Luka 15 - Itesamende Imya

¹ Neke baho vahegele-dzage ukwakwe navahakipembe navahosi, vatigye tupulihidzage, kwe ilonga umwene.

² Neke ava-Fwalisaja navakagulihâte neke vaṅulage vatigilage: umunu uju ikuvidihidza avahosi, vihanga nukulya ifilyo. 5, 30.

³ Neke baho umwene neke avalongelage uluhwanano neke atigilage:

⁴ uńeńe ngana ujungi ali nindîmwa dzińigana neke lino ajadzage jimwinga, asikudzileka baha luvânde ińamakyumi gali gôndza na dzili gôndza (99), asitala ajisakulage ijijagile ukufika bah’ajivwene? 19, 10.

⁵ Neke lino, ngana ajivwene, ivegala pamavega, ikēla nukukēla mbandu.

⁶ Neke lino ngana avu-jile kukâja, apo akuvake-mela vonda avajagwe na ve fifudiṅine neke atigilage: tukēlanilage nani, pakuva ndijivwene indîmwa, ijikajagile.

⁷ Mulekage ndivalongelage unene, valakēla-vo na va kukyâńa, vasilavalola avagolofu avańa-makyumi gali gôndza navali gôndza (99); avakitâva nalo ulwa kupĕla nambi ponu, valakēla kwa muhosi jumwinga, je ipĕla.

⁸ Kangi na ju mukiṅinavo, ngana ali nalo ulupija luńikyumi, neke lino ngana lujagile lumwinga ulupija lwakwe, asikunga ulupelele, asifyagila na muńumba, asitindanyuka pakulusakula ukufika bahe aluvwene?

⁹ Neke lino ngana aluvwene, apo akuvakemela navajagwe na ve fifudiṅine neke atigilage: tukēlanilage nańe, pakuva ndiluvwene ulupija lwangu, ulukajagile.

¹⁰ Mulekage unene ndi-valongele, valakēla ndesi navańa-mwandza va Nguluvi kwa muhosi jumwinga, je ipĕla. Ef. 3, 10.

¹¹ Neke atigilage: umunu jumwi ali navaswamuve vavili.

¹² Neke lino umukwa-ngudzi neke alongage kwa dadye neke atigilage: ve dâda, ungavilile ṅani ilipwela lya mugavo gwangu, ilindiṅine. Neke baho umwene neke avagavahidzage ilipwela.

¹³ Neke lino, avye agonile nde filingi, neke baho umuswamuve umukwa-ngudzi neke alundasage fyonda ifyûma fyakwe neke ahamilage ku-ńi ija kutali. Neke kuko ikyûma kyakwe akivejahidzage ulwa kitivopa.

¹⁴ Neke lino, avye alye fyonda ifyûma fyakwe neke baho ligwidzage ilipunge pa-ńi jonda hela, neke umwene ahangala-palage mbandu.

¹⁵ Neke baho ahelelage mukwitovēledza kwa mweneka jumwi va mu-ńi jijo. Neke je amutumage kuluvânde lwakwe neke amutigilage: ukadimage ingubi dzangu.

¹⁶ Neke umwene adobokage ukumemehedza ilileme lyakwe namakōna, ge dzalidzaga ingubi, neke nago vamwimaga.

¹⁷ Neke baho ihodzage neke lino ivonage neke atigilage: unene ndifwila kiki indzala, kuno padâda avavanda vakwiguta hela ifilyo ifidevwike?

¹⁸ Neke lino swe ndihelelage kwa dâda, ndidzilonga nave ndidzitigila: ve dâda, ndihokile inôngwa na kukyâńa na ku kwako;

¹⁹ neke lino sindivagye ukuva ndili muswamuvo, undzusage hela muvanda vako umuńa-kulima.

²⁰ Neke baho ańagadu-kage neke ahelelage kwa dadye. Neke lino, pe ave ali pavutali, neke udadye amuvonage neke lumuhevage, neke baho ańilage neke amukumbatilage neke amunonelage kumulomo.

²¹ Neke lino umwene umuswamuve neke atigilage: ve dâda, ndangwe inôngwa na kukyâńa nukwako, lino sindivagye ukutambulwa uvuswamuvo.

²² Neke lino umwene udadye avalongelage avavanda vakwe neke atigilage: muńilage, mukatole isopeka inofu jila ijilutye, mwadze mumufwalidze; mumupelage nikyûma pakyâla neke mumufwikage nindatu mundzajo.

²³ Mujiletage nindumbuti jila, mujikome, tulidzage tujwangage vunofu hela.

²⁴ Pakuva umuswamuvangu uju afwe, lino adzulubwike kangi, ajaganike, lino avumbwike kangi. Neke baho vakŭle mukukēlanila. Ef. 2, 1. 5; 5, 14.

²⁵ Neke lino umuswamuve umuvele avukile. Neke lino baho avye avujile, ahegelidze pańumba, neke apulikage umwângo gufukye gwa lwîmbo lwa luhejo.

²⁶ Neke baho amukemelage umukwamidzi jumwi neke amuvūdzage atigilage: mwângo gwa kiki, gwe vafukidze?

²⁷ Neke je amulongelage ukuta: umunuṅuvo adzile, neke lino udado akomile ingwâda indumbuti jila, pakuva avwene umuswamuve munofu hela.

²⁸ Neke baho umwene akalalilage neke idzila-mwage nukwingila muńumba. Neke baho udadye ahumilage pivala neke amudēdēvage. v. 2.

²⁹ Neke umwene apilusage kwa dadye neke atigilage: ulolage imyâka gyonda igi ndikulimye, na dzi ndagi dzako sindidzi-dzumbile ponu, neke lino uveve usimelye ponu nambi kānā-mene aka kukēlanila navajangu.

³⁰ Neke lino, pe lyadzile iliswamuvo ili, ililibikye muhavala nikyûma kyako, ulikomye ningwâda indumbuti jetu.

³¹ Neke umwene udadye apilusage atigilage: mwanavangu, uveve tuli pamwinga mbêpali nanene naveve, fyonda, na fye ndi nafyo, fyako juve.

³² Neke lino pakavagye hela tuletage ililônge nukuta tukēlage hela, pakuva umunuṅuvo uju afwe neke lino adzulubwike kangi, ajaganike, neke lino avumbwike kangi.