2 Chronicles 27 - Keley-i Bible (Antipolo Ifugao)

Ya nampatulan nan Jotham di Judah

¹ Dewampulut lima toon nan Jotham eman ni nampatulan tud Judah et man-ap-apun hampulut enem ni toon. Hi inetu ey hi Jerusah e u-ungngan Sadok.

² Kayyaggud ida impahding tu e kamengippeamleng nan Apu Dios, henin ametu hi Ussiah, nem eleg ngu humgep di Tempol ni mengihheb ni insensoh. Nem yadda ngu tutu-u ey intultuluy dan impahding hu lawah.

³ Impeyayyaggud Jotham hu nengin-ahpat ni Eheb ni Tempol ey inhammad tudda luhud di duntug di Ophel.

⁴ Ey nengapyaddan bebley di nedunduntug di Judah ey nengapyan nangkehammad ni pangguwalyaan idad muyung.

⁵ Entanni ey ginubat tudda iAmmon et apputen tudda. Et mambayad idan buwis ni hi-gatun tellun toon. Et ya daka iddawat ni hi-gatun katootoon ey umlaw di epat ni libun kiloh ni silber, neliman libun langgusih ni wheat niya neliman libun langgusih ni barley.

⁶ Nambalin ni et-eteng hu kabaelan Jotham tep kamekangngu-unnud ni Ap-Apu e Dios tu.

⁷ Yadda impahding tun nan-ap-apuan tu, yadda nekigubagubatan tu niyadda edum ni impahding tu ey neitudek di Libluh idan Patul di Israel niyad Judah.

⁸ Dewampulut lima toon tu eman ni nampatulan tud Judah et man-ap-apun hampulut enem ni toon.

⁹ Netey et maikulung di Bebley David et maihullul hi Ahas e u-ungnga tun nampatul.