Malika 15 - Itesamende Imya

¹ Neke baho vilavage nulwa milavo neke valundanage navatekedzi avakomi navandzagila ikisina nululundano londa ulwa vahiga-nôngwa neke valonganage baho. Neke baho vamuvopage Jesu neke vamusogodzage neke vakamugotolage kwa Pilata. Mat. 27, 1. 2; Luk. 22, 66; 23, 1; Joh. 18, 28.

² Neke baho Pilata amuvudzage atigilage: vwi mutwa va va-Juda uveve? Neke umwene apilusage atigilage: ndevye ulilongile, je nene.

³ Neke baho avatekedzi avavina neke vamufilage indzolofu hela.

⁴ Neke baho Pilata avwilage kangi ukumuvudza neke atigilage: usipilusa kinu? Usikudzipulika dzonda, dze vidzova? 14, 61.

⁵ Neke umwene Jesu atanage ukupilusa nambi limwi, akole mukudzuma na ju Pilata.

⁶ Neke mbêpali pakyâka lwali lwîmbo ulwa kuvāvulila jumwinga uva pamuńololo, je vamuhagulaga va vene.

⁷ Neke lino ali pwali jumwi uva pamuńololo, je vatigilaga je Balaba ilitavwa, je vamwibatye pamwinga navajagwe, avagalwike, vamuvulige numunu, pe vagalwike.

⁸ Neke baho avanu ikipuga kyonda neke vinukage neke vahelelage baho pa-Pilata neke vatigilage: ungatwavulila jumwi umunu, ndevye vwigita mbêpali!

⁹ Neke umwene Pilata apilusage atigilage: vona mwitigila ndivâvulilage ju mutwa va va-Juda?

¹⁰ Pakuva adzelye ukuta avatekedzi avavina dzivatumile dzi sinwa, dze vamusutulye ukwangu.

¹¹ Neke avene avatekedzi avavina vavafundage avanu vatigilage: mutigilage utwâvulilage ju Balaba.

¹² Neke umwene Pilata avwilage ukupilusa neke atigilage: ndimugitage ndavuli umutwa va va-Juda uju, mungandongela?!

¹³ Neke baho avene vavwilage ukukola yonda vatigilage: umutovelage pakipindulihidzo!

¹⁴ Neke umwene Pilata atigilage: ahokile nôngwa jiki? Neke baho avene vongeledzage ukukola neke vatigilage: umutovelage pakipindulihidzo.

¹⁵ Neke baho umwene Pilata atigilage ndivakyage avanu neke baho avavulilage ju Balaba neke umwene Jesu amusutulage kuvańa-kumutova nulufîmbo neke atovelelwage pakipindulihidzo.

¹⁶ Neke baho avasilikali vamuhelelage nave kwipala lya lilînga neke vamukongolelage ikipuga kyonda kya vajanavo.

¹⁷ Neke vamufwalidzage isopeka ja mulangalanga neke vativage ingêla ja mifwa neke je vamufwalidzage pamutwe.

¹⁸ Neke vakole ukumuhungila vatigilage: adze, ve mutwa va va-Juda!

¹⁹ Neke vamutovage nuludete pamutwe neke vamufuńilage namati kumîho neke vafugamage pasi neke vahongedzage ukwakwe.

²⁰ Neke pe vamujovelidze neke baho vafulage isopeka ja mulangalanga jila neke kangi vamufwikage igyakwe imyênda. Neke baho vamuhelelage nave pakumutovela pakipindulihidzo.

²¹ Neke vamugagilidzage umunu jumwinga, je ali ilitavwa je Simono uva mu-Kilene, udadavo va Alesanda na Lufu, ahumile kuvulime vwakwe, atigye ndidzumbanidzage. Neke vamwaṅanidzage hela pakumugagilidza, pakuta umuńamulile ikipindulihidzo kyakwe. Lom. 16, 13.

²² Neke vakafikage nave baho, pe vitigila pe pa Gologata, kwe kuta paluṅala;

²³ neke vatigilagetu mu-ńwesage uvutoṅoni, vwe vahandzidze numuhandzu gwi mila. Neke umwene akanage ukuguńwa.

²⁴ Neke vamutovelage pakipindulihidzo. Neke baho vasolanilage imyênda ukuta utunga ikwinula ikinu ikitunga kila.

²⁵ Neke ukwene ukumutovela pakipindulihidzo vamutovye pasala ja vudatu.

²⁶ Neke na dzi nôngwa, dze vamuvalile, neke vandikage pakyâńa pakipindulihidzo, vatigilaga: uju je mutwa va va-Juda.

²⁷ Neke vavatovelage pamwinga pafipindulihidzo navagonadâsi vavili, ujungi kwivoko lyakwe ilya ndyo, ujungi kulya ṅigi.

²⁸ (Kwali kwe kuta luvonekage ulwa pahâte ulwitigila: vamuhandzidze nayańa-kupunya.)

²⁹ Neke lino vonda, avadzumbanidzaga, neke vamuligage, vajudzage na gi mitwe neke vatigilage: iti! je udzelye ukumamula ikyânga kya tembele, kangi vwidzenga ijingi imya ifigono fidatu. 14, 58.

³⁰ Ka lino uli na kiki ukwipoka vwijena, uli na kiki ukwika pakipindulihidzo?

³¹ Neke avatekedzi avavina vahange navakagulihâte ukumujejesa neke vatigilage: avangi akiku-vapoka, ukwipoka ju mwene ilemwa.

³² U-Kilisiti uju, umutwa va Jisilahele uju, angika lino pakipindulihidzo neke tumuvone neke tufuvwage. Neke navo, avatovelilwe pamwinga pakipindulihidzo, navo neke vamuhigage ndesi dzidzo. Mat. 16, 1. 4.

³³ Neke baho pasala ja mutanda, neke baho ikîsi kigwidzage ińi jonda neke jifikage pasala ja igôndza.

³⁴ Neke baho pasala ja igôndza neke baho Jesu akutage ilidzwi ilikomi neke atigilage: Eli, Eli, lama sebetani; pakuganula kwe kutigila: ve Nguluvi vangu, ve Nguluvi vangu, undekile kiki?

³⁵ Neke lino avangi, avimile baho, pe valupulike ulu, neke vatigilage: pulika! akumukemela Elija.

³⁶ Neke baho ujungi ańilage kisatu neke inage akênda muvugimbi vwa vutoṅoni neke amuńwesage. Neke atigilage: muleke tândi, tulole, nde ikwadza mukumwisa u-Elija.

³⁷ Neke umwene Jesu akutage ilidzwi ilikomi neke baho gudzimage.

³⁸ Neke baho nilibupa, lye vapingike mukyânga kya tembele, neke lidemukage ukuhuma pakyâńa neke lyapukilage pasi, neke gahambukage gavili.

³⁹ Neke lino umuńa-kipuga kya vasilikali, je valoleṅanaga nu-Jesu, avye amuvwene imifwile-vo, neke baho atigilage: ndakyene umunu uju je muswamuve va Nguluvi.

⁴⁰ Neke lino pe vali avakiṅinavo neke valolelage patali. Vali na Malija va mu-Magadala na Malija, uṅinavo va va-Jakovo umudebe na Jose neke nu-Salome. Luk. 8, 2. 3.

⁴¹ Ve vene, avamuninilye, pe ali mu-Galilaja, avamulimilaga namalimo, navangi hela avolofu, ve fīnuṅise, pe ihelela ku-Jelusaleme.

⁴² Neke lino vuvye vuhwe pakya mihe, pakigono kya kwivujapa, pakya kuviluka kya ńwabaha

⁴³ neke baho adzage Josefe va mu-Alimatija, umundzagila umutambu-le, nave je avudzindilaga uvutwa vwa Nguluvi, neke isangamikage hela neke ingilage pa-Pilata neke aguńilikage umuvili gwa Jesu.

⁴⁴ Neke umwene Pilata adzumagelwe afwe. Neke baho amukemelage umuńa-kipuga kya vasilikali neke amuvudzage, nde afwe katali.

⁴⁵ Neke pe apulike kwa muńa-kipuga, neke baho agutavulage umufimba gwa Jesu kwa Josefe.

⁴⁶ Neke umwene agugulage umwênda umuvalafu neke amutumbukulage pakipindulihidzo neke amunyengage nimyênda gyakwe neke amuvikage mumombwe jakwe imya, je vajavile mwitālâvwe; neke pamulyango gwa mombwe abiluhidzage iliganga.

⁴⁷ Neke avene ava-Malija va mu-Magadala na Malija uṅina va Jose neke valolelage, pe vamuvikaga.