Juda 1 - Itesamende Imya

¹ Je nene Juda, nde mukami va Jesu Kilisiti, nde mwanakwavo va Jakovo, ndikuvandikila ńe vakemelwa, ńe avendile ju Nguluvi udadye, ńe mudīmilwe kwa ju Jesu Kilisiti. Mat. 13, 55.

² Ulupyana luvedzage nańe nulutengamaso nuvwênde uvwitana.

³ Ńe vend’ańe, unene ndatigye ndangupage kisatu hela pakuvandikila idza vupoki vwesu, vwe tuli vuhanganile neke baho mbone kikungagilidza kinu kitigila ndivandikilage ulwa kuvavunga, ukuta muîutengelage ulufuvo, lwe vapelilwe kamwi avîmike. 1. Tim. 1, 18.

⁴ Ndivwene vańetye imîngilile vamwi avanu, dahilage ve dzandikwe idzanavo idza kuvakelela ukuva vagaja-Nguluvi, avisetulila kuvukemi ulusungu lwa mutwa neke vamukanage umutemi umuńa-kimwinga, umutwa visu Jesu Kilisiti.

⁵ Neke nigye ndivakumbusage uńeńe, je mudzidzelelye ṅani dzonda, ukuta umutwa, avye avananidze mw-Egipiti avakina-Jisilahele, ukuta ulwa vuvili avatipwe avasafuvwaga. 1. Kol. 10, 5.

⁶ Neke avańa-mwandza, avasakolatidzaga uvutemi vwanavo, hamu, avavulekile uvugono vwanavo, navo avavikile pasi pavutilivafu, avafungile nińololo idzisisila ponu ukufika pe dzilava dzihigwa pakigono ikivina kila. Joh. 8, 44.

⁷ Ava mu-Sedomo na va mu-Hamola na va mukâja idzafudiṅine, navo ndesi, vagendelaga ulwalińine nulwa vala, pe valetaga uvugoni uvungi neke vafwimage ińama dza muvili idzingi, avo vipumuka ukuvungwa ulwa môto ugusihagikwa, vali kilolēlole kya kulolela.

⁸ Ve vali evo navalōtamalōto ava. Navo vihalabusa ndesi ińama ja muvili janavo, vibeda uvutwa neke vakudzidzova fivi ińa-ndolo.

⁹ Neke umwene u-Mika-jele, umuńa-mwandza umundzagila, pala pe valwaga nu-Setano, pe vakananilaga umuvili gwa Mose, asītibikaga ukumukĕlela idza vudzovafivi, hamu umwene alongaga hela lu lwa kuta: akukabusage umutwa.

¹⁰ Neke avene ava vakudzidzova fivi na dze vasidzidzelye, neke idzene, dze vakudzifikila mumifikile gya fikoko ifigajaluhala, idzo dza kwijanangikila-mo vavo ṅani.

¹¹ Iga aven’ava, pakuva vagendye iṅasi ja Kajini, visopile kuluhombo lwe ajagile u-Bilejama, vatipulililwe ṅani mulubedo îwa Kola.

¹² Igyen’igyo mińa-mwîko mwe mwa mwilundanila pakulya, vihanga ifilyo kitogopa, vakwifuvilila vavo, mifuluka imigaja-ndońa, igipēlulilwa kondakonda kumuvelo, mibiki igilagidze amahamba, igisiveleka imeke, gifwe kavili, gikunamwike amadela,

¹³ mivingo gya muńandza, igigalwike, igitŭta ińula-soni, gye mitondwe igisāpa neke igyene igi agivikye uvutilivafu vwa kîsi ukufika kumihagulile gya myâka.

¹⁴ Avilile idza ven’ava na ju Enoko, uva mufúṅâti ukuhuma kwa Adama, pe atigilaga: „lolage adzile umutwa mumalugu gakwe amîmike,

¹⁵ agulwime mukuvahiga vonda, agulwime nukuvagomedza vonda avabeda-Nguluvi idza malimo ganavo gonda aga lubedo, ge vabedaga nidza vukângafu dzonda, dze vamusagadukilaga avahosi, avabeda-Nguluvi. Mat. 25, 31.

¹⁶ Igyen’igi gińula, gihugumila, gigendela pavudobofu vwanagyo. Umulomo gwanavo mwejakumbali, vakwikundilidza vavwene lukuvavumbulila kinu.

¹⁷ Neke uńeńe, ńe vênd’ ańe, mukumbukage, dze valongye ṅaniav-Apositili va mutwa visu Jesu Kilisiti,

¹⁸ pe vavalongelaga uńeńe, pe vatigilaga: pamyâka gya vwapulilo valavoneka avajovēlĕdzi, avalagendela muvudobofu vwanavo vwa vubeda-Nguluví. 1. Tim 4, 1; 2. Pet. 3, 3.

¹⁹ Ve vene avihula indekano, vańa-mitima imikomi, u-Mubepo vasili nave. 1. Kol. 2, 14.

²⁰ Neke uńeńe, ńe vênd’ańe, mwidzengage palufuvo ulwîmike si vwîmike, mulapangililage mwa Mubepo umwîmike. Kol. 2, 7; 1. Tes. 5, 11.

²¹ Mwikolatihidzage muvwênde vwa Nguluvi neke mudzindilage ulupyana lwa mutwa visu Jesu Kilisiti ukufika kuvûmi uvusihagikwa.

²² Avangi muvapyanilage avikwiganisa

²³ neke muvananyage ngita mukuvagomela ngufu kumôto, avangi muvapyanilage pele mogopa neke musūlage isopeka, je jilamidze ińama ja muvili. Jak. 5, 19. 20; Luv. 3, 4.

²⁴ Neke umwene, je avudzelye mwene pakuvakengela, ukuta mutane ukukuvala, je avukagwe nukudzikuvavika ku mîho kundolo dzakwe, ńe vagajalunu, je mwitova nimbilikila, 1. Tes. 5, 23; Fil. 1, 10.

²⁵ ju Nguluvi, umupoki visu vugendela mwa Jesu Kilisiti umutwa visu, je fyakwe jujo nindolo nuvukomi ningufu nuvutambule na pe gyali gyave ukuhagulwa imyâka gyonda na lino neke nukufika kumihagulile gyonda gya myâka. Amene. Lom. 16, 27; 1. Tim. 1, 17.