila, pakuva umwene Helodo avakemelye navandzagila vakwe navibata-mahomelo ga vutavangu navata-mbule va mu-Galilaja mukulya ifilyo fya pakyâka kya kukumbukila ukuholwa kwakwe.

²² Neke baho vavonage huju umwalive va Helodija ikwingila neke apwitage. Neke lunogage kwa Helodo na ku ve fyalilanilaga. Neke baho umutwa akalongelage akahindza neke atigilage: uńilikage kinu ukwangu, nde kivedzage kiki, kye ukêlye ukuńilika juve, swe ndilakupela ndesi.

²³ Neke amujigilage nulujigo ulwa kuta: nde ki-vedzage kiki, kye uńilike, ndikukupelaga fyonda, nde utigilage tugavane ińi gatinagati, swe twigavana. Ef. 5, 3. 6.

²⁴ Neke ahumage neke ahelelage mukumuvudza uṅina neke akatigilage: ndińilikage kiki? Neke uṅina atigilage: uńilikage gu mutwe gwa Johana umudzabisi.

²⁵ Neke baho umwene nakalingi kitahāva apilukilage kwa mutwa neke atigile: ndisakula umutwe gyva Johana, umelage li lino, umelelelage iki vungu kiki iki pakitonga kyangu.

²⁶ Neke baho umutwa lumuhuguvikage. Neke lulo, lwe ajigye ṅani vupulika vonda, avikalile baho, ve fyahangaga ifilyo, neke baho ogopage ukukana.

²⁷ Neke nakalingi umutwa amutumage jumwinga umukalavadanda neke atigilage: uletage umutwe gwa Johana.

²⁸ Neke ahelelage neke akagudumulage umutwe gwa Johana mu muńumba ja vańańololo neke aguletage umutwe gwakwe mukitonga neke amupelage umuhindza, neke umwene umuhindza neke agugotolage kwa ṅina.

²⁹ Neke lino vavye valupulike avańi-gendwa vakwe neke vaguńamulage umuvili gwakwe neke vakagusilage mumombwe.

³⁰ Neke baho avapositili neke valundanilage pa pe ali u-Jesu neke vagotolage londa, na lwe valimile na dze vakidalika. Luk. 9, 10.

³¹ Neke umwene avalongelage atigilage: musûko tukidevulile muluṅalaṅala lula, mwe mukapolele padebe; pakuva vasâlye akapye mumôto nambi, pakuva umumemo gwa vanu gwali molofu, avadzaga navahegaga.

³² Neke baho valovoṅa-sihidzage muvwâto neke vahelelage muluṅalaṅala vavo vene.

³³ Neke avanu avolofu neke vavavonage, pe vikwingila muvwâto neke avolofu vavakagwe, neke baho vahumage mufikâja fyonda neke vagendelage ija palutanana neke valungamilage kuko, kwe alungamaga umwene, neke avene vitalanidzage, pe asina afika na ju mwene.

³⁴ Neke lino u-Jesu avye ihuma (muvwâto), neke avonage ililugu lya vanu avolofu, neke baho ulupyana lumuvonage umwene mwileme, pakuva vasa-paga ngita ṅolo, idzijagile, indzila-mudimi, neke avadalikilage inôngwa indzolofu. Mat. 9, 36.

³⁵ Neke vateganihidzage, pe vuhwe, neke avańigendwa vakwe neke vahegelelage kwa mwene neke vatigilage: mwe mudâsi muno neke nukuhwa vuhwe, cf. 8, 1-9.

³⁶ uvatavule avanu vahelelage namufidunda namufikâja, ifidzungwite, vakigulile ifilyo, pakuva vasikavopile ifŭka.

³⁷ Neke umwene avapiluhidzage neke atigilage: ka mungavapela juńe ifilyo. Neke avene vadzovage kwa mwene vatigilage: tukavagulile jufwe ifilyo ifya pamahodole amagana gavili (200) neke fye tuvasangile ifilyo ifya kulya?

³⁸ Neke umwene atigilage: muli navo uvugali vulingi? Muhelele mukulava. Neke pe vavalile neke vatigilage: tuli navo uvugali vuhanu neke nutusomba tuvili.

³⁹ Neke atigilage: muvalongele vonda vakoṅomale navala pamililanile pisoli ilidodi.

⁴⁰ Neke baho vikalage neke vavelage mundimbili mundimbili, apangi iligana, apangi amakyumi gahanu.

⁴¹ Neke baho u-Jesu neke inulage uvugali vuhanu na dzi somba dze dzivili neke alolage kukyâńa neke ahongedzage neke baho ameguliṅasage uvugali neke avapelage avańigendwa vakwe neke ve vavapelanidzage avanu. Neke na dzi somba dzivili neke nadzo avagavahi-dzage avanu vonda. 7, 34.

⁴² Neke validzage neke vigutage vonda.

⁴³ Neke valundasage utuvuluvulu, twe valaga-dzaga, neka fimemage ifihivi fińikyumi nafivili, neke na tu tusomba, utwasigye, nato ndesi.

⁴⁴ Neke avene, avalidzaga uvugali, vali vańa-mbilima dzihanu (5000), ukuvavala va vakigosi vene.

⁴⁵ Neke nakalingi avagagilidzage avańigendwa vakwe ukwingila mukyômbo neke valongole ukulovokela kumwambu ja Betesajidi, umwene atale atavulage avanu tândi.

⁴⁶ Neke lino baho avye avatavwe, neke baho inukilage pakidunda mukulapangila.

⁴⁷ Neke baho pakińamihe neke ikyômbo kyanavo neke kimage pańandza pagati neke umwene image mwene paṅumbuṅumbu.

⁴⁸ Neke avalavage neke avavonage, pe vifiga, pe vigimba ukulwa niliveîo, pakuva lyahumile kuko, kwe valungamaga. Neke umwene agelanihidzage pasala ja vutaji, mwe vivalila aviminga pakilo, neke baho avaninilage neke alivatage hela pakyâńa pańandza, atigye alutanidze ndesi.

⁴⁹ Neke avene, vavye vamuvwene ukugenda hela pakyâńa pańandza, neke avene vatigilage: e limulungu! Neke baho vakôle mukukôla.

⁵⁰ Vavwene vamuvwene vonda neke livagwilage ilitulo. Neke baho umwene alongelage ṅani neke atigilage: mutane ukogopa, muńamalage hela, je nene.

⁵¹ Neke ingilage mukyômbo kyanavo neke baho na li livelo nalyo neke lilitamage. Neke baho avene vakuvilage sikuku-vila neke vadzumage mbando. 4, 39.

⁵² Pakuva lusana lutema uluhala napavugali vula, pakuva na dzi numbula dzanavo dzali ṅângafu.

⁵³ Neke vavye valovwike baho, neke vakafikage mu-ńi ja mu-Genesalete neke vadzabukage.

⁵⁴ Neke vavye vahumile mukyômbo. neke avanu vamukagulage ukuta je mwene.

⁵⁵ Neke baho vapalaṅanilage mondamonda neke vanyengusage ińi ija mumo neke vavańamulage mumasa vonda avatamwa neke vavaletage, kwe apulise umwene.

⁵⁶ Neke monda, mwe agendelaga umwene namufidunda namumalînga navadzengile mufibali, neke vavavīkage mumaku-lumbilo, navali vatamwatamwa neke vagongolage ukuta tukwabasage gu mwênda gwako kumudzi-vo kwene. Neke vonda, avamwabasaga, avo vaponaga. 5, 27. 28.