Filemono 1 - Itesamende Imya

¹ Je nene, nde Pavulu, nde mufunge va Kilisiti Jesu, ndi na Timote, umuna-lukolo, tukwandikye ve Filemono, ve mudzela, ve mulimi mujisu. Ef. 3, 1.

² Tukukwandikila najuve, ve Apija, ve muhadzavisu, najuve, ve Alahipi, ve mutendzi mujisu, tulwandikye nulukombeso londa, ulwiko’ana mu numba jako. Kol. 4, 17.

³ Ulusungu luvedzage nane nulutengamaso uluhuma kwa Nguluvi, udadisu, na kwa mutwa Jesu Kilisiti. Lom. 1. 7.

⁴ Mbepali ndihongedza kwa Nguluvi vangu, pe ndikukukumbuka mululapangilo lwangu,

⁵ pe ndipulike nulwendo lwako nulufuvo, ululungamye na kwa mutwa vesu Jesu na kuvîmike vonda,

⁶ nditigila: ulufuvo lwako, lwe tuhangile nafwe nave, lugimbage pakudzikagula dzonda inofu, idzilungamye kwa Kilisiti, dze twi nadzo unefwe. Fil. 1, 9.

⁷ Pakuvaimyêndele gyako gituhulye ukukela mbando nukunamadzwa, pakuva na dzi numbula dza vîmike dzikilanye pa pako juve, ve mwanisu. 2. Kol. 7, 4.

⁸ Lino mwanaja, nde ndika ndivedzage nakyo mwa Kilisiti ikyendamutima hîlo ikya kukulagilila hela uluvagye,

⁹ napo unene ndikelye ukwimila vu vwênde pakukuvunga hela, june nde Pavulu, nde mugogolo nigilage lino nde mukunge va Kilisiti Jesu,

¹⁰ ndikukuvunga lino ulwa mwâna vangu, je ndimuholile, pe ndigenda mumupingo, u-Onesimi, Kol. 4, 7; 1. Kol. 4, 15; Gal. 4, 19.

¹¹ je idâha asakupefukilaga kinu, lino akutupefukila nave nani,

¹² je mwene je ndikutumye uveve jujo, nigilage inumbula jangu.

¹³ Unene ngatigye ndimupiluse andimilage unene pavufunge vwangu, vwe linulye ilyevangeli uvu, kivedze kifwa je veve, Fil. 2, 30.

¹⁴ neke singakelye ukulugendela ulu kitadzela uveve, pakuva unene nigye ulunofu lwako utane ukundetela vuhenekasingo, hamu undetelage vugololasingo. 2. Kol. 9, 7.

¹⁵ Ndivwene ene vuli lwe lwene lwe ahemwike ifigono nde filingi, pakuta ahambukage vako mbêpali,

¹⁶ je asili ngita musutu lino, hamu ali mululutye kuvusutu; muna-lukolo umwênde nulwa pamuvili nulwa pamutwa, ukwangu ve vo luli mbando, neke ukwako asilutila vona? 1. Tim. 6, 2.

¹⁷ Lino ngana twi vu hanganile nave nani, apo umwanukilage ngita ukundzanukila june.

¹⁸ Neke lino ngana anangile lunu ukwako nambi apingile finu, ifyo undzigilage unene.

¹⁹ Je nene, nde Pavulu, ndandike nilivoko lyangu nditigila: ndikukuhomba june, ndileka ukuta uhombe juve, pakuva najuve uli muna-kudzigilwa ukwangu.

²⁰ Ena mwanisu uleke ndinonelage ukwako mwa mutwa, uleke ndikilihidze i numbula mwa Kilisiti. v. 7.

²¹ Ve ndikwandikye vuli, ndijengwise hela ukwako, nditigila akuṅunda; ndilukagwe unene, ukuta vwidzufya na kufye ndongile unene.

²² Napakugona napo umbujapililage ṅani, ndivwene ndihuvila ukuta indapangilo dzeńo dzilanulila ukuta ndipelwage ukweno unene. Fil. 1, 25; 2, 24.

²³ Akukuhungila Epafala, umukungwa mujangu mwa Kilisiti Jesu. Kol. 1, 7; 4, 12.

²⁴ Vikukuhungila va-Malika na Alisitalaka na Dema na Luka, avikunanga amalimo. Kol. 4, 10, 14.

²⁵ Ulusungu lwa mutwa Jesu Kilisiti luvedzage numubepo gweno.