Luka 18 - Itesamende Imya

¹ Neke baho avalongelage ikimańagihidzo ikya kuvatigila: umunu avagye alapangilage mbêpali kitańōkōvala. Lom. 12, 12; Kol. 4, 2; 1. Tes. 5, 17.

² Neke atigilage: ali mwali jumwi umuhĭdzi mukâja jimwi, je asamogopaga na ju Nguluvi na kuvanu asasugaga.

³ Neke lino mukâja jijo ali mwali numukiṅinavo umufwile neke ahelelage mbêpali mukutigila: ungańigila inôngwa jangu kwa muńa-kumbuganidza.

⁴ Neke akanage figono. Neke lino ulwa mbele neke ilondzage ju mwene neke atigilage: nalo nde ndivedzage unene sindikumogopa Nguluvi na kuvanu sindisuga,

⁵ kwa mukiṅinavo umufwile uju, uju ndikumu-higila ndesi inôngwa jakwe, pakuva akundasa mbêpali, ukuta pambele atane ukwadza mukundi-kudza. 11, 7. 8.

⁶ Neke baho umutwa atigilage: mupulikage lino, dze ilonga umuhĭdzi umuhaluka uju!

⁷ Neke lino umwene Nguluvi aká atane ndavuli ukuvapuguhidza avahagulwa vakwe inôngwa, avikūta na pamûńi na pakilo; aka atane ndavuli pakuvaletela uvwisamu-tima?

⁸ Muleke ndivalongele unene, umwene asilahā-va pakuvapuguhidza inôngwa dzanavo. Neke lino ukwene, alava ikwadza umwâna va munu, vona alaluvona ulufuvo mwen’eńi muno?

⁹ Neke lino avangi, aviginikaga uvugolofu neke vavasulage navajanavo, neke ve avavulage ikimańagihidzo iki neke atigilage:

¹⁰ Avanu vavili vinukilaga kutembele mukulapangila. Ujungi ali mu-Fwalisaja neke ujungi ali muhakipembe.

¹¹ Neke baho umu-Fwalisaja image baho neke ilondzage mwene pakulapangila neke atigilage: ve Nguluvi, ndihongidze ukwako, pakuva ndisite-gine navangi avanu, navakufi navibuganidza navagoni nambi nilihakipembe ili.

¹² Nifilyo ndihwa kitalya kavili pamulungu gumwinga. Neke fyonda, fye ndisava unene, nditavula ifya pikyumi. Mat. 23, 23.

¹³ Neke baho umwene umuhakipembe neke idandamikage patali neke ogopage nukwinamula amîho. Neke umwene itovage hela pamambaga neke atigilage: ve Nguluvi, usungukilage nde muhosi.

¹⁴ Muleke ndivalongele unene: uju ivujye kukâja, ve apugwe, neke umujagwe jula je nda. Pakuva vonda, avakwiginya vene, ve valalēvedzwa; kangi navakwilēvedza vene, ve valaginalidzwa. 14, 11; Mat. 23, 12.

¹⁵ Neke baho vafiletage nifyali ukwakwe ukuta afyabasage; neke lino avene avańigendwa vakwe vavye vavavwene, neke vavakabusage.

¹⁶ Neke umwene Jesu afikemelage atigila ge: mutulekage utwâna twadzage ukwangu, mukututa-nidza twa kiki? Ndivwene uvutwa vwa Nguluvi vwanavo vavo, avali nde ava.

¹⁷ Ndakyene ndikuvalongela ukuta: je asiku-vwanuka uvutwa vwa Nguluvi ngita mwâna, ujo asilingila ponu umwene. Mat. 18, 3.

¹⁸ Neke baho jumwi umundzagila neke amuvudzage neke atigilage: ve mwiganidzi, ve munofu, ulwa kuhālila uvûmi vwa mbêpali lwe lulikwi, ndilulimage?

¹⁹ Neke baho umwene Jesu atigilage: vwitigila ndili munofu? Sipwali umunofu, munofu ju Nguluvi mwene.

²⁰ Mańi udzidzelye indagi nulwitigila: utane uvudumula-vutolane, nulwitigila: utane ukuvulaga, nulwa kuta: utane ukuhidza, nulwa kuta: utane ukumudetela umujago uvudesi, nulwa kuta: umuginyage udado nuńoko.

²¹ Neke umwene atigilage: mwe ngendye mudzonda idzi ukuhuma pavwâna.

²² Neke lino baho, avye alupulike ulu umwene Jesu, neke amulongelage atigilage: apo uveve kangye kamwinga hela; ukagulage fyonda, fye vwi nafyo, neke uvapelage avahangala, apo swe uveve ve usavile ikyûma kya kukyâna; apo swe ukadze mukûninila unene. Mat. 6, 20.

²³ Neke umwene avye alupulike ulu, neke ahuguvalage mbandu, pakuva ali mumosi muno.

²⁴ Neke umwene Jesu amuvonage ukuhuguvala neke atigilage: luli na vutalamu kuvańa-fyûma pakwingila muvutwa vwa Nguluvi!

²⁵ Pakuva ningamila pakwingila pakaiyango ka singano numumosi pakwingila muvutwa vwa Nguluvi kwebepe ji ngamila pakwingila mukalyango ka singano.

²⁶ Neke avene avapulikaga neke vatigilage: apo humbi alanana ani?

²⁷ Neke atigilage: lwe valemilwe avanu, kwa Nguluvi lusilema.

²⁸ Neke umwene Petele atigilage: lolage unefwe tufilekile fyonda ifyesu, tukuninilye juve.

²⁹ Neke umwene atigilage: ndakyene unene ndikuvavula nditigila: sipwali umunu, je akufileka nińumba numudala navanakwavo navavaha navâna, ngana akufilekela vu vutwa vwa Nguluvi,

³⁰ je asigelekelelwa fyond’ifi na ku kuno ku-ńi ja pasi iji; neke ku-ńi jila, ijiladza, alavwanukila na vu vûmi, uvusisila ponu.

³¹ Neke baho abagukage navo avańikyumi navavili neke avalongelage ukuta mulolage twikwi-nukila ku-Jelusaleme, kwe dzidzikwapukila dzonda, idzandikwe kuvavidzi, idza mwâna va munu. 9, 22. 24.

³² Ndivwene alasutulilwa kuva-pivala, alajejevulwa, alalangapalilwa, alafuńilwa amati;

³³ alatovwa nifiboko neke baho vamuvulagage, neke pakigono kya vudatu apo umwene aladzu-lubuka kangi.

³⁴ Neke avene vatanage ukulufika nambi lumwinga, nilidzwi ili lyali ngita lifihime kuvene, vasadzikagulaga na dze alongaga umwene. Mal. 9, 32.

³⁵ Neke lino baho, avye ahegelidze mu-Jeliko, neke huju umunu umubofu ikadzile pikasi palubali, ihuṅunya ifya kuhuṅunya.

³⁶ Neke avye apulike ililugu lya vanu ukudzumba, neke baho avudzage atigilage: kye kiki ikyo?

³⁷ Neke vamulongelage vatigilage: je Jesu uva mu-Nasalete, idzumbanidza.

³⁸ Neke baho umwene akutage neke atigilage: ve Jesu, ve muswamuve va Davidi, ungamyanila!

³⁹ Neke baho avanu, avalongwe muvulongolo, neke vamukabusage vatigilage: bê! udzike! Neke lino umwene ongeledzage mbandu pakukōla neke atigilage: ve muswamuve va Davidi, ungamyanila!

⁴⁰ Neke baho Jesu image neke atigilage, vamuletage ukwakwe. Neke lino avye ahegelye umwene, neke baho amuvudzage atigilage:

⁴¹ ukatigye ndikugitage ndavuli? Neke umwene atigilage: najune ndilolage, ve mutwa vangu.

⁴² Neke baho Jesu neke atigilage: lino ulolage, lukuhosidze ulufuvo lwako. 17, 19.

⁴³ Neke baho alolage namulomo gula. Neke baho amulumbage Nguluvi neke aninilage kwa Jesu. Neke navanu vonda, avaluvwene, neke navo vatumage amalumbo kwa Nguluvi.